កាលពីកុមារភាពស្រ្តីជនជាតិដើមភាគតិចព្នងរូបនេះ  បានរងផលប៉ះពាល់ផ្លូវអារម្មណ៍យ៉ាងខ្លាំងពីឪពុកញៀនស្រា ដែលតែងតែប្រើប្រាស់អំពើហិង្សាមកលើម្ដាយ និងបងប្អូនក្នុងគ្រួសារ។ ដោយមិនចង់រស់នៅក្នុងស្ថានភាពនេះតទៀត អ្នកស្រី បានពុះពាររៀន រហូតបញ្ចប់ថ្នាក់មហាវិទ្យាល័យ​ ជំនាញចិត្តសាស្រ្ត នៅសកលវិទ្យាល័យភូមិន្ទភ្នំពេញ។ 

ក្រោយបញ្ចប់ការសិក្សា នាងមិនចង់ធ្វើការនៅភ្នំពេញនោះទេ​ ដោយបានត្រឡប់ទៅស្រុកកំណើតវិញ ដើម្បីយកចំណេះជំនាញរបស់ខ្លួន ទៅអប់រំនៅក្នុងសហគន៍។ ការចូលរួមរបស់ស្រ្តីវ័យ៣៤ឆ្នាំរូបនេះ គឺធ្វើឡើងក្នុងគោលបំណងផ្ដល់ចំណេះដឹង កាត់បន្ថយអំពើហិង្សា និងការរំលោភបំពានផ្លូវភេទលើស្រ្តី កុមារ នៅក្នុងសហគមន៍របស់ពួកគេ។ 
  

បច្ចុប្បន្ន អ្នកស្រី ប្រេង ហៀវ ជាបុគ្គលិកផ្ដល់សេវាចិត្តសង្គមដល់ស្រ្តី និងកុមារ ដែលរងគ្រោះដោយអំពើហិង្សា និងការរំលោភបំពានផ្លូវភេទនៃអង្គការសេចក្តីសង្ឃឹមពិភពលោកអន្តរជាតិ (World Hope International - Cambodia ) ប្រចាំខេត្តមណ្ឌលគិរី។ ក្នុងនោះ ការងាររបស់អ្នកស្រី  ក៏មានការប្រឹក្សាផ្លូវចិត្តជាមួយជនរងគ្រោះផ្ទាល់ ការផ្សព្វផ្សាយតាមសហគមន៍ និងសាលារៀន ព្រមទាំងធ្វើជីវៈបណ្ដុះបណ្ដាលដល់អាជ្ញាធរ ដើម្បីផ្ដល់ការគាំពារបន្ថែមផងដែរ៕