អន្តរជាតិ
ធនធានរ៉ែរាប់ពាន់លានដុល្លារអាចជាហេតុផលដែល ត្រាំ បញ្ជូនទ័ពថែមទៅអាហ្វហ្គានីស្ថាន?
× ប្រធានាធិបតី ដូណាល់ ត្រាំ បានប្រកាសថា រដ្ឋបាលលោកផ្លាស់ប្តូរយុទ្ធសាស្ត្រ ដោយបង្កើនចំនួនកងទ័ពនៅអាហ្វហ្គានីស្ថាន ដើម្បីឈានទៅឈ្នះសង្គ្រាមដែលមានអាយុកាលរហូតដល់ ១៦ឆ្នាំនេះខាងមុខ។ ការសម្រេចបង្កើនទ័ពបែបនេះកើតឡើងស្របពេលដែលមានការលើកឡើងថា រដ្ឋបាលលោក ត្រាំ ទំនងជាសំឡឹងឃើញរ៉ែធម្មជាតិសន្ធឹកសន្ធាប់ដែលមានតម្លៃរាប់រយពាន់លានដុល្លារនៅអាហ្វហ្គានីស្ថានដែលមិនទាន់បូមនោះ។ យ៉ាងណាក៏ដោយ ក្រោយលោក ត្រាំ ប្រកាសបង្កើនទ័ព ក្រុមតាលីបង់ បានចេញសេចក្តីថ្លែងការណ៍មួយគំរាមអាមេរិកថា អាហ្វហ្គានីស្ថាននឹងក្លាយជាផ្នូរសពកងទ័ពអាមេរិកមិនខាន។
ក្រោយមានការរង់ចាំអស់ពេលជាយូរ ប្រធានាធិបតី ដូណាល់ ត្រាំ បានចេញមុខប្រកាសយុទ្ធសាស្ត្រយោធាថ្មីដើម្បីយកជ័យជម្នះលើភេរវជននៅអាហ្វហ្គានីស្ថាន និងទប់ស្កាត់ក្រុមភេរវជនរដ្ឋឥស្លាមយកអាហ្វហ្គានីស្ថានជាជម្រកដើម្បីវាយប្រហារអាមេរិកនៅថ្ងៃមុខ។ នាយប់ថ្ងៃចន្ទ ទី២១ ខែសីហា លោក ដូណាល់ ត្រាំ បានប្រកាសថា រដ្ឋបាលលោកនឹងបង្កើនចំនួនទ័ពនៅអាហ្វហ្គានីស្ថានដើម្បីដោះស្រាយបញ្ហានៅអាហ្វហ្គានីស្ថាន ហើយលោកសង្ឃឹមថា យុទ្ធសាស្ត្រថ្មីរបស់រដ្ឋបាលលោកនឹងនាំមកនូវជ័យជម្នះផងដែរ។ យ៉ាងណាមិញ ប្រធានាធិបតីរូបនេះមិនបានបង្ហើបពីចំនួនទ័ពដែលត្រូវបញ្ជូនទៅបន្ថែមឡើយ។
១.យុទ្ធសាស្ត្រយោធាថ្មី តែនៅស្រពេចស្រពិល?
ថ្លែងចំពោះមុខកងទ័ពជាច្រើនាក់នៅមូលដ្ឋានយោធាក្រុងវ៉ាស៊ីនតោន លោក ត្រាំ រម្លឹកថា យោបល់ដំបូងបំផុតរបស់លោកមុនក្លាយជាប្រធានាធិបតីគឺដកកងទ័ពអាមេរិកចេញទាំងស្រុងពីអាហ្វហ្គានីស្ថាន។ ប៉ុន្តែលោកសង្កត់ធ្ងន់ថា លោកបានផ្លាស់ប្តូរជំហរពេលលោកក្លាយជាប្រធានាធិបតីអាមេរិក។
លោក ត្រាំ បានលើកឡើងដូច្នេះ៖«ការគិតរបស់ខ្ញុំពីមុនគឺ ដកទ័ពចេញ ហើយជាធម្មតាខ្ញុំចូលចិត្តធ្វើតាមអ្វីដែលខ្ញុំគិត។ ប៉ុន្តែដូចដែលខ្ញុំធ្លាប់លឺ ការសម្រេចចិត្តនឹងខុសពីការគិតរបស់អ្នកពេលដែលអ្នកអង្គុយកៅអីប្រធានាធិបតី និងធ្វើជាប្រធានាធិបតីអាមេរិកនោះ»។
