សម្ដេច ហ៊ុន ម៉ាណែត បានបន្ថែមថា ជនជាតិចិនតៃវ៉ាន់ទាំង២រូបនេះ បានថតរូបវីដេអូសម្ដែងចាប់ជំរិតនេះហើយ ផ្ញើឱ្យទៅប្រពន្ធខ្លួននៅតៃវ៉ាន់ បង្ហោះវីដេអូ ដើម្បីទទួលបានការចូលទស្សនាច្រើន និងឱ្យគេស្គាល់គណនីTikTok ។ សម្ដេច ហ៊ុន ម៉ាណែត បានបន្ថែមថា ក្រោយគេស្គាល់ គណនីTikTokនោះច្រើន ហើយពួកគេនឹងឆ្លៀតឱកាសលក់ផលិតផលតាម​អនឡាញ។ នេះបើតាមសម្ដេច ហ៊ុន ម៉ាណែត ដែលទទួលបានចម្លើយសារភាពពីជនជាតិចិនតៃវ៉ាន់២នាក់។
 

សម្រាប់សកម្មភាពនេះ ប្រមុខរដ្ឋាភិបាល ចាត់ទុកជាទង្វើបំផ្លាញមុខមាត់កម្ពុជា ដើម្បីផលប្រយោជន៍ខ្លួនឯង។ «សូមព្រមានអ្នកដទៃផ្សេងទៀត ដែលយកប្រទេសកម្ពុជា ជាកន្លែងថតសម្ដែងចាប់ជំរិត ដើម្បីទទួលបានអ្នកទស្សនាច្រើន គឺត្រូវអនុវត្តទោសជាប់គុក២ឆ្នាំហើយ បណ្ដេញចេញពីប្រទេសកម្ពុជា លែងឱ្យចូលកម្ពុជាមួយជីវិត»។ នេះជាការបញ្ជាក់របស់សម្ដេច ហ៊ុន ម៉ាណែត ។
 

ករណីចាប់ជនជាតិចិនតៃវ៉ាន់នេះ ក៏មានការអន្តរាគមន៍ឱ្យដោះលែងវិញដែរ ក្រោមហេតុផលថា ម្ដាយរបស់ពួកគេចាស់ជរា ហើយកំពុងសម្រាកព្យាបាលជំងឺ ដែលត្រូវការពួកគេមើល​ថែរក្សា។ ដ្បិតមានការអន្តរាគមន៍បែបនេះក្តី តែសម្ដេច មិនលើកលែងឡើយ។
 

កន្លងមក ក៏ធ្លាប់មានករណីជនបរទេស ថតវីដេអូបូមឈាមលក់ ក្រោមរូបភាពថា ជា«ទាសករឈាម»ផងដែរ។ ក្រោយពេលអាជ្ញាធរ ស៊ើបអង្កេតលើករណីនេះហើយ ទើបរកឃើញថា បុគ្គលថតវីដេអូនេះ មានជំងឺឈាមស ស៊ីឈាមក្រហម ហើយមិនមានប្រាក់ព្យាបាលជំងឺ ទើបថតវីដេអូសម្ដែង យកទៅបង្ហោះលើបណ្ដាញសង្គម ដើម្បីរកចំណូល និងជំនួយមនុស្សធម៌។ ចំណែកករណីមួយទៀត ជនឆបោក បានថតវីដេអូជួញដូរក្រលៀន ដើម្បីបំផុសរូបភាពអាក្រក់នៅកម្ពុជា​ ។ ករណីនេះ ក៏មានការចូលរួមគប់គិតពីក្រុមគ្រូពេទ្យទៀតផង។ នេះបើតាមប្រមុខរដ្ឋាភិបាល។
 

នាយករដ្ឋមន្រ្តីកម្ពុជា បញ្ជាឱ្យអាជ្ញាធរអនុវត្តច្បាប់តឹងរឹង លើជនបរទេសណា ដែលយកប្រទេសកម្ពុជា ថតសម្ដែងវីដេអូចាប់ជំរិត និងបទឧក្រិដ្ឋផ្សេងៗ ដែលគ្មានការអនុញ្ញាត៕