រដ្ឋាភិបាលបង្រួបបង្រួមជាតិ (NUG) បានប្រកាសថា មូលដ្ឋានទ័ពយោធានៅក្នុងរដ្ឋធានីណៃពិដោត្រូវបានវាយប្រហារដោយដ្រូន។ ប៉ុន្តែក្រុមនេះ​មិន​បាន​បញ្ជាក់​ពី​ប្រភេទដ្រូន ដែល​បាន​ប្រើ​ និងទំហំនៃការ​ខូចខាត​នៅ​មូលដ្ឋាន​នោះ​ទេ។

 

កងកម្លាំងការពារប្រជាជន (PDF) ដែលជាផ្នែកមួយរបស់រដ្ឋាភិបាលស្រមោលមួយនេះ បាននិយាយថា ខ្លួនបានទទួលបញ្ជាឱ្យវាយប្រហារទីតាំងចំនួន២នៅក្នុងរដ្ឋធានីណៃពិដោ ដែល១ក្នុងចំណោមនោះជាមូលដ្ឋានទ័ពអាកាស។

 

​យោធា​មី​យ៉ាន់​ម៉ា ដែល​ឡើង​កាន់​អំណាច​តាមរយៈរដ្ឋប្រហារ​ឆ្នាំ​២០២១ មិន​បាន​​ឆ្លើយតបលើ​ព័ត៌មាន​នេះ​ទេ​។ ប្រសិនបើព័ត៌មាននេះត្រូវបានផ្សព្វផ្សាយនោះ​ វានឹងប៉ះពាល់យ៉ាងខ្លាំងដល់កេរ្តិ៍ឈ្មោះរបស់កងទ័ពមីយ៉ាន់ម៉ា ខណៈដែលកម្លាំងនេះកំពុងប្រឈមក្រុមប្រដាប់អាវុធជនជាតិភាគតិចជាច្រើន។ នេះបើតាមសារព័ត៌មាន Reuters។ 

 

ប្រធានាធិបតីស្តីទី​ លោក Myint Swe បានព្រមានថា ប្រទេសនេះស្ថិតក្នុងហានិភ័យនៃការបែកបាក់ ប្រសិនបើខ្លួនបរាជ័យក្នុងការដោះស្រាយការបះបោរដោយក្រុមឧទ្ទាម។

 

ឧត្តមសេនីយ៍ មីន អុងឡាំង កាលពីសប្តាហ៍មុនបានអំពាវនាវឱ្យប្រជាជន និងកងទ័ពរួបរួមគ្នាដើម្បីប្រយុទ្ធប្រឆាំងនឹងក្រុមប្រដាប់អាវុធដែលកំពុងស្វែងរកការបំផ្លិចបំផ្លាញប្រទេស ក៏ដូចជាការឃុបឃិតក្នុងការបំផ្លិចបំផ្លាញផែនការបោះឆ្នោត៕