កីឡាជាតិ
ជាតិ
ស្វាយរៀងរបូត៣ពិន្ទុទាំងណាហ្គាវើលសល់សមាជិក១០នាក់ឯភ្នំពេញក្រោនរបូតពីតំបន់ Top 4
×![]()
ក្រុមព្រះខ័នរាជស្វាយរៀងបន្តរបូត៣ពិន្ទុក្រោយចាញ់ណាហ្គាវើលដែលសល់សមាជិកតែ១០នាក់ ២-១ នៅកីឡដ្ឋានស្តាតចាស់កាលពីរសៀលថ្ងៃទី២១ តុលា។ រីឯក្រុមភ្នំពេញក្រោនបានធ្លាក់ចេញពីតំបន់ Top 4 ក្រោយចាញ់ក្រសួងការពារជាតិ ១-០ នៅលើទឹកដីរបស់ខ្លួន ខណៈអគ្គស្នងការនគរបាលជាតិ(ប៉ូលិស)ទម្លាក់ក្រុមគីរីវង់សុខសែនជ័យពីក្របខណ្ឌមិត្តហ្វូនខេមបូឌានលីក។ ចំណែកបឹងកេតបានលត់ក្រុមមជ្ឈមណ្ឌលកំចាត់មីនកម្ពុជា(ស៊ីម៉ាក់) ៥-០ នៅលើទឹកដីខេត្តស្វាយរៀង។
ក្រោយចាញ់បឹងកេត ២-០ នៅលើទឹកដីរបស់ខ្លួនកាលពីសប្តាហ៍មុនក្រុមព្រះខ័នរាជស្វាយរៀងបានបន្តចាញ់ក្រុមណាហ្គាវើលក្នុងលទ្ធផល ២-១ ទាំងហួសចិត្តដ្បិតណាហ្គាវើលសល់សមាជិកតែ១០នាក់។ ការចាញ់ពីរប្រកួតជាប់គ្នានេះបានធ្វើឲ្យតំណែងកំពូលតារាងរបស់ក្រុមនេះកាន់តែរង្គោះរង្គើរ ខណៈបឹងកេត និងណាហ្គាវើលកំពុងតាមប្រជែងយ៉ាងប្រកៀកប្រកិត។
ក្នុងជំនួបដ៏តានតឹងនៅកីឡដ្ឋានស្តាតចាស់ខ្សែប្រយុទ្ធជនជាតិប្រេស៊ីល Diego Gama បានតែតបាល់បញ្ចូលទីនាំមុខ ១-០ ឲ្យណាហ្គាវើលនៅនាទីទី១៧ក្រោមការទាត់ចេញពីជ្រុងរបស់កីឡាករ ឆេង ម៉េង។ នៅនាទី៦០អ្នកចាំទី សំរិត សីហា បានរងពិន័យកាតក្រហមក្រោយហក់ចាប់បាល់ទៅបុកកីឡាករ Anderson Zogbe ឲ្យដួលពេញទំហឹងនៅតំបន់គ្រោះថ្នាក់។
តាមរយៈកាតក្រហមនេះបានផ្តល់ឱកាសមាសដល់ព្រះខ័នរាជស្វាយរៀងទទួលបានបាល់ពិន័យ១១ម៉ែត្រពីណាហ្គាវើលទៀតផង។ តែប្រធានក្រុម ប្រាក់ មុន្នីឧត្តម ដែលជាអ្នកទទួលភារកិច្ចដ៏សំខាន់នេះធ្វើមិនបានសម្រេចឡើយដោយមានការជួយសង្គ្រោះយ៉ាងល្អពីអ្នកចាំទី សំ សុគន្ធដារ៉ា ដែលដូរចូលជំនួសកីឡាករ Diego Gama។
