អន្តរជាតិ
នយោបាយអន្តរជាតិ
Facebook ចាត់តាំងក្រុមពិសេសជួយឥណ្ឌូណេស៊ីទប់ទល់ព័ត៌មានបន្លំ មុនពេលបោះឆ្នោត
×
ក្រុមហ៊ុនបណ្តាញសង្គម Facebook បានបង្កើតក្រុមពិសេសមួយនៅឥណ្ឌូណេស៊ីដើម្បីជួយការពារ និងគ្រប់គ្រងការចែករំលែកព័ត៌មានក្លែងក្លាយ ខណៈការបោះឆ្នោតប្រធានាធិបតីនឹងត្រូវធ្វើឡើងក្នុងរយៈពេលពីរឆ្នាំខាងមុខនេះ ។ ផែនការចាត់តាំងនេះ ធ្វើឡើងក្រោមសំណើរបស់រដ្ឋាភិបាលក្រុងហ្សាការតា ។
ការចែករំលែកព័ត៌មានក្លែងក្លាយតាមបណ្តាញសង្គម ជាពិសេស តាមរយៈហ្វេសប៊ុក បានក្លាយជាក្តីបារម្ភមួយរបស់រដ្ឋាភិបាលឥណ្ឌូណេស៊ី ដែលកំពុងតែដឹកនាំដោយលោកប្រធានាធិបតី ចូកូ វីដូដូ ។ ក្តីបារម្ភនេះ ត្រូវបានរំពឹងថា នឹងប៉ះពាល់ធ្ងន់ធ្ងរផងដែរសម្រាប់ការបោះឆ្នោតប្រធានាធិបតីឥណ្ឌូណេស៊ី ដែលនឹងប្រព្រឹត្តទៅនៅឆ្នាំ២០១៩ ។
ដើម្បីឆ្លើយតបនឹងបញ្ហាប្រឈមក្នុងយុគសម័យបច្ចេកវិទ្យានេះ រដ្ឋាភិបាលក្រុងហ្សាការតា នាពេលថ្មីនេះ បានសហការជាមួយនឹងក្រុមហ៊ុន Facebook ដើម្បីទប់ស្កាត់ការចែករំលែកព័ត៌មាន បំភាន់ ឬក្លែងក្លាយតាមរយៈការបង្កើតក្រុមការងារពិសេសរបស់ក្រុមហ៊ុនបណ្តាញសង្គមយក្សមួយនេះនៅក្នុងប្រទេសដែលមានប្រជាជនកាន់សាសនាឥស្លាមច្រើនបំផុតរបស់ពិភពកលោកនេះតែម្តង ។
តាមការចុះផ្សាយរបស់សារព័ត៌មានឥណ្ឌូណេស៊ី The Jakarta Post នៅថ្ងៃទី០៣ ខែសីហា ក្រសួងព័ត៌មាន និងទំនាក់ទំនងឥណ្ឌូណេស៊ី ក៏បានឲ្យដឹងដែលថា ក្រុមហ៊ុនហ្វេសប៊ុក បានបង្កើតក្រុមពិសេសមួយដើម្បីទប់ទល់នឹងការចែករំលែកព័ត៌មានមិនពិត មុនពេលនៃការបោះឆ្នោតប្រធានាធិបតីឆ្នាំ២០១៩ ។ ក្រសួង ក៏បានជឿជាក់ដែរថា ការចែករំលែកព័ត៌មានមិនពិត អាចផ្ទុះឡើងខ្លាំងនៅមុន និងក្នុងអំឡុងពេលបោះឆ្នោតតែម្តង ។
តាមប្រភពដដែលនោះ ក៏បានបញ្ជាក់ថា យុទ្ធសាស្ត្រដែលនឹងត្រូវអនុវត្តដើម្បីដោះស្រាយបញ្ហានេះគឺ ក្រុមការងារ នឹងបិទចោលរាល់ព័ត៌មានដែលមានខ្លឹមសារមិនល្អ ដែលរាប់បញ្ចូលទាំងរឿងអាសអាភាស និងព័ត៌មានបែបបន្លំ ដែលត្រូវបានរាយការណ៍ដោយ អ្នកប្រើប្រាស់បណ្តាញសង្គមមួយនេះ ។
បន្ថែមពីការសហការជាមួយនឹងក្រុមហ៊ុន Facebook រដ្ឋាភិបាលក្រុងហ្សាការតា ក៏គ្រោងជួបពិភាក្សាជាមួយនឹង ក្រុមហ៊ុន Twitter និង Google ផងដែរ ៕
© រក្សាសិទ្ធិដោយ thmeythmey.com