កម្ពុជា កំពុងប្រឈមជាប់ឈ្មោះក្នុង«បញ្ជីប្រផេះ» របស់ក្រុមប្រឆាំងការសម្អាតប្រាក់កខ្វក់

ជាតិ

កម្ពុជា កំពុងប្រឈមជាប់ឈ្មោះក្នុង«បញ្ជីប្រផេះ» របស់ក្រុមប្រឆាំងការសម្អាតប្រាក់កខ្វក់

25, Oct 2017 , 9:19 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ កម្ពុជាកំពុងស្ថិតនៅមាត់ច្រកនៃ«បញ្ជីប្រផេះ» (Grey List) របស់ក្រុមប្រឆាំងការសម្អាតប្រាក់កខ្វក់អាស៊ីប៉ាស៊ីហ្វិច (APG)។ APG ទុករយៈពេល១៥ខែ ដើម្បីឲ្យកម្ពុជាគេចផុតពី«បញ្ជីប្រផេះ» ដែលអាចបង្កផលប៉ះពាល់ដល់អ្នកវិនិយោគក្នុងប្រទេសកម្ពុជា។

ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង (ACU) ហាក់មិនបដិសេធចំពោះការវាយតម្លៃរបស់APG ដែលបង្ហាញលទ្ធផលថា កម្ពុជាស្ថិតនៅមាត់ទ្វារចូលបញ្ជីប្រផេះ (Grey List) ដោយសារតែបញ្ហាសម្អាតប្រាក់នៅកម្ពុជាឡើយ។ លោក ឱម យ៉ិនទៀង បាននិយាយថា មូលហេតុដែលកម្ពុជាកំពុងប្រឈមនឹងច្រកចូលបញ្ជីប្រផេះនេះ ព្រោះតែកម្ពុជានៅមានការយល់ដឹងពីការសម្អាតប្រាក់នៅមានកម្រិត និងមានចំណុចខ្វះខាតជាច្រើនទៀតដែលត្រូវបំពេញ ដើម្បីទប់ស្កាត់បញ្ហាទាំងនេះ។

របាយការណ៍វាយតម្លៃរបស់ក្រុមប្រឆាំងការសម្អាតប្រាក់និងហិរញ្ញប្បទានភេរវកម្មអាស៊ីប៉ាស៊ីហ្វិច (APG) បានបង្ហាញថា កម្ពុជាគ្មានគោលនយោបាយសម្របសម្រួល និងផែនការសកម្មភាពប្រឆាំងការសម្អាតប្រាក់, មិនមានវិធានការតាមដានវិស័យដែលមានហានិភ័យ ដោយសារការសម្អាតប្រាក់, ខ្វះការស៊ើបអង្កេតការសម្អាតប្រាក់,ទណ្ឌកម្មលើការសម្អាតប្រាក់នៅទាបពេក,ខ្វះច្បាប់MLA,សមត្ថភាពអាជ្ញាធរកណ្ដាលនៅមានកម្រិត ,កម្ពុជាស្នើសុំMLAនិងបត្យាប័នតិចតួច និងFIUនៅខ្វះបុគ្គលិកជាដើម។

ឆ្លើយតបនឹងការវាយតម្លៃនេះលោក ឱម យ៉ិនទៀង បានបញ្ជាក់ថា កម្ពុជានឹងរៀបចំដាក់ចេញយុទ្ធនាការប្រឆាំង និងទប់ស្កាត់ការសម្អាតប្រាក់ និងហិរញ្ញប្បទានភេរវកម្ម នៅតាមធនាគារ និងមីក្រូហិរញ្ញវត្ថុ ឬនៅកន្លែងវេប្រាក់ជាដើម ។