លោកពន្យល់បន្តថា តែពេលនេះលោកយល់ច្បាស់ ហើយការសម្រេចចិត្តដកទ័ពប្រៀបបីដូចជាការមិនអើពើចំពោះកងទ័ពអាមេរិកជាច្រើននាក់ដែលបានពលីក្នុងសង្គ្រាមអាហ្វហ្គានីស្ថានចាប់ពីឆ្នាំ ២០០១មកនោះ។ អ្វីដែលសំខាន់ វានឹងបង្កើតឲ្យមានបញ្ហាប្រឈមធំព្រោះអវត្តមានអាមេរិកនឹងអនុញ្ញាតឲ្យក្រុមភេរវជនអាចពង្រីកបណ្តាញរបស់ខ្លួនបានដូចដែលអ្វីដែលកើតឡើងនៅអ៊ីរ៉ាក់ដូច្នេះដែរ។
ដូចបានលើកឡើងខាងដើមស្រាប់ លោក ត្រាំ មិនបានបញ្ជាក់ឲ្យច្បាស់លាស់ឡើយថា លោកនឹងបញ្ជាឲ្យបន្ថែមទ័ពចំនួនប៉ុន្មាន និងមានយុទ្ធសាស្ត្រអ្វីជាដុំកំភួននោះ ប៉ុន្តែលោកបានសម្រេចប្រគល់អំណាចក្នុងការកម្រិតចំនួនទ័ពបន្ថែមនេះទៅរដ្ឋមន្ត្រីការពារជាតិអាមេរិកលោក ជេម ម៉ាទីស។
ប៉ុន្តែបើតាមទីភ្នាក់ងារព័ត៌មាន AFP រដ្ឋមន្ត្រីការពារជាតិអាមេរិកបានស្នើសុំបន្ថែមកងទ័ព ៤០០០នាក់ទៀត ដោយចំនួនទ័ពសរុបនៅអាហ្វហ្គានីស្ថាននឹងកើតឡើងដល់ ៨៤០០នាក់ឯណោះ។
ក្នុងឱកាសនោះ លោក ត្រាំ បានឆ្លៀតរម្លឹកផងដែរថា ការបន្ថែមចំនួនទ័ពនេះមិនមែនអាមេរិកអនុវត្តនយោបាយកសាងរដ្ឋឡើងវិញនៅអាហ្វហ្គានីស្ថានឡើយ។ អ្វីដែលអាមេរិកកំពុងធ្វើគឺកម្ចាត់ភេរវជនប៉ុណ្ណោះ។ លោកបានគូសបញ្ជាក់ថា អាមេរិកនឹងផ្តោតសំខាន់លើព្រំដែនអាហ្វហ្គានីស្ថាន ដែលអាចធានាថា ក្រុមសកម្មប្រយុទ្ធរដ្ឋឥស្លាម និងក្រុមអាល់កៃដានឹងត្រូវកម្ចាត់ ហើយនិងទប់ស្កាត់ក្រុមតាលីបង់កុំឲ្យឡើងកាន់អំណាចជាថ្មីទៀត។
ដើម្បីសម្រេចបាននូវគោលដៅនេះ ក្រៅពីបង្កើនចំនួនទ័ព ប្រធានាធិបតីអាមេរិក ដូណាល់ ត្រាំ ក៏បានលើកឡើងផងដែរថា លោកនឹងពង្រីកកិច្ចសហប្រតិបត្តិការក្នុងការប្រឆាំងបណ្តាញភេរវជន និង ក្រុមឧក្រិដ្ឋជន រួមទាំងដាក់សម្ពាធឲ្យប្រទេសជិតខាងឲ្យចូលរួមក្នុងកិច្ចសហប្រតិបត្តិការនេះផង។ លោក ត្រាំ បញ្ជាក់ថា លោកនឹងសុំឲ្យឥណ្ឌាជួយរឿងជំនួយសេដ្ឋកិច្ច និងអភិវឌ្ឍដើម្បីស្រោចស្រង់អាហ្វហ្គានីស្ថាន។ ប៉ុន្តែលោកចង្អុលប៉ាគីស្ថានចំៗ ដោយលោកទារឲ្យប្រទេសនុយក្លេអ៊ែរនេះប្រឹងប្រែងចូលរួមកម្ចាត់ភេរវជន។ លោកគំរាមកាត់ជំនួយយោធាផ្តល់ឲ្យប៉ាគីស្ថានផង បើសិនជាប្រទេសអាស៊ីខាងត្បូងនេះមិនស្តាប់ការទាមទាររបស់លោកនោះ។
