ជាតិ
នយោបាយជាតិ
ហ្វ៊ុនស៊ិនប៉ិច និងបក្សសញ្ជាតិកម្ពុជា មិនប្រកែកឡើយ បើច្បាប់ប្រគល់កៅអីឲ្យខ្លួន
× ភ្នំពេញ៖ គណបក្សនយោបាយចំនួនពីរ ដែលមិនបានជាប់ឆ្នោត កាលពីឆ្នាំ២១០១៣ ត្រៀមខ្លួនទទួលយកអាសនៈក្នុងរដ្ឋសភា តាមការសម្រេចរបស់គណៈកម្មាធិការជាតិរៀបចំការបោះឆ្នោត(គជប) ដែលអាចកើតឡើងនាពេលខាងមុខ។
រដ្ឋសភា បានអនុម័តសេចក្តីស្នើកែប្រែច្បាប់ចំនួន៤ ដែលមានខ្លឹមសារបែងចែកអាសនៈក្នុងរដ្ឋសភា របស់គណបក្សដែលត្រូវបានរំលាយ ទៅឲ្យគណបក្សដទៃផ្សេងទៀត ដែលបានចូលរួមការបោះឆ្នោតកាលពីឆ្នាំ២០១៣។ ការធ្វើវិសោធកម្មច្បាប់បោះឆ្នោតទាំង៤នេះ ធ្វើឡើងស្របពេលបណ្ដឹងសុំរំលាយគណបក្សសង្គ្រោះជាតិ បានធ្លាក់ដល់ដៃតុលាការកំពូលហើយ ដើម្បីត្រួតពិនិត្យនឹងសម្រេចលើជោគវាសនាគណបក្សនេះ។
ដូច្នេះបើសិនជាខ្លឹមសារច្បាប់ទាំង៤នេះ ត្រូវបានចូលជាធរមាន ហើយគណបក្សសង្គ្រោះជាតិអាចត្រូវបានតុលាការកំពូលរំលាយមែននោះគណៈកម្មាធិការជាតិរៀបចំការបោះឆ្នោត(គជប) ក៏ត្រូវមានភារកិច្ចបែងចែកអាសនៈគណបក្សនេះ ឲ្យទៅគណបក្សដទៃទៀត ដូចជា គណបក្សហ្វ៊ុនស៊ិនប៉ិច ,គណបក្សសញ្ជាតិកម្ពុជា ,គណបក្សខ្មែរឈប់ក្រ ,គណបក្សសម្ព័ន្ធដើម្បីប្រជាធិបតេយ្យ ,គណបក្សសាធារណៈរដ្ឋប្រជាធិបតេយ្យ និងគណបក្សខ្មែរអភិវឌ្ឍសេដ្ឋកិច្ច ដែលមិនទទួលបានអាសនៈ កាលពីអំឡុងពេលបោះឆ្នោតឆ្នាំ២០១៣នោះ។
ខណៈសេចក្តីស្នើច្បាប់ទាំង៤នេះ កំពុងដំណើរការនោះ គណបក្សនយោបាយចំនួនពីរ ក្នុងចំណោមគណបក្សខាងលើនេះ បានត្រៀមខ្លួនទទួលយកអាសនៈ តាមការសម្រេចនៃផ្លូវច្បាប់ នាពេលខាងមុខនេះ។ ប្រធានគណបក្សសញ្ជាតិខ្មែរ លោក សេង សុខខេង បាននិយាយថា គណបក្សលោកនឹងទទួលយកអាសនៈ ដែលបានមកពីការបែងចែកកៅអីរបស់គណបក្សដែលត្រូវបានរំលាយនោះ មកទទួលខុសត្រូវភារកិច្ចវិញម្ដង។
ថ្លែងប្រាប់សារព័ត៌មានថ្មីៗ លោក សេង សុខខេង បានបញ្ជាក់ដូច្នេះថា៖«និយាយជារួមបើតុលាការរំលាយគណបក្សនោះ ហើយសភាអនុម័តខ្លឹមសារច្បាប់ ចំណែកគណៈកម្មាធិការជាតិអនុវត្តច្បាប់ដោយបែងចែកអាសនៈគណបក្សរំលាយនោះ ឲ្យមកគណបក្សយើងនឹងទទួលយកដោយអត់ប្រកែកទេ ព្រោះយើងបានមកស្របតាមច្បាប់។ ចំពោះការរិះគន់មកបក្សយើងនោះ គឺវាគេចមិនផុតទេ តែយ៉ាងណាក៏យើងមិនខុសដែរ ព្រោះយើងទទួលយកដើម្បីចូលរួមដោះស្រាយបញ្ហាជាតិ ចូលរួមជួយប្រយោជន៍ជាតិ»។
ស្រដៀងគ្នានឹងគណបក្សសញ្ជាតិកម្ពុជាដែរ គណបក្សហ្វ៊ុនស៊ិនប៉ិច ហាក់មិនជំទាស់ការទទួលយកអាសនៈក្នុងរដ្ឋសភា ដែលអាចបានមកពីការរំលាយគណបក្សសង្គ្រោះជាតិឡើយ។ ប៉ុន្តែនៅពេលសួរថា ចុះបើទទួលយកអាសនៈនោះ ហើយមានរិះគន់ពីសំណាក់មហាជនច្រើន តើគណបក្សហ្វ៊ុនស៊ិនប៉ិច នឹងទទួលយកដែរឬទេ? ត្រង់ចំណុចនេះអ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន បានបកស្រាយបែបជាសំនួរវិញថា បើធ្វើនយោបាយសុខៗ គេឲ្យចំណេញ(ចែកអាសនៈ) តើអ្នកណាមិនយក?
