៦គ្រាប់របស់ Arsenal នៅជំនួបលីគសប្តាហ៍ទី២៧ នៅថ្ងៃទី៤ ខែមីនា សម្រេចបានដោយកីឡាករ៦រូបផ្សេងគ្នា ក្នុងនោះ៥គ្រាប់ធ្វើបានដោយកីឡាករ Martin Ødegaard, Gabriel Martinelli, Kai Havertz, Declan Rice និង Ben White និង១គ្រាប់ជាការធ្វើឱ្យចូលទីខ្លួនឯងរបស់ Jayden Bogle ខ្សែការពារ Sheffield United។
 

នេះជាជ័យជម្នះទី៧ជាប់ៗគ្នារបស់ក្រុមដែលដឹកនាំដោយអ្នកចាត់ការទូទៅលោក Mikel Arteta ដោយសរុបគ្រាប់បាល់ Arsenal មានគ្រាប់ស៊ុតបញ្ចូលទីដល់ទៅ៣១គ្រាប់។ ជាមួយទម្រង់ប្រកួតដ៏ល្អនៅរដូវកាលនេះ កាំភ្លើងធំតែងសម្រេចគ្រាប់បាល់បានច្រើនលើគូប្រជែង ដោយគិតជាមធ្យមរកបាន៤គ្រាប់ក្នុងមួយប្រកួត ក្នុងចំណោម៧ប្រកួតចុងក្រោយ។
 

ជ័យជម្នះនេះ ក៏បានជួយកាំភ្លើងធំ តាមពីក្រោយប្រកៀកក្រុមកំពូលតារាង Liverpool និងក្រុមលេខ២ Man City ក្នុងការប្រជែងពានលីគកំពូលអង់គ្លេសរដូវកាល ២០២៣-២៤នេះ។ ឆ្លងកាត់ការប្រកួត២៧លើកដូចគ្នា។ Arsenal រកបាន៦១ពិន្ទុ តាមពីក្រោយក្រុមការពារតំណែងជើងឯកមេឃខៀវ១ពិន្ទុ និងហង្សក្រហមចំនួន២ពិន្ទុ។
 

សម្រាប់ Sheffield United តាមរយៈបរាជ័យនេះ បានធ្វើឱ្យពួកគេពិបាកក្នុងការប្រជែងពិន្ទុ ដើម្បីបន្តនៅក្របខណ្ឌកំពូលរដូវកាលក្រោយ។ ក្រុមលោក Chris Wilder រកបានតែ១៣ពិន្ទុប៉ុណ្ណោះ ស្ថិតនៅបាតតារាង ស្មើ Burnley ដែលនៅលេខ១៩ និង តាមពីក្រោយក្រុមលេខរៀងទី១៨ Luton ៧គ្រាប់។ Sheffield United មានគម្លាតពិន្ទុ១១ពិន្ទុ ពីក្រុមលេខ១៧ Nottm Forest៕