សម្រាប់ យុវជន ចេង រតនា ក្រៅពីសៀវភៅ ការអានកាសែត ទស្សនាវដ្តី សំណេរនានាក្នុងបណ្តាញសង្គម និងអក្សរផ្សេងៗនៅជុំវិញខ្លួន ក៏ផ្តល់ចំណេះដឹងថ្មីៗ ចេះពាក្យ និងភាសា ក៏ដូចជាជួយដល់ការសរសេរដែរ។ យុវជន ចេង រតនា បញ្ជាក់ដូច្នេះថា៖ «ការអាន គឺពិតជាបានជួយចូលរួមចំណែកខ្លាំងនៅក្នុងជីវិតប្រចាំថ្ងៃរបស់យើង។ ដោយសារតែការអាន គឺវាផ្តល់នូវចំណេះដឹង។ ហើយចំណេះដឹងរបស់យើងក៏កាន់តែទូលំទូលាយ។ អ៊ីចឹងខ្ញុំ ជឿជាក់ថា នៅពេលយើងមានចំណេះដឹងកាន់តែទូលំទូលាយ វានឹងផ្តល់ជាផ្លែផ្កាមក ឱ្យ ជីវិតយើងដូចគ្នា។ ជាក់ស្តែងខ្ញុំមានថ្ងៃនេះ ក៏មានចំណែកខ្លាំងមែនទែន ពីការអានដូចគ្នា »។

 

ក្រៅពីលើកទឹកឱ្យបង្កើតទម្លាប់អាន ម្ចាស់ជ័យលាភីលេខ១ ពីកម្មវិធី «សំណេរអង្គរ» នេះ ក៏លើកទឹកចិត្តអ្នកដែលមានឧបនិស្ស័យតែងនិពន្ធ កុំរារែកនឹងការចាប់ផ្តើមការតែងនិពន្ធ របស់ខ្លួន។ អ្វីដែលសំខាន់ គឺចាប់ផ្តើមនិពន្ធ ដោយគោរពក្រមសីលធម៌ វិជ្ជាជីវៈ កុំលួចគំនិត ឬស្នាដៃអ្នកដទៃ៕