«បើច្បាប់បែងចែកមកថា ត្រូវតែបាន តើអ្នកណាមិនយក? ដូចជាមនុស្សម្នាក់នៅសុខៗគេវេចលុយឲ្យ១លានដុល្លារ ដោយលុយនោះបានមកស្របច្បាប់តើអ្នកណាមិនយកលុយនោះ? ដូច្នេះអ្នកនយោបាយបើនៅសុខៗ គេឲ្យចំណេញតើអ្នកណាមិនយក? តែយ៉ាងណាការទទួលយកអាសនៈនោះ ក៏ត្រូវរង់ចាំការសម្រេចរបស់សម្ដេចក្រុមព្រះ ប្រធានគណបក្ស ដើម្បីពិនិត្យលើទិដ្ឋភាពច្បាប់ជាក់ស្ដែងដែរ»។ នេះជាការលើកឡើងរបស់លោក ញ៉េប ប៊ុនជិន។
សារព័ត៌មានថ្មីៗ មិនទាន់អាចសុំការបកស្រាយចំពោះការសម្រេចចិត្តទទួលអាសនៈពីគណបក្សសម្ព័ន្ធដើម្បីប្រជាធិបតេយ្យ ,គណបក្សសាធារណៈរដ្ឋប្រជាធិបតេយ្យ និងគណបក្សខ្មែរអភិវឌ្ឍសេដ្ឋកិច្ច ដែលអាចទទួលបានអាសនៈនៃការបែងចែកនោះឡើយ ។ រីឯអ្នកនាំពាក្យគណបក្សខ្មែរឈប់ក្រ លោក ស៊ិន សុវណ្ណារិទ្ធិ ក៏សុំមិនទាន់បកស្រាយលើបញ្ហានេះដែរ ដោយរង់ចាំការសម្រេចចិត្តពីលោក ក្រវ៉ាញ ដារ៉ន ប្រធានគណបក្សសិន។
តែយ៉ាងណាសម្រាប់គណបក្សសង្គ្រោះជាតិវិញ មិនពេញចិត្តចំពោះការអនុម័តសេចក្តីស្នើកែច្បាប់ទាំង៤ ដែលមានបំណងធ្វើទុក្ខគណបក្សខ្លួនឡើយ។ លោក អេង ឆៃអ៊ាង អនុប្រធានគណបក្សសង្គ្រោះជាតិ (CNRP) បានចាត់ទុកការយកច្បាប់បោះឆ្នោតទៅធ្វើវិសោធនកម្មដែលនាំឲ្យមានការបែងចែកអាសនៈរបស់គណបក្សនយោបាយមួយ ថាជាការប្លន់ឆន្ទៈប្រជាពលរដ្ឋ។ លោកបានចំអកថា អ្នកដែលទទួលយកអាសនៈពីការបែងចែកនេះ មានឈ្មោះថា «ទទួលផលចោរកម្ម» ទៀតផង។
Tag:
ញ៉េប ប៊ុនជិន
សេង សុខខេង
ហ្វ៊ុនស៊ិនប៉ិច
សញ្ជាតិកម្ពុជា
ច្បាប់
បោះឆ្នោត
© រក្សាសិទ្ធិដោយ thmeythmey.com