ជាតិ
នយោបាយជាតិ
×![]()
ដោយ: ថ្មីៗ
គណបក្សប្រជាជនកម្ពុជា គណបក្សសង្គ្រោះជាតិ និងអង្គការសង្គមស៊ីវិល សុទ្ធតែសោកស្តាយយ៉ាងខ្លាំង ចំពោះអំពើឃាតកម្មដែលកើតឡើងលើអ្នកវិភាគសង្គម និងនយោបាយដ៏ល្បី។ មន្ត្រីបក្សទាំងនោះ សុទ្ធតែថ្កោលទោសនូវអំពើព្រៃផ្សៃនេះ ហើយឲ្យអាជ្ញាធរវែកមុខជនដៃដល់ និងអ្នកនៅពីក្រោយខ្នងយកមកផ្តន្ទាទោសតាមច្បាប់ឲ្យបាន។
លោក សុខ ឥសាន អ្នកនាំពាក្យគណបក្សប្រជាជនកម្ពុជា៖ ជាយោបល់ខ្ញុំផ្ទាល់ ខ្ញុំមិនចង់ឱ្យមានបាតុភាពដូច្នេះកើតឡើងទេ ជាពិសេសនៅពេលដែលកម្ពុជាយើងកំពុងតែគ្របដណ្តប់ដោយសន្តិភាព។ លោកបណ្ឌិត កែម ឡី គឺជាដៃគូសន្ទនារបស់ខ្ញុំម្នាក់ នៅតាមបណ្តាញសារព័ត៌មាន។ នៅពេលមានហេតុការណ៍ដូច្នេះ ខ្ញុំសូមសម្តែងការសោកស្តាយយ៉ាងខ្លាំង សូមវិញ្ញាណក្ខន្ធលោក កែម ឡី ទៅកាន់សុខគតិភព។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី៖ ឃាតកម្មលើលោក កែម ឡី ជាអំពើ ព្រៃផ្សៃ ថោកទាប។ ទី២ ខ្ញុំសូមអំពាវនាវដល់សារព័ត៌មាន និងពលរដ្ឋ ចូលរួមសហការជាមួយសមត្ថកិច្ច ដើម្បីស្វែងរកមូលហេតុនៃឃាតកម្មនេះ។ ៣ លោក កែម ឡី ជាដៃគូពិភាក្សាជាមួយខ្ញុំ ខ្ញុំគោរពសេចក្តីក្លាហានរបស់គាត់។ ការបាត់បង់លោក កែម ឡី គឺជាការបាត់បង់ធនធានដ៏ល្អរបស់កម្ពុជា
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិដែលកំពុងតែបំពេញការងារនៅខេត្តបន្ទាយមានជ័យជាមួយលោក យ៉ែម បុញ្ញឫទ្ធិ ៖ ពេលខ្ញុំឮដំណឹងនេះ ខ្ញុំរន្ធត់ចិត្តយ៉ាងខ្លាំង មិននឹកស្មានថា ឃាតកម្មបែបនេះ កើតលើអ្នកវិភាគនៅកណ្តាលទីក្រុងបែបនេះ ដែលប្រទេសកម្ពុជាយើងប៉ុន្មានឆ្នាំមកនេះ មិនដែលកើតមានឡើយ។ យើងថ្កោលទោសចំពោះអំពើឃាតកម្មដ៏ថោកទាបនេះ ។ យើងសូមអាជ្ញាធរ ចាប់ជនដៃដល់ និងអ្នកនៅពីក្រោយខ្នងមកផ្តន្ទាទោសឲ្យបាន និងកុំឲ្យមានករណីបែបនេះកើតឡើងនៅកម្ពុជាទៀត។
លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការលីកាដូ៖ យើងសូមថ្កោលទោសយ៉ាងដាច់អហង្ការ ចំពោះការបាញ់សម្លាប់លោក កែម ឡី ដែលជាអ្នកចេះដឹងរបស់ខ្មែរ។ យើងសូមឲ្យសមត្ថកិច្ច រកឃាតកពិតប្រាកដឲ្យឃើញ យកមកផ្តន្ទាទោស។ ការសម្លាប់ លោក កែម ឡី ក្នុងកាលៈទេសៈនេះ ធ្វើឲ្យស្ថានភាពកម្ពុជារឹតតែតានតឹង។ ចង់ ឬមិនចង់ វានឹងមានការរិះគន់ច្រើនចំពោះការស្លាប់របស់គាត់។ យើងសោកស្តាយ ខ្លាំងណាស់។ លោក កែម ឡី គឺជាអ្នចេះដឹង ហើយគាត់ជួយខ្មែរយើងច្រើនណាស់។ យើងពិបាករកមែនទែន មនុស្សដូចគាត់។
Tag:
កែម ឡី
អេង ឆៃអ៊ាង
សុខ ឥសាន
ផៃ ស៊ីផាន
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ម៉ោង
