អន្តរជាតិ
នយោបាយអន្តរជាតិ
ពូទីន បញ្ជាឲ្យមន្ត្រីទូតអាមេរិក៧៥៥នាក់ចាកចេញពីរុស្ស៊ី ជាការឆ្លើយតបទណ្ឌកម្មរបស់អាមេរិក ប្រធានាធិបតី វ្ល៉ាឌីមៀ ពូទីន ជជែកជាមួយរដ្ឋមន្ត្រីការពារជាតិ Sergei Shoigu នាឱកាសព្យុហយាត្រាកងទ័ពក្នុងទីក្រុង St Petersburg (រូបភាពពីគេហទំព័រប្រធានាធិបតីរុស្ស៊ី)
× ប្រធានាធិបតីរុស្ស៊ី វ្ល៉ាឌីមៀ ពូទីន បានប្រាប់ឲ្យអាមេរិកកាត់បន្ថយមន្ត្រីទូត និងបុគ្គលិកទូតចំនួន ៧៥៥នាក់ នៅត្រឹមថ្ងៃទី១ ខែកញ្ញាខាងមុខ។ បើតាមលោក ពូទីន នេះគឺជាវិធានការឆ្លើយតបនឹងទណ្ឌកម្មថ្មីដែលសភាអាមេរិកទើបអនុម័តកាលពីសប្ដាហ៍មុន និងកំពុងស្ថិតនៅសេតវិមាន។ មិនត្រឹមតែបណ្ដេញមន្ត្រីទូតអាមេរិករាប់រយនាក់ឡើយ រុស្ស៊ីក៏គំរាមចាត់វិធានផ្សេងទៀតប្រឆាំងអាមេរិក បើប្រធានាធិបតី ដូណាល់ ត្រាំ ចុះហត្ថលេខាឲ្យអនុវត្តទណ្ឌកម្មនោះ។
ក្ដីសង្ឃឹមរបស់លោក ដូណាល់ ត្រាំ ក្នុងពង្រឹងទំនាក់ទំនងជាមួយរុស្ស៊ី ហាក់រសាត់កាន់តែឆ្ងាយទៅហើយ។ បន្ទាប់ពីសភាទាំងពីររបស់អាមេរិកអនុម័តទណ្ឌកម្មថ្មីមក រុស្ស៊ីឯណោះក៏ប្រកាសត្រៀមខ្លួនមានចំណាត់ការតបតវិញ ដោយចាត់ទុកទណ្ឌកម្មថ្មីនេះជារឿងមិនអាចទទួលយកបាន ហើយរុស្ស៊ីក៏អស់ការអត់ទ្រាំនឹងអាមេរិកទៀតដែរ។ ពេលនេះ លោក ត្រាំ កំពុងស្ថិតក្នុងស្ថានភាពលំបាកសម្រេចចិត្តយ៉ាងខ្លាំង។
អាចថាជាវិធានការដំបូង ប្រធានាធិបតីរុស្ស៊ី វ្ល៉ាឌីមៀ ពូទីន បានណែនាំឲ្យអាមេរិកមន្ត្រីទូត និងបុគ្គលិកស្ថានទូតអាមេរិកច្រើនជាង ៧៥០នាក់ចាកចេញពីរុស្ស៊ីនៅខែកញ្ញាខាងមុខ។ ក្នុងកិច្ចសម្ភាសជាមួយទូរទស្សន៍រុស្ស៊ីដែលផ្សាយនៅថ្ងៃទី៣០ ខែកក្កដា លោក ពូទីន និយាយថា ការអនុម័តរបស់សភាអាមេរិក បានប៉ះពាល់ទំនាក់ទំនងរវាងរុស្ស៊ី និងអាមេរិក ព្រោះជារឿងមិនត្រឹមត្រូវ និងជាការប៉ុនប៉ងរបស់អាមេរិកក្នុងការដាក់សម្ពាធលើប្រទេសដែលមានទំនាក់ទំនងល្អជាមួយរុស្ស៊ី។
បើតាមសារព័ត៌មាន RT លោក ពូទីន ក៏បានបង្ហាញអារម្មណ៍ខកចិត្តចំពោះអាមេរិកដែរ ព្រោះរុស្ស៊ីបានរង់ចាំសកម្មភាពរបស់អាមេរិកដែលនាំឲ្យទំនាក់ទំនងទ្វេភាគីល្អប្រសើរ ប៉ុន្តែអ្វីៗហាក់ដូចជាមិនមានការផ្លាស់ប្ដូរក្នុងពេលឆាប់ៗនេះឡើយ។ លោក ពូទីន សង្កត់ធ្ងន់ថា ពេលនេះគួរដល់ពេលដែលរុស្ស៊ីត្រូវតបតវិញម្ដង ព្រោះរុស្ស៊ីនៅស្ងៀមស្ងាត់អស់ពេលយូរណាស់មកហើយដែរ ទាំងរុស្ស៊ីមិនបានធ្វើអ្វីសោះដាក់អាមេរិក។
ចំនួនមន្ត្រីទូត និងមន្ត្រីបច្ចេកទេសនានាដែលបម្រើការក្នុងស្ថានទូតអាមេរិកក្នុងរដ្ឋធានីមូស្គូ នឹងត្រូវកាត់បន្ថយឲ្យនៅស្មើចំនួនបុគ្គលិកទូតរុស្ស៊ីប្រចាំរដ្ឋធានីវ៉ាស៊ីនតោន ព្រោះកន្លងមកចំនួនមន្ត្រីអាមេរិកមានច្រើនខ្លាំងពេក ពោលគឺមានច្រើនជាង១២០០នាក់ឯណោះ។ ក្រសួងការបរទេសរុស្ស៊ីក៏បានប្រកាសដែរថា រុស្ស៊ី និងអាមេរិក ឯកភាពកាត់បន្ថយចំនួនបុគ្គលិកស្ថានទូតប្រទេសទាំងពីរឲ្យនៅត្រឹម៤៥៥នាក់ប៉ុណ្ណោះ។
យ៉ាងណាក្ដី លោក ពូទីន នៅតែមានសុទិដ្ឋិនិយមថា ទំនាក់ទំនងរុស្ស៊ី និងអាមេរិក នឹងល្អប្រសើរនៅពេលខាងមុខ ព្រោះប្រទេសទាំងពីរមានបញ្ហាត្រូវដោះស្រាយរួមគ្នាដូចជាការប្រយុទ្ធប្រឆាំងភេរវកម្ម ការគ្រប់គ្រងអាវុធនុយក្លេអ៊ែរ និងគម្រោងអវកាសជាដើម។ លោកសង្ឃឹមថាកិច្ចសហប្រតិបត្តិការរវាងប្រទេសទាំងពីរលើវិស័យទាំងនេះនឹងមិនប៉ះពាល់ដោយសារគោលនយោបាយប្រឆាំងរុស្ស៊ីរបស់អាមេរិកឡើយ៕
© រក្សាសិទ្ធិដោយ thmeythmey.com