មេបក្សស្មូម? មន្ត្រីកិច្ចសន្យាសង្គមកិច្ចត្រូវចាប់ខ្លួនពីបទទារលុយពីអ្នកសុំទាននៅតាមស្តុប

ជាតិ

សង្គមជាតិ

មេបក្សស្មូម? មន្ត្រីកិច្ចសន្យាសង្គមកិច្ចត្រូវចាប់ខ្លួនពីបទទារលុយពីអ្នកសុំទាននៅតាមស្តុប

04, Oct 2017 , 10:51 am

រូបភាព

ជនសង្ស័យ៣រូបត្រូវបញ្ជូនទៅតុលាការ។ រូបថត រាជអាវុធហត្ថភ្នំពេញ

ដោយ: រួបរួម

រាជអាវុធហត្ថរាជធានីភ្នំពេញ កាលពីថ្ងៃទី៣ ខែតុលា ឆ្នាំ២០១៧ បានបញ្ជូនជនសង្ស័យ៣រូបទៅតុលាការ បន្ទាប់ពីស្រាវជ្រាវឃើញថា អ្នកទាំងនោះជាប់ពាក់ព័ន្ធនឹងការសហការទទួលយកប្រយោជន៍ពីអ្នកសុំទាន។ បើតាមថ្នាក់ដឹកនាំមន្ទីរសង្គមកិច្ចរាជធានីភ្នំពេញ ជនសង្ស័យ២នាក់គឺជាបុគ្គលិកជាប់កិច្ចសន្យា។

«មេបក្សស្មូម៣នាក់ជាប់អន្ទាក់សមត្ថកិច្ច!»។ ហ្វេសប៊ុកផ្លូវការរបស់រាជអាវុធហត្ថរាជធានីភ្នំពេញ បានដាក់ចំណងជើងអត្ថបទខ្លួនយ៉ាងដូច្នេះ ពាក់ព័ន្ធនឹងការចាប់ខ្លួនបុគ្គលិកជាប់កិច្ចសន្យា២នាក់របស់មន្ទីរសង្គមកិច្ច អតីតយុទ្ធជន និងស្តារនីតិសម្បាទា រាជធានីភ្នំពេញ និងម្នាក់ទៀត ជាអ្នកទទួលបន្ទុកដើរប្រមូលលុយពីអ្នកសុំទាន។

កាលពីថ្ងៃទី១ ខែតុលា សមត្ថកិច្ចរាជធានីភ្នំពេញ ដែលកងរាជអាវុធហត្ថ និងមន្ទីរសង្គមកិច្ច បានសហការគ្នាស្រាវជ្រាវ ប្រមូលអ្នកសុំទាន ដែលមានរចនាសម្ព័ន្ធ រហូតដល់ចាប់បានបុគ្គលិកជាប់កិច្ចសន្យារបស់មន្ទីរសង្គម២រូប រួមមាន ឈ្មោះ ឃុត នឹម ហៅតាលឹម អាយុ៥៥ឆ្នាំ និងឈ្មោះហឹង សារ៉ូម ហៅ តារុំ អាយុ៤២ឆ្នាំ ដោយឡែកឈ្មោះ សាន សិត ភេទប្រុស អាយុ៤១ឆ្នាំ ជាអតីតជាអ្នកសុំទាន ដែលមានតួនាទីអ្នកដើរប្រមូលលុយពីអ្នកសុំទានតាមភ្លើងស្តុប ឲ្យទៅមន្ត្រីជាប់កិច្ចសន្យាទាំងពីររូបខាងលើ។

យោងតាមរាជអាវុធហត្ថរាជធានីភ្នំពេញ ជនសង្ស័យបានសារភាពថា ពួកគេប្រមូលលុយ ពីអ្នកសុំទានរៀងរាល់ថ្ងៃ នៅតាមភ្លើងស្តុប ដោយអ្នកសុំទានម្នាក់ត្រូវបង់១ម៉ឺន ទៅ១ម៉ឺន២ពាន់រៀលក្នុង១ថ្ងៃ ហើយ១សប្តាហ៍ ទើបឈ្មោះសាន សិត យកលុយប្រគល់ឲ្យតាលឹម និងតារុំម្តង ដោយតាលឹមយកចំណែកអ្នកដើរសុំនៅស្តុបអាងទឹក ស្តុបពេទ្យចិន ស្តុបផ្សារដើមគោ និងភូមិសាស្ត្រក្បែរគ្នា រីឯតារុំ យកចំណែកអ្នកដើរសុំនៅស្តុបកាណាឌីយ៉ា ស្តុបបូកគោ និងប៉ែកខាងមាត់ទន្លេ។

ការយកលុយពីអ្នកសុំទាននេះ ជាថ្នូរជាមួយនឹងការផ្តល់ព័ត៌មាន នៅពេលណាដែល មន្ទីរសង្គមកិច្ច និងសមត្ថកិច្ចចុះបោសសំអាតប្រមូលអ្នកសុំទាន អ្នកញៀនថ្នាំ និងក្មេងអានាថាតាមដងផ្លូវ តែបើពួកអ្នកសុំទានទាំងនោះ មិនព្រមបង់លុយឲ្យទេ ឈ្មោះ សាន សិត គម្រាមថា នឹងរាយការណ៍ឲ្យខាងមន្ទីរសង្គមកិច្ចនិងសមត្ថកិច្ច ចុះចាប់ពួកគេ។

សម្រាប់លោកស្រី មុំ ចាន់ដានី ប្រធានស្តីទីមន្ទីរសង្គមកិច្ចរាជធានីភ្នំពេញ នេះជាការយុទ្ធនាការវះកាត់ដង្កូវដែលចេញពីសាច់។ រាជអាវុធហត្ថរាជធានីភ្នំពេញ បានគូសបញ្ជាក់ផងដែរថា ហេតុផលនៃការដើរសុំទាន មួយចំនួនពុំមែនមកពីភាពក្រីក្រនោះទេ តែមកពី ភាពខ្ជិលប្រអូស របស់បុគ្គល ហើយជាមួយគ្នានេះបុគ្គលខិលខូចមួយចំនួន ឆ្លៀតឱកាសកេងចំណេញ ទាញយកផលប្រយោជន៍ ពីអ្នកសុំទានទាំងនោះដែល ធ្វើឲ្យសកម្មភាពបង្ក្រាបរបស់សមត្ថកិច្ច ហាក់ដូចជាការវែកចក៕