អន្តរជាតិ
ក្រុង Johannesburg មានធនធានច្រើនបំផុតនៅអាហ្វ្រិក តែខ្វះទឹកម៉ាស៊ីនប្រើប្រាស់
រូបឯកសារ៖ ពលរដ្ឋនៅសង្កាត់ Soweto នៃប្រទេសអាហ្វ្រិកខាងត្បូងនាំគ្នាស្តុកទុកទឹកសម្រាប់ប្រើប្រាស់ កាលពីថ្ងៃទី១៦ ខែមីនា ឆ្នាំ២០២៤។
×![]()
ដោយ: VOA
អ្នកស្រុកក្នុងមជ្ឈមណ្ឌលពាណិជ្ជកម្មនៃប្រទេសអាហ្វ្រិកខាងត្បូង គឺក្រុង Johannesburg កំពុងខឹងសម្បានឹងការខ្វះទឹកម៉ាស៊ីនក្នុងក្រុងនេះ នៅពេលមានសីតុណ្ហភាពក្តៅខ្លាំងនៅពាក់កណ្តាលរដូវក្តៅ។
មន្ត្រីបាននិយាយថា ប្រមាណ ៥០ភាគរយ នៃតំបន់ដែលមានទឹកម៉ាស៊ីន ខ្វះទឹកប្រើប្រាស់ជិតពីរអាទិត្យមកហើយ។ ក្រុង Johannesburg មានប្រជារាស្ត្រជិត ៦លាននាក់។
ពលរដ្ឋបាននាំគ្នាធ្វើបាតុកម្មជាលក្ខណៈតូច ដើម្បីតវ៉ាចំពោះរឿងខ្វះទឹកប្រើនេះ។
អ្នកលក់ដូរនិងហាងជំនួញរងផលប៉ះពាល់យ៉ាងខ្លាំង ហើយមន្ទីរពេទ្យមួយចំនួនក៏មានផលប៉ះពាល់ដែរ។ គិលានុបដ្ឋាយិកានៅមជ្ឈមណ្ឌលវេជ្ជសាស្ត្រមួយបានថ្លែងប្រាប់បណ្តាញព័ត៌មានមូលដ្ឋានថា ពួកគេអត់មានទឹកសម្អាតលាងដៃទេ។
លោក Mlimandlela Ndamase អ្នកនាំពាក្យអភិបាលក្រុង Johannesburg បានពន្យល់ថា បញ្ហាដំបូងចេញពីស្ថានីយ៍បូមទឹកសំខាន់មួយកាលពីថ្ងៃទី ៣ ខែមីនា នៅក្រោយមានការដាច់ភ្លើងដោយសារមានរន្ទះបាញ់។
បញ្ហាខ្វះទឹកម៉ាស៊ីនកើតឡើងនៅពេលប្រទេសនេះមានបញ្ហាផ្តល់អគ្គិសនី។
ប្រទេសអាហ្វ្រិកខាងត្បូងមានវិបត្តិថាមពលជាងមួយទសវត្សរ៍មកហើយ តែវិបត្តិនេះរឹតតែខ្លាំងជាងមុនកាលពីឆ្នាំទៅ ដោយសារមានការដាច់ភ្លើងសឹងតែរាល់ថ្ងៃ ដោយជួនកាលរហូតដល់ ១០ម៉ោងក្នុងមួយថ្ងៃ។
នេះមិនមែនជាលើកដំបូងទេដែលក្រុងនេះគ្មានទឹកម៉ាស៊ីន។ ក្រុងនេះបានខ្វះទឹកជាទៀងទាត់កាលពីឆ្នាំទៅមិញ។
លោក Ndamase បានទទួលស្គាល់ថាប្រព័ន្ធទឹកក្រុង Johannesburg មានបញ្ហាយូរយាមកហើយ។
លោកថ្លែងថា៖ «ក្រុង Johannesburg ទទួលស្គាល់ថា ហេដ្ឋារចនាសម្ព័ន្ធចាស់អស់ហើយ ហើយត្រូវការថែទាំ ហើយក៏មានសេចក្តីត្រូវការហេដ្ឋារចនាសម្ព័ន្ធថ្មីនៅទូទាំងក្រុងផងដែរ»។
តែមនុស្សច្រើននាក់បានបន្ទោសអាជ្ញាធរថាគ្មានសមត្ថភាព។
កាលពីថ្ងៃពុធទី ១៣ ខែមីនា លោកស្រី Nombuso Shabalala អ្នកនាំពាក្យរដ្ឋាករទឹកក្រុង Johannesburg បានទទួលស្គាល់ថាមានកំហុសរបស់មនុស្សដែរ។
លោកស្រីថ្លែងថា៖ «ក្រុមបច្ចេកទេសបានរកឃើញថាវ៉ាល់សម្រាប់ផ្តល់ទឹកបានបិទ ដូច្នេះក៏កាត់បន្ថយទឹកក្នុងប្រព័ន្ធ។ គេបានបើកវ៉ាល់វិញហើយ ហើយក៏មានទឹកខ្លះឡើងវិញហើយ»។
លោកស្រី Anja du Plessis ជាសាស្ត្រាចារ្យនិងជាអ្នកជំនាញខាងទឹកនៅសាកលវិទ្យាល័យអាហ្វ្រិកខាងត្បូង។ លោកស្រីថា «ការគ្មានសមត្ថភាព កង្វះតម្លាភាពនិងការទទួលខុសត្រូវខ្ពស់ និងការមានឆន្ទៈនយោបាយតិចតូចឬគ្មានសោះតែម្តង»បានបង្កើនវិបត្តិទឹកថែមទៀត។
លោកស្រីថ្លែងថា៖ «ការកើនឡើងយ៉ាងលឿននិងរឹតតែធ្ងន់ធ្ងរនៃបញ្ហាទឹកនៅក្រុង Johannesburg អាចបណ្តាលមកពីអាជ្ញាធរក្រុងគ្មានដំណើរការល្អនិងគ្មានសមត្ថភាព កង្វះប្រភព ធនធានឬការគ្មានការវិនិយោគក្នុងការជួសជុលហេដ្ឋារចនាសម្ព័ន្ធ»។
ធុងទឹកធំៗបានដាក់នៅទូទាំងក្រុងនេះ ទោះជារដ្ឋាករទឹកក្រុង Johannesburg ថានៅពេលនេះប្រព័ន្ធភាគច្រើនរបស់ខ្លួនមានដំណើរការវិញហើយក៏ដោយ។
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
