ជាតិ
អ្នកបើកបរស្រវឹងដែលមានអត្រាជាតិអាល់កុលចាប់ពី ០,៤០មីលីក្រោម ត្រូវរងពិន័យ
× ភ្នំពេញ៖ អ្នកបើកបរស្រវឹងមានអត្រាជាតិអាល់កុលចាប់ពី ០,៤០ (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី ០,៨០ (សូន្យក្បៀសប៉ែតសិប) ក្នុងមួយលីត្រឈាមឡើងទៅ ត្រូវរងពិន័យប្រាក់ចំនួនពី ២សែនដល់ ៨សែនរៀល។ នេះបើតាមមាត្រា១១ នៃអនុក្រឹត្យស្តីពី ការពិន័យអន្តរការណ៍ចំពោះអំពើល្មើសនឹងច្បាប់ស្តីពី ចរាចរណ៍ផ្លូវគោក។
តាមអនុក្រឹត្យស្តីពីការពិន័យអន្តរការណ៍ថ្មី រដ្ឋាភិបាលបានបង្គាប់សមត្ថកិច្ចអនុវត្តច្បាប់ឲ្យពិន័យចំពោះអ្នកបើកបរទោចក្រយានយន្ត ឬទោចក្រយានយន្តសណ្តោងរ៉ឺម៉ក ឬត្រីចក្រយានយន្តទឹកប្រាក់ចំនួន ២០០ ០០០ (ពីរសែន)រៀល, អ្នកបើកបរយានយន្តធុនស្រាលចំនួន ៤០០ ០០០ (បួនសែន) រៀល និងអ្នកបើកបរយានយន្តធុនធ្ងន់ចំនួន ៨០០ ០០០ (ប្រាំបីសែន) រៀល។
មាត្រា១១ នៃអនុក្រឹត្យនេះបានចែងបញ្ជាក់ទៀតថា អ្នកបើកបរយានយន្តដែលបើកបរស្ថិតក្នុងភាពស្រវឹង មានអត្រាជាតិអាល់កុលដូចចំនួនខាងលើ ត្រូវបញ្ឈប់មិនឲ្យបើកបរយានយន្តរហូតដល់អត្រាជាតិអាល់ កុលចុះក្រោម ០,២៥ (សូន្យក្បៀសម្ភៃប្រាំ) មីលីក្រាមក្នុងមួយលីត្រខ្យល់ ឬក្រោម ០,៥ (សូន្យក្បៀស ប្រាំ) ក្រាម ក្នុងមួយលីត្រឈាម។
«ក្នុងករណីដែលជនល្មើសធ្លាប់ទទួលរងនូវការពិន័យអន្តរការណ៍លើកមុន ត្រូវកសាងសំណុំរឿង បញ្ជូនទៅកាន់អយ្យការអមសាលាដំបូង»។ អនុក្រឹត្យ ស្តីពីការពិន័យអន្តរការណ៍ថ្មី ចែងបញ្ជាក់។
តាមអនុក្រឹត្យចុះនៅថ្ងៃទី២១ មីនានេះ ឪពុកម្តាយ ឬអាណាព្យាបាល ត្រូវបង់ប្រាក់ពិន័យអន្តរការណ៍ ប្រសិនបើអនីតិជនមានអាយុ ក្រោម ១៥ឆ្នាំ បានប្រព្រឹត្តល្មើសនឹងអនុក្រឹត្យ។ តាមអនុក្រឹត្យដដែល បុគ្គលដែលមិនសុខចិត្តនឹងសេចក្តីសម្រេចរបស់មន្ត្រីមានសមត្ថកិច្ចពេលអនុវត្តច្បាប់ មានសិទ្ធិប្តឹងតវ៉ាទៅប្រធានអង្គភាពដែលគ្រប់គ្រងមន្ត្រីអនុវត្តនោះផ្ទាល់នៅទូទាំងប្រទេស ក្នុងរយៈពេល ៣០ថ្ងៃយ៉ាងយូរ គិតពីថ្ងៃទទួលបង្កាន់ដៃពិន័យអន្តរការណ៍៕
Tag:
ច្បាប់
ចរាចរណ៍
មហាផ្ទៃ
សាធារណការ
© រក្សាសិទ្ធិដោយ thmeythmey.com