លោក ត្រាំ បាននិយាយដូច្នេះ៖ «យើងមិនអាចនៅស្ងៀមជាមួយប៉ាគីស្ថានរឿងលាក់ភេរវជនឡើយ។ ប៉ាគីស្ថានប្រហែលជាចំណេញច្រើនបើចាប់ដៃជាមួយយើងដើម្បីកម្ចាត់ភេរវជននៅអាហ្វហ្គានីស្ថាន។ វាខាតបង់ច្រើនណាស់បើសិនជាបន្តឲ្យភេរវជនលាក់ខ្លួនបែបនេះ»។
សរុបមក គោលនយោបាយអាមេរិកនៅពេលនេះគឺបន្ថែមកងទ័ពដើម្បីម្ចាត់ភេរវជននៅអាហ្វហ្គានីស្ថាន ប៉ុន្តែវាមិនផ្តល់ពន្លឺច្រើនឡើយដែលថាអាមេរិកអាចនឹងឈ្នះសង្គ្រាមដែលខ្លួនច្បាំងអស់ ១៦ឆ្នាំមកនោះឡើយ។ ប៉ុន្តែការដាក់សម្ពាធលើប៉ាគីស្ថាន និង សុំឲ្យឥណ្ឌាជួយប្រហែលជាអាចនឹងមានផ្លែផ្កាច្រើនសម្រាប់ការដោះស្រាយបញ្ហាអាហ្វហ្គានីស្ថាននេះ។
២.ដូណាល់ ត្រាំ មិនដកទ័ពព្រោះស្តាយរ៉ែនៅអាហ្វហ្គានីស្ថាន?
ដើមឡើយលោក ដូណាល់ ត្រាំ ត្រូវប្រកាសយុទ្ធសាស្ត្រថ្មីរបស់ខ្លួនត្រឹមពាក់កណ្តាលខែកក្កដា ប៉ុន្តែការត្រួតពិនិត្យនិងអនុម័តយុទ្ធសាស្ត្រថ្មីសម្រាប់ដោះស្រាយបញ្ហាអាហ្វហ្គានីស្ថានត្រូវពន្យារពេលទល់ម្សិលមិញ។ ការយឺតយ៉ាវនេះ ប្រហែលជាទាក់ទងនឹងការស្វែងរកហេតុផល របស់សេតវិមាន ថាតើគួរបន្តធ្វើសង្គ្រាមឬគួរចាកចេញពីអាហ្វហ្គានីស្ថាននោះ? ប៉ុន្តែការខួងបូមយករ៉ែសន្ធឹកសន្ធាប់នៅអាហ្វហ្គានីស្ថានជាហេតុផលចម្បងដែលអាមេរិកត្រូវនៅបន្តឈរជើងនៅទីនោះ។
បើតាមសារព័ត៌មាន New York Times លោក ត្រាំ បានជជែកជាមួយប្រធានាធិបតីអាហ្វហ្គានីស្ថានលោក Ashraf Ghani ពាក់ព័ន្ធធនធានរ៉ែនៅក្នុងប្រទេស ខណៈដែលប្រធានាធិបតីរូបនេះចង់យកវិស័យរ៉ែជាវិស័យអាទិភាពមួយសម្រាប់ការលូតលាស់នៃសេដ្ឋកិច្ចជាតិ។ សេតវិមានក៏មានបំណងបញ្ជូនបេសកជនរបស់ខ្លួនទៅអាហ្វហ្គានីស្ថានដើម្បីជជែកពិភាក្សារឿងរុករកដែរ។
បើតាម New York Times ដដែល មហាសេដ្ឋី Stephen A. Feinberg បានផ្តល់ប្រឹក្សាឲ្យលោក ដូណាល់ ត្រាំ ផងដែរពាក់ព័ន្ធការស្វែងរកវិធីសាស្ត្រចូលបូមយករ៉ែនៅអាហ្វហ្គានីស្ថានដែរកាលពីខែកក្កដា។ លោក Feinberg ជាម្ចាស់ក្រុមហ៊ុនឧស្សាហកម្មយោធាអាមេរិក Dyncorp International អាចមានលទ្ធភាពក្នុងការរក្សាសន្តិសុខរោងចក្របូមរ៉ែបានបើសិនបើគម្រោងនេះអាចដំណើរការទៅមុខនោះ។ ប៉ុន្តែលោក Feinberg បានប្រាស់លោក ត្រាំ ថា បញ្ហាធំបំផុតនៅពេលនេះគឺតំបន់ដែលសម្បូររ៉ែបំផុតស្ថិតក្រោមការកាន់កាប់របស់ក្រុមតាលីបង់នៅឡើយ។
