ចៅប្រុសលោក លីក្វាន់យូ ថាលោកសុខចិត្តនិរទេសពីសិង្ហបុរី ព្រោះខ្លាចអាជ្ញាធរចាប់ខ្លួន

អន្តរជាតិ

ចៅប្រុសលោក លីក្វាន់យូ ថាលោកសុខចិត្តនិរទេសពីសិង្ហបុរី ព្រោះខ្លាចអាជ្ញាធរចាប់ខ្លួន

18, Aug 2017 , 9:59 pm

រូបភាព

ចៅប្រុសលោក លីក្វាន់យូ លោក Li Shengwu

ដោយ: ថ្មីៗ

ចៅប្រុសបង្កើតរបស់លោក លី ក្វាន់យូ លោក Li Shengwu បានអះអាងថាលោករត់ចេញពីសិង្ហបុរីកាលពីខែកក្កដាកន្លងមកដោយសារតែលោកខ្លាចអាជ្ញាធរសិង្ហបុរីចាប់ខ្លួនក្រោមបទចោទប្រកាន់ «ប្រមាថស្ថាប័នសាធារណៈ»។ តាមពិតទៅ Li Shengwu ជាកូនប្រុសបង្កើតលោក លី សៀនយ៉ាង ដែលកំពុងមានជម្លោះជាមួយនាយករដ្ឋមន្ត្រី លី សៀនឡុង រឿងផ្ទះឪពុកខ្លួននោះ។

លោក Li Shengwu កូនប្រុសបង្កើតលោក លី សៀនយ៉ាង បានអះអាងប្រាប់អ្នកសារព័ត៌មានថា លោកសម្រេចចិត្តនិរទេសខ្លួនកាលពីខែកក្កដា ក្រោយមិត្តភក្តិលោកប្រាប់ថាលោកអាចនឹងត្រូវអាជ្ញាធរស្ថិតក្រោមឱវាទពូរបស់ខ្លួនលោក លី សៀនឡុង ចាប់និងឃុំខ្លួនក្រោមបទចោទប្រ កាន់ «ប្រមាថមាក់ងាយស្ថាប័នសាធារណៈ»នោះ។

ទីភ្នាក់ងារព័ត៌មាន Reuters បានស្រង់សម្តីលោក Shengwu ដូច្នេះ៖ « នៅសិង្ហបុរី វាជារឿងដែលអាចទៅរួចដែលគេអាចត្រូវឃុំខ្លួន និងសួរចម្លើយដោយមិនទទួលបានមេធាវីការពារ។ មិត្តភក្តិខ្ញុំបានផ្តល់យោបល់ថា ពួកគេបារម្ភពីសុវត្ថិភាពខ្ញុំ បើសិនជាខ្ញុំបន្តស្ថិតនៅសិង្ហបុរីទៀត»។

ពាក់ព័ន្ធការចោទរដ្ឋាភិបាលថាមានបំណងចង់ចាប់ខ្លួននិងឃុំខ្លួននេះ អ្នកនាំពាក្យនាយករដ្ឋមន្ត្រីសិង្ហបុរីលោកស្រី Chang Li Lin បានឆ្លើយតបវិញថា សម្តីរបស់លោក Shengwu ពាក់ព័ន្ធការចាប់ខ្លួន និងសួរចម្លើយនោះមិនត្រឹមត្រូវឡើយ។ លោកស្រីបានពន្យល់ថា ច្បាប់និងនីតិវិធីមានទាំងអស់ដែលអាចឲ្យមានការប្តឹងប្តល់ចំពោះអ្នកប្រមាថមើលងាយស្ថាប័នរដ្ឋដូចករណី លោក Shengwu ដែរ ហើយមានតែតុលាការប៉ុណ្ណោះដែលមានអំណាចសម្រេច។

តាមពិតទៅមុនពេលចាកចេញពីសិង្ហបុរីថ្ងៃ ២៣ ខែកក្កដាកន្លងមក លោក Shengwu បានសរសេរបង្ហោះក្នុងគណនីហ្វេសប៊ុករបស់ខ្លួនដោយបរិហាកេរ្តិ៍ឈ្មោះដោយអះអាងថារដ្ឋាភិបាលសិង្ហបុរីរញ៉េរញ៉ៃ ហើយប្រព័ន្ធតុលាការសិង្ហបុរីនោះគ្មានឯករាជ្យស្ថិតក្រោមឥទ្ធិពលគេថែមទៀត។ អគ្គរដ្ឋអាជ្ញាបានផ្ញើលិខិតមួយច្បាប់ទៅលោកដើម្បីទាមទារឲ្យលោកសុំអភ័យទោសចំពោះសម្តីមាក់ងាយស្ថាប័ននីតិប្រតិបត្តិ និងប្រព័ន្ធតុលាការ បើមិនចង់ប្រឈមបណ្តឹងអាជ្ញានោះ។

រហូតដល់ថ្ងៃ ៤សីហា ទើបបានអគ្គរដ្ឋអាជ្ញាចាប់ផ្តើមនីវិធីដោយចោទប្រកាន់ Shengwu ពាក់ព័ន្ធការប្រមាថមើលងាយស្ថាប័នសាធារណៈនោះ។ ការចាប់ផ្តើមនីតិវីធីនេះ កើតឡើងក្រោយពេលដែលក្មូយប្រុសលោក លី សៀនឡុងខាងលើមិនព្រមលុបសំណេរខ្លួននៅក្នុងគណនីហ្វេសប៊ុក និងបដិសេធសុំអភ័យទោសជាសាធារណៈតាមការទាមទាររបស់អគ្គរដ្ឋអាជ្ញាសិង្ហបុរីនោះ។