ជាតិ
នយោបាយជាតិ
CNRP មិនរកវិធីទប់ទល់នឹងការរំលាយគណបក្សឡើយ រូបភាព៖ ទីស្នាក់ការកណ្តាលរបស់គណបក្សសង្គ្រោះជាតិ
× ភ្នំពេញ៖ គណបក្សសង្គ្រោះជាតិ ហាក់មិនខ្នះខ្នែងទាល់តែសោះ ថាត្រូវធ្វើដូចម្តេច ដើម្បីទប់ទល់នឹង «បណ្តឹងសុំរំលាយគណបក្ស» ដែលកំពុងស្ថិតក្នុងដៃតុលាការកំពូល។ ចាប់តាំងពីក្រសួងមហាផ្ទៃ ដាក់បណ្តឹងសុំឲ្យរំលាយចោល ហើយតុលាការកំពូល ក៏បានចេញដីកាបង្គាប់ឲ្យដាក់ឯកសារឬភស្តុតាង ដើម្បីការពារខ្លួនផងនោះ រហូតមកដល់ពេលនេះ គណបក្សសង្គ្រោះជាតិ នៅតែធ្វើមិនដឹងមិនឮ ដដែល។
ថ្មីៗនេះ គណបក្សសង្គ្រោះជាតិ បានបើកកិច្ចប្រជុំគណៈកម្មាធិការអចិន្ត្រៃយ៍ ហើយក៏បានសម្រេចរួចដែរថា នឹងមិនដាក់ឯកសារឬភស្តុតាងអ្វីទាំងអស់ទៅកាន់តុលាការកំពូល។ នេះបើតាមលោក ម៉ៅ មុនីវណ្ណ តំណាងរាស្ត្រ និងជាអនុប្រធានគណៈកម្មាធិការប្រតិបត្តិនៃគណបក្សសង្គ្រោះជាតិ ដែលបានប្រាប់សារព័ត៌មានថ្មីៗតាមទូរសព្ទនៅថ្ងៃទី១៣ ខែតុលា ឆ្នាំ២0១៧។ លោក ម៉ៅ មុនីវណ្ណ បន្តថា សូម្បីតែមេធាវី ក៏គណបក្សសង្គ្រោះជាតិ មិនពឹងពាក់ដែរ។
មន្ត្រីជាន់ខ្ពស់គណបក្សសង្គ្រោះជាតិរូបនេះ បានបញ្ជាក់យ៉ាងដូច្នេះថា៖«យើង មិនដាក់ទេ។ យើង គ្មានឯកសារអ្វីត្រូវដាក់ផង។ យើងដឹងហើយ ទោះយើងដាក់ឯកសារ ឬមានមេធាវី ក៏គ្មានប្រយោជន៍ដែរ។ បណ្តោយ ឲ្យដំណើរការតាមហ្នឹងចុះ..»។ លោក បន្ថែមចុងក្រោយថា រហូតមកដល់ពេលនេះ តុលាការកំពូល មិនទាន់បានជូនដំណឹងនៃការបើកសវនាការលើបណ្តឹងសុំរំលាយគណបក្សសង្គ្រោះជាតិនោះទេ។
ក្រសួងមហាផ្ទៃ គឺជាដើមបណ្តឹង ដែលប្តឹងទៅកាន់តុលាការកំពូល ដើម្បីសុំឲ្យរំលាយគណបក្សសង្គ្រោះជាតិ។ ហើយអ្នកដែលស្នើឲ្យក្រសួងមហាផ្ទៃ ដាក់បណ្តឹងទៅកាន់តុលាការកំពូល គឺគណបក្សហ្វ៊ុនស៊ិនប៉ិចរបស់សម្តេចក្រុមព្រះ និងគណបក្សយុវជនកម្ពុជារបស់លោក ពេជ្រ ស្រស់។
សម្រាប់ក្រសួងមហាផ្ទៃ ការដាក់បណ្តឹងសុំឲ្យរំលាយគណបក្សសង្គ្រោះជាតិ គឺមានហេតុផលនិងភស្តុតាងគ្រប់គ្រាន់។ ក្រសួងមហាផ្ទៃ បានផ្សារភ្ជាប់បទល្មើសរបស់ឯកឧត្តម កឹម សុខា ដែលត្រូវបានចោទពីបទ «ឃុបឃិតជាមួយបរទេសដោយសម្ងាត់» ទៅនឹងបណ្តឹងសុំរំលាយគណបក្សសង្គ្រោះជាតិ។
បច្ចុប្បន្ន ឯកឧត្តម កឹម សុខា កំពុងជាប់ឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ។ ប្រធានគណបក្សសង្គ្រោះជាតិរូបនេះ ត្រូវបានចាប់ខ្លួន កាលពីដើមខែកញ្ញា ឆ្នាំ២0១៧៕
© រក្សាសិទ្ធិដោយ thmeythmey.com