អន្តរជាតិ
វៀតណាមនឹងប្លុកគណនីហ្វេសប៊ុកដែលលក់ផលិតផលអនឡាញ មិនបង់លុយពន្ធឲ្យរដ្ឋ
× អាជ្ញាធរវៀតណាមនឹងសហការជាមួយក្រុមហ៊ុនហ្វេសប៊ុកដើម្បីហាមឃាត់ (ប្លុក) គណនីហ្វេសប៊ុកដែលមានម្ចាស់ជាអ្នកជួញដូរផលិតផលតាមអនឡាញ ហើយមិនព្រមបង់ពន្ធជូនរដ្ឋ។ អាជ្ញាធរពន្ធវៀតណាមបានអះអាងថា បើសិនជាអនុវត្តវិធានការនេះត្រឹមត្រូវ វៀតណាមអាចរកលុយពីពន្ធលើការលក់ផលិតផលតាមហ្វេសប៊ុកច្រើនជាង ៤៤០០ដុល្លារឯណោះ។
វៀតណាមនឹងចាប់ផ្តើមអនុវត្តវិធានការតឹងរ៉ឹងលើអ្នកធ្វើអាជីវកម្មអនឡាញ បើសិនជាពួកគេនៅតែបដិសេធបង់លុយពន្ធជូនរដ្ឋ។ វៀតណាមនឹងសហការជាមួយក្រុមហ៊ុនហ្វេសប៊ុកផងដែរដើម្បីហាមឃាត់ដំណើរការរាល់គណនីហ្វេសប៊ុកដែលលក់ផលិតផលទាំងនោះ។ នេះបើតាមការចុះផ្សាយរបស់សារព័ត៌មានវៀតណាម Tuoi Tre។
អគ្គនាយកដ្ឋានពន្ធដាវៀតណាម បានចេញបញ្ជាឲ្យភ្នាក់ងារពាក់ព័ន្ធក្រោមឱវាទរបស់ខ្លួនទូទាំងប្រទេសឲ្យអនុវត្តតាមបទបញ្ជាតឹងរ៉ឹងនេះដើម្បីដាក់សម្ពាធឲ្យអ្នកលក់ផលិតផលអនឡាញបង់លុយជូនរដ្ឋ។ ស្ថាប័ននេះអះអាងថា បើសិនជាអនុវត្តបានពេញលេញ គេអាចទាញចំណូលពីពន្ធលើអ្នកលក់ផលិតផលតាមអនឡាញបានយ៉ាងតិច ១០០លានដុងឬស្មើ ៤៤០០ដុល្លារអាមេរិកផងដែរ។
សារព័ត៌មាន Tuoi Tre បានស្រង់សម្តីមន្ត្រីពន្ធដាម្នាក់ដែលមិនបានបង្ហាញអត្តសញ្ញាណថា៖ «យើងមិនចង់អនុវត្តវិធានការបែបនេះទេ ប៉ុន្តែយើងមិនអាចបណ្តែតបណ្តោយឲ្យគេលក់ផលិតផលបានយ៉ាងស្រួលដោយមិនបង់លុយចូលរដ្ឋដែរ»។
កន្លងមកស្ថាប័នពន្ធដាវៀតណាមប្រចាំក្រុងហាណូយ បានផ្ញើលិខិតទៅកាន់ម្ចាស់គណនីហ្វេសប៊ុកប្រហែល ១៣៥០០ដែលមានម្ចាស់ជាអ្នកលក់ដូរផលិតផលតាមអនឡាញសកម្មជាងគេ។ បើតាមសារព័ត៌មានក្នុងស្រុកវៀតណាមមួយចំនួន គណនីហ្វេសប៊ុកសរុប ១៧០០០ ឯណោះមានជាប់ពាក់ព័ន្ធសកម្មភាពធ្វើពាណិជ្ជកម្មតាមហ្វេសប៊ុកនេះ។
សូមបញ្ជាក់ថា នៅត្រឹមខែកុម្ភៈឆ្នាំ ២០១៦ វៀតណាមមានប្រជាជន ៣៥លាននាក់ដែលប្រើប្រាស់ប្រព័ន្ធទំនាក់ទំនងសង្គមហ្វេសប៊ុក ដែលវាស្មើមួយភាគបីនៃប្រជាជនសរុប។ ក្រុងហ៊ុនហ្វេសប៊ុកក៏ទទួលស្គាល់ផងដែរថា ប្រព័ន្ធទំនាក់ទំនងសង្គមហ្វេសប៊ុកនេះពេញនិយមជាងគេបំផុតនៅវៀតណាម ហើយប្រជាជនវៀតណាមភាគតិចណាស់ដែលប្រើប្រាស់បណ្តាញសង្គមផ្សេងទៀតក្រៅពីហ្វេសប៊ុក។
Tag:
វៀតណាម
ហ្វេសប៊ុក
© រក្សាសិទ្ធិដោយ thmeythmey.com