ប្រាយុទ្ធ៖ មហាក្សត្រថៃមិនចង់ឃើញប្រជាជនរងទោសព្រោះបំពានច្បាប់ការពារព្រះមហាក្សត្រឡើយ

អន្តរជាតិ

ប្រាយុទ្ធ៖ មហាក្សត្រថៃមិនចង់ឃើញប្រជាជនរងទោសព្រោះបំពានច្បាប់ការពារព្រះមហាក្សត្រឡើយ

17, Aug 2017 , 10:59 pm

រូបភាព

ដោយ:

មហាក្សត្រថៃថ្មីដែលទើបឡើងគ្រងរាជ្យ Maha Vajiralongkorn មិនចង់ឃើញប្រជាជនណាម្នាក់ត្រូវផ្ដន្ទាទោសដោយសារបំពានច្បាប់ការពារជេស្ដាព្រះមហាក្សត្រ(lese majeste law)នោះទេ។ ប៉ុន្តែរបបសឹកថៃអះអាងថា ការការពាររបបរាជានិយមជារឿងចំបាច់បំផុតក្នុងយុទ្ធសាស្ត្រការពារសន្តិសុខជាតិ។

នៅថ្ងៃពុធទី១៧ខែសីហា នាយករដ្ឋមន្ត្រីថៃលោកប្រាយុទ្ធ ចន្ទអូចាបាននិយាយថា ព្រះមហាក្សត្រថៃ Maha Vajiralongkorn រាជ្យទ្រង់មិនចង់ឃើញប្រជាជនណាម្នាក់របស់ទ្រង់ត្រូវទទួលទោសដោយសារល្មើសនឹងច្បាប់ការពារជេស្ដាព្រះមហាក្សត្រ(lese majeste law)ឡើយ។

នៅខាងក្រៅកិច្ចប្រជុំគោលនយោបាយស្ដីពីគម្រោងថវិការជាតិឆ្នាំ២០១៩ លោកនាយករដ្ឋមន្ត្រីថៃរូបនេះបានបន្ថែមទៀតថា៖«ទោះបីជាល្មើសនឹងច្បាប់ជេស្ដាព្រះមហាក្សត្រ ឬចែកចាយអ្វីដែលប្រមាថដល់រាជវង្សក៏ដោយ ព្រះមហាក្សត្រមិនដែលចង់ឃើញប្រជាជនណាម្នាក់ត្រូវផ្ដន្ទាទោសដោយសារច្បាប់នេះទេ។ ម្យ៉ាងវិញទៀត ទោះជាប្រជាជនខ្លះដឹងពីទោសនៃការប្រមាថព្រះមហាក្សត្រក្តី ប៉ុន្តែពួកគេនៅតែបំពាន។ ថ្វីបើជារឿយៗព្រះមហាក្សត្រលើកលែងទោសឲ្យពួកគេក៏ដោយ ប្រជាជនខ្លះនៅតែប្រឹងរំលោភច្បាប់នេះ»។

ទោះបីយ៉ាងនេះក្ដី លោក ប្រាយុទ្ធ ចន្ទអូចា បានបន្តទៀតថា ការការពារកេរ្ដិ៍ឈ្មោះរាជវង្សានុវង្ស និងរបបរាជានិយម ជាយុទ្ធសាស្ដ្រសន្តិសុខជាតិដ៏សំខាន់របស់ប្រទេសថៃមិនអាចបានខ្វះបាន។

លោកប្រា យុទ្ធ លើកឡើងពីការបំពានច្បាប់ការពារជេស្តាព្រះមហាក្សត្រ កើតឡើងមួយថ្ងៃក្រោយពីសកម្មជនម្នាក់ដែលជានិស្សិតឈ្មោះ Jatupat Boonpattararaksa សារភាពថាខ្លួនចែកចាយអត្ថបទព័ត៌មានដែលបង្ខូចកេរ្តិ៍ឈ្មោះក្រុមគ្រួសាររាជវង្សថៃនៅលើគណនីហ្វេសប៊ុករបស់ខ្លួន។ Jatupat ត្រូវតុលាការខេត្ត Khon Kaen កាត់ទោសឲ្យជាប់ពន្ធធនាគារ២ឆ្នាំកន្លះ ៕