បើតាមរបាយការណ៍ស្រាវជ្រាវឆ្នាំ ២០១០ របស់អាមេរិក ទំហំរ៉ែភាគច្រើនជារ៉ែដែកនិងរ៉ែទង់ដែងនៅអាហ្វហ្គានីស្ថានអាចមានតម្លៃប្រហែល មួយទ្រីលានដុល្លារអាមេរិកឯណោះ ប៉ុន្តែការវាយតម្លៃនេះនៅចម្រូងចម្រាសនៅឡើយ។
តាមពិតទៅគម្រោងទាញយករ៉ែនៅអាហ្វហ្គានីស្ថាននេះមិនមែនជារឿងថ្មីឡើយ។ កាលជំនាន់លោក បារ៉ាក់ អូបាម៉ា ក៏មានការរៀបចំគម្រោងសាងសង់រោងចក្រខួងបូមយករ៉ែដែរ។ ប៉ុន្តែដោយសារបញ្ហាប្រឈមច្រើនពេកដូចជាពុករលួយ, បញ្ហាសន្តិសុខ ខ្វះខាតហេដ្ឋារចនាសម្ព័ន្ធផងនោះ ទើបបានជាគម្រោងដែលមានត្រូវជាប់គាំងរហូតមក។
៣. តាលីបង់៖ អាហ្វហ្គានីស្ថាននឹងក្លាយជាផ្នូរសម្រាប់អាមេរិកសតវត្សទី ២១
ក្រោយពេលដែលលោក ត្រាំ ប្រកាសយុទ្ធសាស្ត្រថ្មីសម្រាប់សង្គ្រាមអាហ្វហ្គានីស្ថាន ក្រុមតាលីបង់ស្រាប់តែចេញមុខព្រមានក្រុងវ៉ាស៊ីនតោនវិញដែរ។ ទីភ្នាក់ងារព័ត៌មាន AFP ផ្សាយថា អ្នកនាំពាក្យក្រុមតាលីបង់ Zabiullah Mujahid បានបញ្ជាក់ក្នុងសេចក្តីថ្លែងការណ៍របស់ខ្លូនថា អាមេរិកនឹងផុងខ្លួនកាន់តែជ្រៅ ហើយអាហ្វហ្គានីស្ថាននឹងក្លាយជាផ្នូរសម្រាប់អាមេរិក។
អ្នកនាំពាក្យក្រុមតាលីបង់នេះបានអះអាងដូច្នេះ៖«ប្រសិនអាមេរិកមិនដកទ័ពគេចេញពីអាហ្វហ្គានីស្ថានទេ អាហ្វហ្គានីស្ថាននឹងក្លាយជាផ្នូរកប់សពគេសម្រាប់សតវត្សទី ២១នេះតែម្តង។ ហើយដរាបណាទាហានអាមេរិកស្ថិតនៅលើដីយើង ហើយគេបន្តធ្វើសង្គ្រាមប្រឆាំងយើង វាក៏ជាកាតព្វកិច្ចមួយដែលយើងត្រូវបានសង្គ្រាមជីហាតរបស់យើងដែរ»។
ក្រៅពីគំរាមកម្ចាត់ទាហានអាមេរិកនោះ ក្រុមតាលីបង់នេះក៏ដាស់តឿនឲ្យរដ្ឋបាលអាមេរិកស្វែងរកយុទ្ធសាស្ត្រសម្រាប់ដកទ័ពចេញពីអាហ្វហ្គានីស្ថាន ជាជាងបន្តរកយុទ្ធសាស្ត្របន្តសង្គ្រាមទៀត។ នេះក៏ដោយសារ បន្តសង្គ្រាមនៅអាហ្វហ្គានីស្ថានគ្មានអនាគតឡើយ។
ចំណែកមេបញ្ជាការជាន់ខ្ពស់ក្រុមតាលីបង់ក៏បានប្រាប់ទីភ្នាក់ងារព័ត៌មាន AFP ផងដែរថា លោក ត្រាំ កំពុងយកជីវិតទាហានអាមេរិកឲ្យទៅបង់ចោលក្នុងសង្គ្រាមអាហ្វហ្គានីស្ថានហើយ។គេបន្ថែមថា ក្រុមតាលីបង់មិនប្តូរជំហរឡើយ ហើយពួកគេដឹងច្បាស់ពីវិធីការពារប្រទេសពីការឈ្លានពានពីសំណាក់ទាហានបរទេស៕
Tag:
ដូណាល់ ត្រាំ
អាហ្វហ្គានីស្ថាន
តាលីបង់
© រក្សាសិទ្ធិដោយ thmeythmey.com