សម្តេច ហ៊ុន សែន យកថ្ងៃប្រារព្ធទិវាវប្បធម៌ដើម្បីជួបសិល្បករ-សិល្បការិនីគ្រប់ទម្រង់

ជាតិ

សិល្បះ

សម្តេច ហ៊ុន សែន យកថ្ងៃប្រារព្ធទិវាវប្បធម៌ដើម្បីជួបសិល្បករ-សិល្បការិនីគ្រប់ទម្រង់

29, Sep 2017 , 10:07 am

រូបភាព

ដោយ: រួបរួម

សម្តេច ហ៊ុន សែន បានកំណត់យកថ្ងៃនៃការប្រារព្ធទិវាវប្បធម៌ (៣ មីនា) ដើម្បីជួបសិល្បករ សិល្បការិនី គ្រប់ទម្រង់។ ប្រមុខរដ្ឋាភិបាល បានប្រកាសបែបនេះនៅវិមានសន្តិភាព នាពិធីបំពាក់គ្រឿងឥស្សរិយយស ជូនព្រឹទ្ធាចារ្យកោសល្យវោហារ គង់ ណៃ ដែលទើបទទួលបានពានរង្វាន់សិល្បៈវប្បធម៌ ក្រុងហ្វូកូអូកា នៃប្រទេសជប៉ុន។

ចាប់ពីឆ្នាំ២០១៨ តទៅ សម្តេចនាយករដ្ឋមន្ត្រី ហ៊ុន សែន ត្រូវបន្ថែមកាលវិភាគមួយទៀត ពោលគឺមួយឆ្នាំម្តង សម្តេចត្រូវជួបសិល្បករ សិល្បការិនីចំទិវានៃការប្រារព្ធទិវាវប្បធម៌ ថ្ងៃទី៣ ខែមីនា។ សម្តេចបានបញ្ជាក់ថា ជំនួបនេះ នឹងរៀបចំឡើងនៅកោះពេជ្រ ដែលអាចផ្ទុកអ្នកចូលរួមពី៤០០០ទៅ៥០០០នាក់។

សម្តេច ហ៊ុន សែន បានអះអាងថា ជំនួបនេះ នឹងផ្តល់ឱកាសដល់សិល្បករ សិល្បការិនីគ្រប់ទម្រង់ មានឱកាសផ្លាស់ប្តូរយោបល់ និងបង្ហាញសមត្ថភាព។ ជាមួយគ្នានេះ សម្តេច បានស្នើថា ប្រសិនបើទិវាវប្បធម៌ប្រព្រឹត្តទៅនៅចុងសប្តាហ៍ អ្នករៀបចំកម្មវិធីត្រូវពិចារណា ផ្លាស់ប្តូរពេលវេលាដើម្បីកុំឲ្យជាន់នឹងការប្រគំតន្ត្រីនៅតាមស្ថានីយ៍ទូរទស្សន៍។

នាពិធីបំពាក់គ្រឿងឥស្សរិយយស ជូនព្រឹទ្ធាចារ្យកោសល្យវោហារ គង់ ណៃ ដែលទើបទទួលបានពានរង្វាន់សិល្បៈវប្បធម៌ ក្រុងហ្វូកូអូកា (Fukuoka Arts and Culture Prize) នៃប្រទេសជប៉ុន សម្តេច ហ៊ុន សែនបានរំលឹកពីការរស់ឡើងវិញនៃសិល្បៈវប្បធម៌ខ្មែរ។

«ទទួលទានផ្លែឈើ នឹកដល់អ្នកដាំដើម ផឹកទឹកនឹកប្រភព»។ នេះជាការលើកឡើងរបស់សម្តេច ហ៊ុន សែន ដោយរំលឹកពីការប្រឹងប្រែងស្តារទម្រង់សិល្បៈខ្មែរឲ្យរស់ឡើងវិញ ក្នុងនោះ លោក កែវ ចិន្តា ព្រឹទ្ធាចារ្យ ឆេង ផុន បានចូលរួមយ៉ាងផុសផុល។

សម្តេច ហ៊ុន សែន បានលើកឡើងថា សម្តេចបានជួបព្រឹទ្ធាចារ្យ គង់ ណៃ កាលពីអំឡុងឆ្នាំ១៩៨២ នៅខេត្តកំពត ហើយនៅពេលនោះ សម្តេច បានស្នើទៅសភា ដើម្បីនាំយកគាត់ទៅច្រៀងនៅមហាស្រពចាស់ [ក្រោយមក គេស្គាល់ជាទូទៅថា មហោស្រពឆេះ]។

ជាមួយគ្នានេះ សម្តេចបានកត់សម្គាល់ថា ចលនាសិល្បមហាជន មានការរីកដុះដាលគ្រប់ទីកន្លែង ក្នុងដំណាក់កាលនៃការស្តារវិស័យសិល្បៈក្រោយរបបខ្មែរក្រហម ដោយរាល់បណ្តាខេត្តសុទ្ធតែមានវង់ល្ខោនបាសាក់ យីកេ អាយៃ ចាប៉ី ជាដើម ប៉ុន្តែក្រោយវត្តមានសេដ្ឋកិច្ចទីផ្សារប្រកួតប្រជែង ចលនាសិល្បៈមហាជនមិនសូវមានច្រើនដូចមុនឡើយ។

«ពានរង្វាន់ហ្វុគុអូកា» ត្រូវបានបង្កើតឡើងនៅឆ្នាំ១៩៩០ ក្នុងគោលបំណងផ្តល់កិត្តិយសដល់បុគ្គល ក្រុម ឬស្ថាប័នណា ដែលមានស្នាដៃលេចធ្លោ ក្នុងការថែរក្សា និងការបង្កើតនូវវប្បធម៌អាស៊ីមួយ ប្រកបដោយលក្ខណៈពិសេសនិងភាពចម្រុះ ដែលជំរុញឲ្យមានការផ្លាស់ប្តូរវប្បធម៌ទៅវិញទៅមក និងលើកកម្ពស់ការយល់ដឹងអំពីតម្លៃនៃវប្បធម៌អាស៊ី។

នាពិធីដែលមានការចូលរួមពីសិល្បករ សិល្បការិនីជើងចាស់ជាច្រើន សម្តេច ហ៊ុន សែនបានបំពាក់គ្រឿងឥស្សរឥស្សរិយយស ជូនព្រឹទ្ធាចារ្យ គង់ ណៃ និងព្រឹទ្ធាចារ្យ ប្រាជ្ញ ឈួន រួមទាំងប្រាក់ឧបត្ថម្ភផងដែរ៕