ជាតិ
មេធាវី ដាក់លិខិតសុំឲ្យដោះលែងលោក គឹម សុខ ដែលជាប់ឃុំព្រោះបណ្តឹងសម្តេច ហ៊ុន សែន
× ភ្នំពេញ៖ ក្រោយទទួលសិទ្ធិធ្វើជាមេធាវីការពារក្តីឲ្យ គឹម សុខ អ្នកវិភាគនយោបាយ ដែលកំពុងជាប់ពន្ធនាគារ លោក ជូង ជូងី ក៏ប្រញាប់ប្រញាល់ដាក់លិខិតទៅកាន់តុលាការ ដើម្បីសុំឲ្យដោះលែងកូនក្តីរបស់ខ្លួន។ លោក គឹម សុខ បានជាប់ឃុំនៅពន្ធនាគារកាលពីថ្ងៃទី១៧ កុម្ភៈ ទាក់ទងនឹងបណ្ដឹងរបស់សម្តេច ហ៊ុន សែន ។
លោកមេធាវី ជូង ជូងី ប្រាប់សារព័ត៌មានថ្មីៗថា លោក បានដាក់លិខិតទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញរួចហើយ នៅព្រឹកថ្ងៃសុក្រនេះ ដើម្បីសុំឲ្យដោះលែងលោក គឹម សុខ អ្នកវិភាគនយោបាយ ដែលកំពុងជាប់ពន្ធនាគារ ដោយសារតែបណ្តឹងរបស់សម្តេច ហ៊ុន សែន នាយករដ្ឋមន្ត្រីកម្ពុជា។
លោក ជូង ជូងី មិនអាចសន្និដ្ឋានបានទេថា ការដាក់លិខិតសុំឲ្យកូនក្តីរស់នៅក្រៅឃុំ នឹងទទួលបានចម្លើយវិជ្ជមាន ឬយ៉ាងណានោះ។ លោក ជូង ជូងី គ្រាន់តែនិយាយថា ក្នុងនាមជាមេធាវី លោក ត្រូវតែខិតខំឲ្យអស់លទ្ធភាព ដើម្បីការពារកូនក្តី។ លោកមេធាវី ដែលឧស្សាហ៍កាន់សំណុំរឿងផ្នែកនយោបាយរូបនេះ បានបញ្ជាក់ដូច្នេះថា៖«ខ្ញុំត្រូវតវ៉ាគ្រប់នីតិវិធី ដើម្បីជួយកូនក្តីរបស់ខ្ញុំ ទៅតាមផ្លូវច្បាប់»។
ជានីតិវិធី បន្ទាប់ពីទទួលបានលិខិតសុំនៅក្រៅឃុំពីសំណាក់មេធាវីរួចហើយ ចៅក្រមស៊ើបសួរ មានរយៈពេលប្រាំថ្ងៃ ដើម្បីសម្រេចថា ដោះលែងឬមិនដោះលែង។ នេះជាការពន្យល់របស់លោក ជូង ជូងី ដដែល។
លោក គី តិច មេធាវីរបស់សម្តេច ហ៊ុន សែន ធ្លាប់លើកឡើងថា ការសម្រេចចិត្តដាក់ពាក្យប្តឹង គឺដោយសារតែលោក គឹម សុខ បានចោទថាគណបក្សប្រជាជនកម្ពុជា សម្លាប់លោក កែម ឡី។ ក្រោយទទួលបណ្តឹងរបស់លោកមេធាវី គី តិចហើយ តុលាការ ក៏ចេញដីកាឲ្យលោក គឹម សុខ ចូលបំភ្លឺ។ នៅថ្ងៃទី១៧ ខែកុម្ភៈ ឆ្នាំ២០១៧ លោក គឹម សុខ ក៏ចូលបំភ្លឺតាមដីការបស់តុលាការ។ ក្រោយសាកសួររួចហើយ ចៅក្រមស៊ើបសួរ ក៏សម្រេចយកលោក គឹម សុខ ទៅឃុំជាបណ្តោះអាសន្ននៅពន្ធនាគារព្រៃស ក្រោមបទចោទ «បរិហារកេរ្តិ៍ជាសាធារណៈ» និង បទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។ ក្នុងបណ្តឹងខាងលើ សម្តេច ហ៊ុន សែន បានទារសំណងជំងឺចិត្ត ពីលោក គឹម សុខ រហូតដល់ទៅ ៥០ម៉ឺនដុល្លារឯណោះ។
លោក គឹម សុខ នៅរងបណ្តឹងរបស់សម្តេច ហ៊ុន សែន មួយផ្សេងទៀត។ បណ្តឹងលើកទីពីរនេះ សម្តេច ហ៊ុន សែន ទារសំណងជំងឺចិត្តពីលោក គឹម សុខ តែ២៥០០ដុល្លារ ប៉ុណ្ណោះ។ អង្គហេតុ ដែលនាំឲ្យលោក គឹម សុខ រងបណ្តឹងជាលើកទីពីរ គឺដោយសារតែលោក និយាយថា ប្រព័ន្ធមួយ ដែលស្ថិតនៅក្រោមរដ្ឋាភិបាលបច្ចុប្បន្ន មានការសម្លាប់មនុស្ស ហើយរកមុខឃាតកមិនឃើញ៕
Tag:
គឹម សុខ
ជូង ជូងី
ហ៊ុន សែន
© រក្សាសិទ្ធិដោយ thmeythmey.com