ជាតិ
នយោបាយជាតិ
លោក ប្រាក់ សុខុន នឹងចូលរួមកិច្ចប្រជុំរដ្ឋមន្ត្រីការបរទេសអាស៊ានពីថ្ងៃទី៥-៨ សីហា
×
លោក ប្រាក់ សុខុន រដ្ឋមន្ត្រីក្រសួងការបរទេស កម្ពុជា នឹងទៅចូលរួមកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ រយៈពេល៤ថ្ងៃ ពីថ្ងៃទី៥ ដល់ថ្ងៃទី៨ ខែសីហា នៅក្រុងម៉ានីល ប្រទេសហ្វីលីពីន។ ក្រៅពីចូលរួមកិច្ចប្រជុំ លោករដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសអាស៊ានដទៃទៀត នឹងជួបសម្តែងការគួរសមជាមួយប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ។ លោក ប្រាក់ សុខុន ក៏នឹងជួបពិភាក្សាទ្វេភាគីជាមួយ រដ្ឋមន្ត្រីការបរទេស និងប្រមុខគណៈប្រតិភូនៃប្រទេសមួយចំនួនទៀតដែរ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
កិច្ចប្រជុំរដ្ឋមន្ត្រីការបរទេសអាស៊ានលើកទី៥០ និងកិច្ចប្រជុំពាក់ព័ន្ធ នឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី៨ ខែសីហា នៅក្រុងម៉ានីល ប្រទេសហ្វីលីពីន។ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងដឹកនាំប្រតិភូទៅចូលរួមកិច្ចប្រជុំនេះ។
សេចក្តីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា កិច្ចប្រជុំទាំងនោះរួមមាន កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ។ ជំនួបរវាងរដ្ឋមន្ត្រីការបរទេសអាស៊ាន ជាមួយតំណាងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស។ កិច្ចប្រជុំរដ្ឋមន្ត្រីការបរទេសអាស៊ានលើកទី៥០។ សន្និសីទក្រោយកិច្ចប្រជុំរដ្ឋមន្ត្រីការបរទេស។ កិច្ចប្រជុំរដ្ឋមន្ត្រីការបរទេសអាស៊ានបូកបី លើកទី១៨។ កិច្ចប្រជុំរដ្ឋមន្ត្រីការបរទេសនៃកិច្ចប្រជុំកំពូលអាស៊ី-បូព៌ាលើកទី៧ និងវេទិកាតំបន់អាស៊ានលើកទី២៤ និងពិធីអបអរទិវាអាស៊ាន ខួបលើកទី៥០ ។
បើតាមក្រសួងការបរទេសកម្ពុជា កិច្ចប្រជុំរដ្ឋមន្ត្រីការបរទេសអាស៊ានលើកទី៥០ និងកិច្ចប្រជុំពាក់ព័ន្ធ នឹងផ្តោតជាសំខាន់លើការកំណត់របៀបវារៈអាស៊ាន ក្នុងឋានៈជាតួអង្គមួយក្នុងសកលលោក បន្ទាប់បានកកើតឡើង៥ទសវត្សមកហើយនោះ។ ផ្អែកលើភូមិសាស្ត្រនយោបាយ និងដំណើរវិវត្តនៃនិម្មាបនកម្មតំបន់ អាស៊ានបានក្លាយខ្លួនទៅជាតំបន់ ដែលមានការប្រកួតប្រជែងមួយ ក្នុងចំណោមប្រទេសមហាអំណាចសំខាន់ៗ លើផ្នែកសន្និសុខ និងសេដ្ឋកិច្ច។
ក្នុងនាមប្រទេសសម្របសម្រួលទំនាក់ទំនងដៃគូសន្ទនា អាស៊ាន-សាធារណរដ្ឋកូរ៉េ លោក ប្រាក់ សុខុន នឹងធ្វើជាសហប្រធាន កិច្ចប្រជុំរដ្ឋមន្ត្រីការបរទេសបូកសាធារណរដ្ឋកូរ៉េ ជាមួយលោកស្រី កាង ឃ្យ៉ុងវា រដ្ឋមន្ត្រីការបរទេសសាធារណរដ្ឋកូរ៉េ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ក្រៅពីចូលរួមកិច្ចប្រជុំរដ្ឋមន្ត្រីការបរទេស លោក ប្រាក់ សុខុន នឹងចូលរួមកិច្ចប្រជុំពាក់ព័ន្ធដទៃទៀត ដូចជា កិច្ចប្រជុំរដ្ឋមន្ត្រីការបរទេសគំនិតផ្តួចផ្តើមមេគង្គក្រោមលើកទី១០ ។ កិច្ចប្រជុំរដ្ឋមន្ត្រីការបរទេសមេគង្គ-ជប៉ុនលើកទី១០ និងកិច្ចប្រជុំរដ្ឋមន្ត្រីការបរទេស នៃកិច្ចសហប្រតិបត្តិការមេគង្គ-គង្គាលើកទី១០ ។
ក្នុងអំឡុងពេលស្នាក់នៅហ្វីលីពីន លោករដ្ឋមន្ត្រីការបរទេសកម្ពុជា រួមជាមួយរដ្ឋមន្ត្រីការបរទេសអាស៊ានដទៃទៀត និងជួបសម្តែងការគួរសមជាមួយ ប្រធានាធិបតីហ្វីលីពី លោក រ៉ូឌ្រីហ្គោ ឌូតឺតេ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដែលឲ្យដឹងតៀតថា លោក ប្រាក់ សុខុន ក៏នឹងជួបពិភាក្សាទ្វេភាគីជាមួយ រដ្ឋមន្ត្រីការបរទេស និងប្រមុខ គណៈប្រតិភូនៃប្រទេសមួយចំនួនទៀតដែរ៕
Tag:
ប្រាក់ សុខុន
រដ្ឋមន្ត្រីការបរទេស
អាស៊ាន
© រក្សាសិទ្ធិដោយ thmeythmey.com