ថ្លែងក្នុងសិក្ខាសាលាជំនាញស្តីពី ការប្រឆាំងការលាងសម្អាតប្រាក់ ដើម្បីប្រយុទ្ធប្រឆាំងអំពើពុករលួយ ដែលរៀបចំឡើងដោយ ACU និងធនាគារពិភពលោក នៅព្រឹកថ្ងៃទី២៥ តុលានេះ ប្រធានអង្គភាពប្រឆាំងអំពើពុករលួយ បាននិយាយដូច្នេះថា៖«ដើម្បីកែលម្អនិងបំពេញចំណុចខ្វះខាត ទី១ដាក់ចេញយុទ្ធនាការកសាងនិងប្រមូលកម្លាំងពាក់ព័ន្ធ ដើម្បីឆ្លើយតបសភាពការណ៍ឲ្យបានឆាប់ទាន់ពេលនិងមានប្រសិទ្ធភាពសម្រាប់ការប្រឆាំងការសម្អាតប្រាក់ និងហិរញ្ញប្បទានភេរវកម្ម ។ ទី២ ត្រូវមានចំណាត់ការប្រឆាំង និងទប់ស្កាត់ការសម្អាតប្រាក់ និងហិរញ្ញប្បទានភេរវកម្ម នៅតាមធនាគារ នៅតាមអង្គភាពមីក្រូហិរញ្ញវត្ថុ និងនៅតាមស្ថាប័ន និងវិស័យមិនមែនហិរញ្ញវត្ថុដូចជា កន្លែងវេប្រាក់ កាស៊ីណូ កន្លែងអចលនទ្រព្យជាដើម។ ឯទី៣ បង្កើនការស៊ើបអង្កេត ហើយមិនត្រឹមបង្កើនការសង្កេតទេ គឺបង្កើនការដាក់ទោសថែមទៀត…»។

សូមស្ដាប់សំឡេង៖

ការលាងសម្អាតប្រាក់ និងហិរញ្ញប្បទានភេរវកម្ម ភាគច្រើនកើតចេញមកពីការប្រព្រឹត្តអំពើពុករលួយ ជួញដូរគ្រឿងញៀន ជួញដូរមនុស្ស ឆបោក បទល្មើសឆ្លងដែនជាដើម។ នេះជាបញ្ជាក់របស់លោក ឱម យ៉ិនទៀន ដែលបន្ថែមថា អ្នកទទួលបានប្រាក់កខ្វក់ពីវិស័យទាំងនេះ តែងតែបង្កើនជំនួញអ្វីមួយ នៅក្នុងវិស័យណាផ្សេងទៀត ដើម្បីលាងសម្អាតប្រាក់។ បើតាមលោក ឱម យ៉ិនទៀន មូលហេតុដែលនគរបាលយុត្តិធម៌មិនទាន់អាចទប់ស្កាត់ការលាងសម្អាតប្រាក់នៅកម្ពុជា ដោយសារតែមិនមានភស្តុតាង និងឯកសារ និងការខ្វះខាតជំនាញស៊ើបអង្កេតលើការសម្អាតប្រាក់ និងហិរញ្ញប្បទានភេរវកម្មនេះ។

កម្ពុជាកំពុងស្ថិតនៅមាត់ច្រកនៃ«បញ្ជីប្រផេះ» (Grey List) របស់ក្រុមប្រឆាំងការសម្អាតប្រាក់កខ្វក់អាស៊ីប៉ាស៊ីហ្វិច (APG)។ APG ទុករយៈពេល១៥ខែ(គិតពីខែកក្ដដា១ឆ្នាំ២០១៧ ដល់តុលា ឆ្នាំ២០១៨) ដើម្បីគេចផុតពី«បញ្ជីប្រផេះ» ដែលកុំឲ្យបង្កផលប៉ះពាល់ដល់អ្នកវិនិយោគក្នុងប្រទេសកម្ពុជា។ កម្ពុជាត្រូវផ្ដល់របាយការណ៍រយៈពេល៣ខែម្ដង ដល់ក្រុមប្រឆាំងការសម្អាតប្រាក់កខ្វក់អាស៊ីប៉ាស៊ីហ្វិច ត្រួតពិនិត្យនឹងវាយតម្លៃ។នេះបើតាមរបាយការណ៍វាយតម្លៃ (Mutual Evaluation Report-MER) ដែលបានធ្វើនៅក្នុងកិច្ចប្រជុំប្រចាំឆ្នាំលើកទី២០ របស់APG នៅទីក្រុងកូឡុំបូ ប្រទេសស្រីលង្កា។