ការពិន័យកាតក្រហមលើអ្នកចាំទី សំរិត សីហា ពីអាជ្ញាកណ្តាលនេះដែរបានធ្វើឲ្យមានការប្រកែកតវ៉ាយ៉ាងខ្លាំងពីសំណាក់លោក មាស ចាន់ណា គ្រូបង្វឹកក្រុមណាហ្គាវើល។ ប៉ុន្តែការប្រកែកតវ៉ានេះមិនគ្រាន់តែមិនបានផលប៉ុណ្ណោះទេ ថែមទាំងអាជ្ញាកណ្តាលសម្រេចដេញលោក ចាន់ណា ចេញពីទីលានប្រកួតទៀតផង។
ទោះបីបាត់បង់សមាជិក១នាក់ក៏ដោយ ណាហ្គាវើលរក្សាទម្រង់លេងយ៉ាងល្អក្នុងការទប់ទល់ជាមួយក្រុមព្រះខ័នរាជស្វយរៀង។ តែយ៉ាងណា កីឡាករ សារ៉េត គ្រីយ៉ា បានរកគ្រាប់បាល់តាមស្មើ ១-១ សម្រាប់ព្រះខ័នរាជស្វាយរៀងនៅនាទីទី៧៦។ បន្ទាប់មកកីឡាករ សុះ ស៊ូហាណា សម្រេចគ្រាប់ទី២ឲ្យណាហ្គាវើលនៅនាទីទី៨១ ដែលជាគ្រាប់ជ័យជម្នះ ២-១ សម្រាប់ណាហ្គាវើល។ ជ័យជម្នះនេះនាំឲ្យណាហ្គាវើលបាន៣ពិន្ទុបន្ថែមដើម្បីពង្រឹងទីតាំងលេខ៣របស់ខ្លួនឲ្យកាន់តែរឹងមាំជាមួយ៣៦ពិន្ទុ ខណៈព្រះខ័នរាជស្វាយរៀងឈរកំពូលតារាងដោយមាន៣៧ពិន្ទុ។
សម្រាប់ការប្រកួតនៅកីឡដ្ឋានខេត្តស្វាយរៀងក្រុមបឹងកេតបានលត់ក្រុមស៊ីម៉ាក់ក្នុងលទ្ធផល ៥-០ ដើម្បីបាន៣ពិន្ទុបន្តឈរលេខរៀងទី២បណ្តោះអាសន្នក្នុងសប្តាហ៍ទី១៨នៃពានរង្វាន់ក្របខណ្ឌមិត្តហ្វូនខេមបូឌានលីកដោយមាន៣៦ពិន្ទុ។ ចំណែកការប្រកួតនៅកីឡដ្ឋាន RSN ក្រុមទ័ពបានឡើងទៅឈរលេខរៀងទី៤ក្រោយទម្លាក់ម្ចាស់ផ្ទះភ្នំពេញក្រោនដោយជ័យជម្នះ ២-១។
ដោយឡែក ការប្រកួតនៅកីឡដ្ឋានស្តាតចាស់បន្តពីជំនួបរវាងណាហ្គាវើលនិងព្រះខ័នរាជស្វាយរៀង ក្រុមអគ្គស្នងការនគរបាលជាតិបានយកឈ្នះក្រុមគីរីវង់សុខសែនជ័យក្នុងលទ្ធផល ២-១។ ជ័យជម្នះនេះធ្វើឲ្យក្រុមឡើងមកពីលីកលំដាប់ទី២គីរីវង់សុខសែនជ័យធ្លាក់ពីក្របខណ្ឌលីកកំពូលទៅលេងលីកលំដាប់ទី២វិញនៅឆ្នាំក្រោយ។ បច្ចុប្បន្នក្រុមនេះកំពុងឈរតារាងដោយមាន៣ពិន្ទុ ដែលជាពិន្ទុមិនអាចគេចផុតពីតំបន់កាត់ចេញទោះបីនៅសល់៤ប្រកួតទៀតក៏ដោយ៕
© រក្សាសិទ្ធិដោយ thmeythmey.com
