បើតាទីភ្នាក់ងារសារព័ត៌មានរុស្ស៊ី RIA Novosti ក្រុមអ្នកវាយប្រហារស្លៀកពាក់ឯកសណ្ឋានក្លែងបន្លំបានចូលទៅក្នុងអគារសាលតន្ត្រី Co បើកការបាញ់ប្រហារ និងគប់គ្រាប់បែកដៃ ឬគ្រាប់បែកបំផ្ទុះផង។ អគ្គិភ័យបានរីករាលដាលយ៉ាងឆាប់រហ័សតាមសាលប្រគុំតន្ត្រី Crocus City នៅជាយក្រុង Krasnogorsk ភាគខាងជើងរដ្ឋធានីមូស្គូ។

 

ផ្សែងហុយពេញអគារ ហើយអ្នកទស្សនាខ្លះនាំគ្នារត់គេចពីការបាញ់ ហើយបានប្រញាប់ប្រញាល់ភៀសខ្លួនចេញពីអាគារ។ ការបាញ់ប្រហារកើតឡើងប៉ុន្មាននាទីមុនកម្មវិធីចាប់ផ្ដើមក្នុងសាលដែលអាចផ្ទុកមនុស្សជាង៦ពាន់នាក់។ អ្នកចូលរួមម្នាក់ឈ្មោះ Alexei ដែលជាផលិតករតន្ត្រីផង និយាយថា ខ្លួនបានឮផ្ទុះកាំភ្លើងយន្តជាច្រើនលើក និងស្រែកទ្រហឹង។

 

គណៈកម្មាធិការស៊ើបអង្កេតរុស្ស៊ី បាននិយាយថា សាកសពជាច្រើនកំពុងត្រូវបានពិនិត្យ ហើយចំនួនមានជាង៦០នាក់នៅក្នុងការវាយប្រហារភេរវកម្ម ហើយជនរងគ្រោះអាចកើនឡើងបន្ថែមទៀត។ ក្រុមជួយសង្រ្គោះ ក៏ធ្វើអន្តរាគមន៍ភ្លាមដែរ ស្របពេលការស៊ើបអង្កេតក៏ធ្វើឡើងដូចគ្នា។

 

អាជ្ញាធររុស្ស៊ី មិនទាន់ដាក់ការសង្សយណាមួយលើអ្នកនៅពីក្រោយការបាញ់នេះឡើយ។ ឯក្រុមរដ្ឋឥស្លាមចេញមុខទទួលខុសត្រូវ។ ក្រុមជ្រុលនិយមនេះនិយាយថា ក្រុមយុទ្ធជនរបស់ខ្លួនបានវាយប្រហារការប្រមូលផ្តុំដ៏ធំមួយនៅជាយក្រុងមូស្គូ និងដកថយទៅមូលដ្ឋានរបស់ពួកគេដោយសុវត្ថិភាព។

 

អ៊ុយក្រែនវិញ ក៏ប្រកាសមិនពាក់ព័ន្ធករណីនេះដែរ។ អង្គការសហប្រជាជាតិ អាម៉េរិក និងសហភាពអឺរ៉ុប ក៏ថ្កោលទោសការវាយប្រហារនេះដូចគ្នា៕