«បញ្ជីប្រផេះ» គឺជាសញ្ញាហានិភ័យមួយដល់បណ្ដាប្រទេសនៅក្នុងពិភពលោក នៃសមាជិកក្រុមប្រឆាំងការសម្អាតប្រាក់កខ្វក់អាស៊ីប៉ាស៊ីហ្វិច (APG) ដែលសង្ស័យថា មានករណីចរាចរលើការសម្អាតប្រាក់ និងហិរញ្ញប្បទានភេរវកម្មនេះ។ ដូច្នេះបើកម្ពុជាមិនអាចទប់ស្កាត់ករណីសម្អាតប្រាក់ និងហិរញ្ញប្បទានភេរវកម្មបានទេ នោះកម្ពុជានឹងជាប់ឈ្មោះក្នុង«បញ្ជីប្រផេះ»របស់ APG ដែលអាចបង្កការពិបាកដល់អ្នកវិនិយោគមួយចំនួន ដូចជា វិស័យធនាគារនឹងត្រូវបានគេចាត់វិធានការតឹងរឹង ចំពោះការវេរប្រាក់ឆ្លងកាត់កម្ពុជា និងការវេរប្រាក់ពីកម្ពុជាទៅប្រទេសដទៃ ពោលបានន័យថា ការវេរប្រាក់ទាំងនេះ ត្រូវប្រឈមនឹងការតាមដានត្រួតពិនិត្យ ពីសំណាក់អាមេរិក(ប្រាក់ដុល្លារ) និងសហគមន៍អឺរ៉ុប(ប្រាក់អឺរ៉ូ) មុនដាក់បញ្ចូលក្នុងគណនីធនាគារ។ ត្រង់នេះបានន័យថា ការវេរប្រាក់ចេញចូលកម្ពុជា នឹងមានដំណើរការយឺតយ៉ាវ ដែលប៉ះពាល់ដល់វិនិយោគិនធ្ងន់ធ្ងរ ដែលធ្វើឲ្យអ្នកវិនិយោគធំៗ មិនចង់មកដាក់ទុននៅកម្ពុជា។ ជាពិសេសធនាគារក្នុងស្រុក នឹងក្លាយជាអ្នករងគ្រោះមុនគេ ក្នុងការជួបបញ្ហាធុរកិច្ចរបស់ខ្លួន ហើយសេដ្ឋកិច្ចនឹងធ្លាក់ចុះជាដើម។

ដោយសារបញ្ហានេះទើបអង្គភាពប្រឆាំងអំពើពុករលួយ ACU និងធនាគារពិភពលោក រៀបចំសិក្ខាសាលា ដែលប្រព្រឹត្តិទៅរយៈ៣ថ្ងៃ ចាប់ពីថ្ងៃទី២៥ ដល់២៧ តុលា ដើម្បីស្វែករកដំណោះស្រាយ និងវិធានការប្រឆាំង និងទប់ស្កាត់តាមផ្លូវច្បាប់ លើការលាងសម្អាតប្រាក់ និងហិរញ្ញប្បទានភេរវកម្មនេះ។

បើតាមការប៉ាន់ស្មានរបស់IMF សកម្មភាពសម្អាតប្រាក់មានប្រហែល៣ភាគរយទៅដល់៥ភាគរយ នៃGDPរបស់ពិភពលោក មានន័យថាក្នុងចំណោមប្រាក់២០ដុល្លារ មាន១ដុល្លារក្លាយជាកម្មវត្ថុនៃការសម្អាតប្រាក់៕