ជាតិ
នយោបាយជាតិ
CPP គិតគូររឿងជនអន្តោប្រវេសន៍វៀតណាម, CNRP ព្រួយបារម្ភរឿងវៀតណាមឈ្លានពានព្រំដែន
×
ភ្នំពេញ៖ ក្នុងរយៈពេលប៉ុន្មានខែចុងក្រោយនេះ គេសង្កេតឃើញថា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានធ្វើការបោសសម្អាតជនអន្តោប្រវេសន៍ខុសច្បាប់ចេញពីប្រទេសកម្ពុជាជាបន្តបន្ទាប់ ក្នុងនោះ មានជនអន្តោប្រវេសន៍ចិនខុសច្បាប់ និងជនអន្តោប្រវេសន៍វៀតណាមខុសច្បាប់។ ក្នុងខណៈពេលដែលគណបក្សកាន់អំណាចយកចិត្តទុកដាក់ ជាពិសេស ចំពោះជនអន្តោប្រវេសន៍វៀតណាមខុសច្បាប់នោះ គណបក្សសង្គ្រោះជាតិរំលេចបញ្ហាព្រំដែនដែលឈ្លានពានដោយប្រទេសវៀតណាម។
លោក កែម ឡី អ្នកវិភាគសង្គមនយោបាយឯករាជ្យនៅក្នុងប្រទេសកម្ពុជាមិនទាន់ហ៊ានអត្ថាធិប្បាយចំៗថា យុទ្ធសាស្ត្ររបស់គណបក្សប្រជាជនកម្ពុជារឿងដេញអន្តោប្រវេសន៍ខុសច្បាប់ចេញពីប្រទេសកម្ពុជា ជាបំណងឆន្ទៈពិតប្រាកដ ដែលចង់រៀបចំប្រទេសអោយមានច្បាប់ឡើងវិញ ឬជាយុទ្ធសាស្ដ្រដើម្បីកេងផលចំណេញផ្នែកនយោបាយ។
លោក កែម ឡី បានបន្តទៀតថា រឿងជនអន្តោប្រវេស៍វៀតណាមខុសច្បាប់នៅកម្ពុជា ជារឿងរសើប ដូច្នេះ ប្រសិនបើគណបក្សប្រជាជនកម្ពុជា មិនដោះស្រាយទេ វាអាចមានការលំបាកសម្រាប់ទាក់ទាញប្រជាប្រិយភាពនាពេលអនាគត។
«មេដឹកនាំគណបក្សប្រជាជនកម្ពុជាមួយចំនួនចង់ដោះស្រាយរឿងជនអន្តោប្រវេសន៍វៀតណាមខុសច្បាប់មែនទែន។ តែប្រជាជនខ្មែរអស់ជំនឿលើសកម្មភាពគណបក្សប្រជាជនកម្ពុជា»។ នេះគឺជាការទោះទាយរបស់លោក កែម ឡី។
ទោះបីជាលោក ឡី អត្ថាធិប្បាយយ៉ាងដូច្នេះមែន តែលោកនៅតែមានក្តីបារម្ភថា ទង្វើរបស់គណបក្សប្រជាជនកម្ពុជាដោះស្រាយរឿងជនអន្តោប្រវេសន៍វៀតណាមខុសច្បាប់នេះគឺជាល្បែងនយោបាយច្រើនជាងឆន្ទៈពិតប្រាកដ។
ងាកមកសកម្មភាពគណបក្សសង្គ្រោះជាតិដែលរុញច្រានរឿងព្រំដែនវិញ លោក កែម ឡី សន្និដ្ឋានថា វាជារឿងល្បែងនយោបាយច្រើនជាងរឿងឆន្ទៈពិតប្រាកដ ពីព្រោះ នេះគឺជារឿងចាស់យូរណាស់មកហើយ។ «បើតាមខ្ញុំយល់ គណបក្សសង្គ្រោះជាតិអស់សារនយោបាយ។ និយាយរឿងគ្រួសារនិយម ខ្លួនឯងគ្រួសារនិយមដូចគេដែរ។ និយាយរឿងពុករលួយ ខ្លួនឯងពុករលួយដូចគេដែរ។ គណបក្សសង្គ្រោះជាតិទាល់ច្រក ដូច្នេះ គណបក្សត្រូវយករឿងព្រំដែនមកលេងដើម្បីប្រជាប្រិយភាពគណបក្ស»។ នេះជាការអះអាងរបស់លោក កែម ឡី។
ចំពោះលោក អ៊ូ វីរៈ អ្នកវិភាគនយោបាយឯករាជ្យកម្ពុជាម្នាក់ទៀតវិញ លោកអត្ថាធិប្បាយថា គណបក្សសង្គ្រោះជាតិធ្វើសកម្មភាពរំលេចរឿងព្រំដែននេះ មិនមែនជារឿងថ្មីទេ ពីព្រោះគណបក្សប្រឆាំងតែងតែចោទគណបក្សប្រជាជនថាជា«អាយ៉ងវៀតណាម»។ រឿងដែលថ្មី គឺគណបក្សប្រជាជនកម្ពុជាចាប់ផ្តើមចាប់អារម្មណ៍ខ្លាំងរឿងជនអន្តោប្រវេសន៍វៀតណាមខុសច្បាប់ និងរឿងព្រំដែន។ លោក អ៊ូ វីរៈ បញ្ជាក់ថា៖«គណបក្សប្រជាជនកម្ពុជាចង់កាត់បន្ថយឥទ្ធិពលគណបក្សប្រឆាំងដែលយកល្បែងព្រំដែនមកលេង។ CPP ធ្វើយ៉ាងនេះ អាចជោគជ័យមួយចំនួនដែរ តាមរយៈ ការបង្ហាញឆន្ទៈដោះស្រាយរឿងជនអន្តោប្រវេសន៍វៀតណាមខុសច្បាប់ និងប្រតិកម្មប្រឆាំងនឹងការឈ្លានរបស់វៀតណាម»៕
© រក្សាសិទ្ធិដោយ thmeythmey.com