ក្នុងជំនួបជើងទី២ វគ្គ១៦ក្រុមចុងក្រោយនៅរាត្រីថ្ងៃទី៦ ខែមីនា ម្ចាស់ផ្ទះ Man City នៅតែបន្តទម្រង់លេងបានល្អ​ ដោយយកឈ្នះ Copenhagen ៣-១។ ៣គ្រាប់របស់ក្រុមមេឃខៀវ សម្រេចបានដោយ Manuel Akanji, Julián Álvarez និង Erling Haaland ឯ១គ្រាប់របស់ក្រុមមកពីដាណឺម៉ាកតាមរយៈកីឡាករ Mohamed Elyounoussi។ 
 

ដោយសរុបទាំងពីរជើងក្នុងលទ្ធផល ៦-២ នៅវគ្គ១៦ក្រុមចុងក្រោយ គ្រប់គ្រាន់ដើម្បីនាំក្រុមលោក Pep Guardiola បន្តទៅការពារតំណែងជើងឯករបស់ខ្លួននៅវគ្គ៨ក្រុម។
 

Real Madrid ឯណោះវិញ ក៏បានឈានទៅវគ្គ៨ក្រុមផងដែរ ក្រោយឈ្នះ RB Leipzig ទាំងប្រផិតប្រផើយ ក្នុងលទ្ធផលទាំងពីរជើង ២-១។​ នៅជំនួបជើងទី២ ក្រុមអធិរាជសស្មើក្រុមពីអាល្លឺម៉ង់ ១-១។ ១គ្រាប់របស់ក្រុមលោក Carlo Ancelotti ធ្វើបានដោយ Vinicius Junior នៅនាទី៦៥ មុនពេល Willi Orbán តាមស្មើឱ្យ RB Leipzig វិញនៅ៣នាទីបន្ទាប់។
 

មកទល់ពេលនេះ ក្របខណ្ឌកំពូលអឺរ៉ុបរដូវកាល ២០២៣-២៤ រកឃើញ៤ក្រុមហើយឡើងទៅវគ្គ៨ក្រុម រួមមាន Bayern Munich, PSG, Real Madrid និង Man City ដោយឡែក៤ក្រុមទៀតនឹងប្រកួតកាត់ក្តីជើងទី២ នៅសប្តាហ៍ក្រោយ៕