គម្រោងស្រាវជ្រាវនៅប្រាសាទន្លេស្ងួតជួយអ្នកសិក្សាឲ្យយល់ច្បាស់ពីរចនាសម្ព័ន្ធពេទ្យសម័យព្រះបាទជ័យវរ្ម័នទី៧

បទយកការណ៍ / បទសម្ភាសន៍

គម្រោងស្រាវជ្រាវនៅប្រាសាទន្លេស្ងួតជួយអ្នកសិក្សាឲ្យយល់ច្បាស់ពីរចនាសម្ព័ន្ធពេទ្យសម័យព្រះបាទជ័យវរ្ម័នទី៧

07, Aug 2017 , 9:39 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ អ្នកស្រាវជ្រាវបុរាណវិទ្យានៃអាជ្ញាធរជាតិអប្សរា និងមហាវិទ្យាល័យបច្ចេកវិទ្យា និងវិទ្យាស្ថានស្រាវជ្រាវអាស៊ីអាគ្នេយ៍នៃប្រទេសសិង្ហបុរី កំពុងសិក្សារួមគ្នាលើគម្រោងស្រាវជ្រាវអំពីមន្ទីរពេទ្យក្នុងរាជ្យព្រះបាទជ័យវរ្ម័នទី៧។ អ្នកស្រាវជ្រាវ បានយកប្រាសាទទន្លេស្ងួត ដែលជាមន្ទីរពេទ្យមួយកសាងដោយព្រះបាទជ័យវរ្ម័នទី៧ យកមកសិក្សាស្វែងយល់។ ក្នុងគម្រោងនេះ វានឹងបើកផ្លូវឲ្យអ្នកស្រាវជ្រាវ ដឹងកាន់តែច្បាស់ពីរចនាសម្ព័ន្ធ ការព្យាបាល ក៏ដូចជាការផលិតថ្នាំ ដើម្បីព្យាបាលមនុស្សនៅសម័យបុរាណ។

គម្រោងសិក្សាស្រាវជ្រាវនេះ ចាប់ផ្តើមពីថ្ងៃទី២៨ កក្កដា ដល់ថ្ងៃទី១១ សីហា ឆ្នាំ២០១៧។ អ្នកស្រាវជ្រាវបានបើករណ្តៅកំណាយចំនួន៦ទីតាំងផ្សេងគ្នា ដោយផ្នែកខាងកើតចំនួន៤កន្លែង និងខាងលិច ២កន្លែង នៃប្រាសាទទន្លេស្ងួត។ តាមប្រធានគម្រោងនៃអាជ្ញាធរជាតិអប្សរា ការធ្វើកំណាយខាងកើត គឺដើម្បីស្វែងយល់ពីទំនាក់ទំនងរវាងផ្លូវបុរាណ ដែលចេញពីជើងក្រុងអង្គរធំឆ្ពោះទៅខាងជើង និងទំនាក់ទំនងផ្លូវនឹងមន្ទីរពេទ្យ និងខាងលិច ដើម្បីដឹងពីការផលិតថ្នាំ និងការព្យាបាលរោគជាដើម។

តាមការបញ្ជាក់របស់លោកបណ្ឌិត អ៊ា ដារិទ្ធ នៅទីតាំងខាងលើនេះធ្លាប់បានធ្វើកំណាយម្តងរួចមកហើយកាលពីឆ្នាំ២០០៣ និងបានប្រទះស្នាមសសរឈើ។ ចំណែកគម្រោងនេះ បានបន្តដោយការជីករណ្តៅដែលនៅជាប់នឹងកំណាយចាស់ ដើម្បីរកសសរឈើថាមានប៉ុន្មានឲ្យប្រាកដ។ រហូតមកដល់ពេលនេះ ក្នុងគម្រោងសិក្សានេះ បានប្រទះរូបបដិមាដ៏ធំមួយ ដែលមានកម្ពស់ជិត២ម៉ែត្រកាលពីថ្ងៃទី២៨ និងបន្តឃើញបណ្តែកផ្សេងនៃរូបនោះជាបន្តបន្ទាប់។

គួររម្លឹកថា តាមសិលាចារឹកប្រាសាទព្រះខ័ន ក្នុងរាជ្យព្រះបាទជ័យវរ្ម័នទី៧ ទ្រង់បានកសាងមន្ទីរពេទ្យចំនួន ១០២។ លោកបណ្ឌិត អ៊ា ដារិទ្ធ ពន្យល់ថា រចនាសម្ព័ន្ធនៃមន្ទីរពេទ្យទាំងនោះគឺដូចៗគ្នា ដោយមានស្រះទឹកមួយនៅជ្រុងឦសាន ក្លោងទ្វារនៅខាងកើត បណ្ណាល័យនៅជ្រុងអាគ្នេយ៍ តួប៉មនៅកណ្តាល និងមានកំពែងធ្វើពីថ្មបាយក្រៀមព័ទ្ធជុំវិញ៕

ដើម្បីដឹងច្បាស់ពីព័ត៌មាននេះ សូមស្តាប់សម្ភាសខ្លីរវាងអ្នកសារព័ត៌មានថ្មីៗ និងលោកបណ្ឌិត អ៊ា ដារិទ្ធ បុរាណវិទូ និងជាអ្នកស្រាវជ្រាវនៃមជ្ឍមណ្ឌលអន្តរជាតិស្រាវជ្រាវ និងតម្កល់ឯកសារអង្គរ ដូចតទៅ

**audio2**