​ប្រជាពលរដ្ឋនៅសង្កាត់ត្រើយកោះ ក្រុងកំពត បានយល់ដឹងពីសិទ្ធិរបស់ខ្លួន ហើយ​ថែម​ទាំងទទួលបានអត្ថប្រយោជន៍ជាច្រើន តាមរយៈសេវាសាលារៀន, មណ្ឌលសុខភាព និង រដ្ឋបាលសាធារណៈ ក្រោយការបង្រៀនពីគណនេយ្យភាពរបស់ក្រុមអង្គការសង្គមស៊ីវិល។
 

ការផ្សព្វផ្សាយ«កញ្ចប់ព័ត៌មាន» គឺផ្តោតលើសេវាសាលារៀន, មណ្ឌលសុខភាព និងរដ្ឋ បាលឃុំសង្កាត់ជាដើម។ លោក សេង សុខា តំណាង Internews ប្រចាំប្រទេសកម្ពុជា បាន រៀបរាប់ដូច្នេះថា ការ​ចុះ​ផ្សព្វផ្សាយ​កញ្ចប់​សេវា​គណនេយ្យភាព ​ដល់​ព​ល​រដ្ឋនៅភូមិបឹងតា ព្រាម សង្កាត់ត្រើយកោះ ក្រុងកំពត ជាផ្នែកមួយចូលរួមលើកកម្ពស់តម្លាភាព និងភាពងាយ ស្រួល ទទួលបានព័ត៌មានអំពីសិទ្ធិរបស់ខ្លួនកាន់តែច្បាស់​។ 
 

សម្រាប់លោក សេង សុខា នៅពេលដែល​ពលរដ្ឋ​​យល់ដឹង​ពី​តួនាទី និង​សិទ្ធិ​របស់ខ្លួន ហើយ​​អាជ្ញាធរ​មូលដ្ឋាន ​យល់​ច្បាស់ពី​គណនេយ្យភាព​សង្គម និង​តួនាទី​ក្នុងនាម​ជា​អ្នកផ្តល់​សេវា នោះទាំង​អ្នកទទួល​សេវា និងអ្នកផ្ដល់សេវា កាន់តែ​យល់​​ពីគ្នា និង​សហការគ្នា​ដោយ​ជិតស្និទ្ធ​​។

 

អ្នកស្រី គង់ ម៉ៃតោះ ជាពលរដ្ឋនៅក្រុងកំពត ដែលមានរបរជាអ្នកកាត់ដេរ យល់ថា សកម្មភាពផ្សព្វផ្សាយព័ត៌មាន ពី​គណនេយ្យភាពសង្គម ​ជា​រឿង​ដ៏សំខាន់សម្រាប់ពលរដ្ឋ ពោលគឺជំរុញការយល់ដឹងពីដឹងពីតួនាទីរបស់ខ្លួន​។ មិនតែប៉ុណ្ណោះ ពលរដ្ឋក៏បាន​ដឹងពី​កាតព្វកិច្ចរបស់អាជ្ញាធរមូលដ្ឋានដែរ។ ​ អ្នកស្រី ម៉ៃតោះ បញ្ជាក់ដូច្នេះ ដោយបន្ត​សំណូម​ពរថា៖ «ខ្ញុំចង់​ឱ្យមាន​ការចុះផ្សព្វផ្សាយបែបនេះកាន់តែច្រើន ដើម្បីឱ្យពលរដ្ឋដឹងពីសិទ្ធិដឹ​ង​ពីតួនាទីរបស់ខ្លួន និងមានសិទ្ធិដឹងពីតួនាទីរបស់ខ្លួន, ការបំពេញការងារ របស់សេវា​សាលា​រៀន, មណ្ឌលសុខភាព និងរដ្ឋបាលឃុំសង្កាត់ និងងាយស្រួល ក្នុង​ការទៅទទួល​សេវា​នីមួយៗនៅក្នុងរដ្ឋបាលសង្កាត់រហ័ស»។