អង្គការសហប្រជាជាតិ (UN) និងស្ថាប័នមនុស្សធម៌ផ្សេងទៀត មិនទាន់បានប្រកាសពីស្ថានភាពទុរ្ភិក្សនៅក្នុងតំបន់ កាហ្សានៅឡើយ បើទោះបីជាស្ថានភាពកាន់តែអាក្រក់នៅក្នុងទឹកដីប៉ាឡេស្ទីន ចាប់តាំងពី ការវាយប្រហាររបស់ពួកហាម៉ាសលើអ៊ីស្រាអែលកាលពីថ្ងៃទី ៧ ខែតុលា។ អ្នកនាំពាក្យរបស់ការិយាល័យ UN សម្រាប់ការសម្របសម្រួលកិច្ចការមនុស្សធម៌ (OCHA) លោក Jens Laerke បានព្រមានថា នៅពេលដែលគ្រោះទុរ្ភិក្សត្រូវបានប្រកាស វាយឺត ពេលសម្រាប់មនុស្សដ៏ច្រើនលើសលប់។

 

«យើងមិនចង់ទៅដល់ស្ថានភាពនោះទេ ហើយយើងត្រូវការអ្វីៗដើម្បីផ្លាស់ប្តូរមុននោះ»។ លោក Laerke បានប្រាប់សន្និសីទខ្លីមួយនៅទីក្រុងហ្សឺណែវបែបនេះរួចបន្តថា ប្រទេសនីមួយៗ ត្រូវពិនិត្យមើលពីស្ថានភាពសន្តិសុខស្បៀងនៅទូទាំងតំបន់កាហ្សា ជាពិសេសនៅភាគខាងជើង ហើយប្រសិនបើអ្វីមួយមិនផ្លាស់ប្តូរនោះទេ គ្រោះទុរ្ភិក្ស គឺស្ទើរតែជៀសមិនរួច ចំពោះនិន្នាការបច្ចុប្បន្ន។

 

ទន្ទឹមនេះ លោក Laerke ក៏បានលើកឡើងពីការបិទជិតសរុបនៃការនាំចូលអាហារពាណិជ្ជកម្ម ឡានដឹកទំនិញដែលចូលមកជាមួយជំនួយស្បៀងអាហារ និងឧបសគ្គក្នុងការអនុញ្ញាតឱ្យឆ្លង កាត់ដើម្បីផ្លាស់ទីជុំវិញក្នុងទឹកដីប៉ាឡេស្ទីន។ គ្រប់កត្តាទាំងអស់នេះរួមបញ្ចូលគ្នានាំឱ្យឈាន ដល់ការព្រមានពីស្ថានភាពធ្ងន់ធ្ងរខ្លាំងដែលនឹងចូលមកយ៉ាងលឿន។

 

ស្រដៀងគ្នានេះ អ្នកនាំពាក្យអង្គការសុខភាពពិភពលោក (WHO) លោក Christian Lindmeier ប្រាប់អ្នកសារព័ត៌មានដាច់ដោយឡែកថា ប្រព័ន្ធសុខាភិបាលនៅតំបន់កាហ្សាកំពុងស្ថិតក្នុង កម្រិតដ៏ទាបបំផុតដែលផ្ដល់ផលអវិជ្ជមានយ៉ាងខ្លាំងដល់អាយុជីវិតប្រជាជននៅទីនោះ។

 

កងកម្លាំងអ៊ីស្រាអែលនៅតំបន់កាហ្សាដែលបំផ្លិចបំផ្លាញដោយសង្រ្គាមបានបើកការបាញ់

ប្រហារកាលពីថ្ងៃទី២៩ ខែកុម្ភៈ ខណៈដែលជនស៊ីវិលប៉ាឡេស្ទីនបានរង់ចាំទៅយកជំនួយ ស្បៀងអាហារអំឡុងពេលមានឧបទ្ទវហេតុវឹកវរដែលក្រសួងសុខាភិបាលបាននិយាយថាបានសម្លាប់មនុស្សជាង១០០នាក់។ 

 

លោក Lindmeier ជម្រាបថា មនុស្សអស់សង្ឃឹមយ៉ាង ខ្លាំងចំពោះអាហារ ទឹកសាប ការផ្គត់ផ្គង់ណាមួយ ដូច្នេះ ពួកគេប្រថុយជីវិតក្នុងការទទួល បានអាហារ គ្រឿងផ្គត់ផ្គង់ណាមួយដើម្បីចិញ្ចឹមកូន និងសម្រាប់ផ្ទាល់ខ្លួន។

 

តាមស្ថិតិដែលចងក្រងឡើងដោយក្រសួងសុខាភិបាលដែលគ្រប់គ្រងដោយក្រុមហាម៉ាស កុមារចំនួន១០ នាក់ ត្រូវបានចុះឈ្មោះជាផ្លូវការនៅក្នុងមន្ទីរពេទ្យមួយ ដោយសារការអត់ឃ្លានរហូតដល់ស្លាប់ ខណៈចំនួនមិនផ្លូវការអាចត្រូវបានរំពឹងថានឹងខ្ពស់ជាងនេះទៅទៀត៕