សេដ្ឋកិច្ចអន្តរជាតិ
អន្តរជាតិ
×![]()
ដោយ: តន ចាន់រិទ្ធារ៉ា
ប៉េកាំង៖ កំណាត់មហាកំផែង Badaling ដែលស្ថិតនៅជាយក្រុងប៉េកាំង គឺជាកន្លែងទាក់ទាញទេសចរណ៍ដ៏ធំមួយរបស់ចិន។ ក្នុងមួយឆ្នាំៗ ភ្ញៀសទេសចរច្រើនពូជសាសន៍ចំនួន៨លាននាក់ បានមកទស្សនាកំណាត់មហាកំផែងមួយនេះ។ មេដឹកនាំពិភពលោកជាច្រើនបានមកដល់ចំណុចប្រវត្តិសាស្ត្រមួយនេះដូចជាអតីតប្រធានាធិបតីអាមេរិក រីឆាត និកសុន អតីតនាយករដ្ឋមន្ត្រីអង់គ្លេស ម៉ាហ្ការេត ថាច់ឆឺ និងអតីតប្រធានាធិបតីរុស្ស៊ី បូរីស យែលស៊ីន ជាដើម។
មហាកំផែង Badaling ស្ថិតក្នុងតំបន់ Yanqing County ជាយក្រុងប៉េកាំង ដែលត្រូវចំណាយពេលធ្វើដំណើរយ៉ាងហោចណាស់ពីរម៉ោង។ កំណាត់មហាកំផែងនេះ គឺជាច្រកឆ្លងកាត់ដ៏សំខាន់មួយក្នុងចំណោមច្រកឆ្លងកាត់ទាំង៩ នៃមហាកំផែងទាំងមូល ព្រោះមិនត្រឹមជារនាំងការពារក្រុងប៉េកាំងចុងក្រោយឡើយ តែជាទីតាំងយុទ្ធសាស្ត្រផ្នែកកងទ័ពដ៏សំខាន់ផងដែរ។
សព្វថ្ងៃនេះ មហាកំផែង Badaling ក្លាយជាកន្លែងទេសចរណ៍ដ៏ទាក់ទាញ ព្រោះសំណង់មហាកំផែងនៅមានសភាពរឹងមាំ និងមានទេសភាពស្អាតដែរ។មកទល់ពេលនេះ កំណាត់មហាកំផែងមួយនេះទទួលភ្ញៀវទេសចរណ៍ច្រើនជាង២០០លាននាក់ហើយ ចាប់តាំងពីការចូលឈ្មោះក្នុងបញ្ជីសម្បត្តិបេតកភណ្ឌរបស់អង្គការ UNESCO ក្នុងឆ្នាំ១៩៩១ មក។ ក្នុងឆ្នាំ២០០៧ មហាកំផែងនេះ ក្លាយជារតនសម្បត្តិមួយក្នុងចំណោមវត្ថុអស្ចារ្យទាំង៧លើលោក
ក្រៅពីស្នាដៃស្ថាបត្យកម្មអស្ចារ្យហើយនោះ មហាកំផែង Badaling ក៏ជាកន្លែងគយគន់ទេសភាពស្រស់ត្រកាលដែរ ព្រោះមានទីតាំងខាងលើជ្រលង Guangou ។ ខែតុលា ជាពេលសមស្របបំផុតដើម្បីទស្សនាទិដ្ឋភាពព្រៃឈើនៅព័ទ្ធជុំវិញមហាកំផែងនេះ ព្រោះស្លឹកឈើដុសដេរដាស លាយឡំដោយពណ៌ក្រហម និងបៃតង។
សូមអញ្ជើញទស្សនារូបភាពនៃកំណាត់មហាកំផែង Badaling ៖
© រក្សាសិទ្ធិដោយ thmeythmey.com
