ជាតិ
នយោបាយជាតិ
ច្បាប់ «យកអាសនៈនៃបក្សដែលត្រូវរំលាយ ទៅឲ្យបក្សផ្សេង» ដាក់ឲ្យអនុវត្តពីថ្ងៃនេះតទៅ
× ភ្នំពេញ៖ សេចក្តីស្នើសុំឲ្យកែច្បាប់ចំនួន៤ ដែលមានខ្លឹមសារជារួមថា «រាល់អាសនៈគណបក្សដែលត្រូវបានរំលាយចោល ត្រូវបែងចែកទៅឲ្យគណបក្សដទៃ» បានក្លាយជាច្បាប់ហើយ បន្ទាប់ពី ព្រះមហាក្សត្រ បានឡាយព្រះហស្តលេខាលើព្រះរាជក្រឹម នៅថ្ងៃទី២៥ ខែតុលា ឆ្នាំ២0១៧នេះ ដើម្បីប្រកាសឲ្យប្រើប្រាស់ជាផ្លូវការ។
លោក ឡេង ប៉េងឡុង អ្នកនាំពាក្យរដ្ឋសភា ប្រាប់សារព័ត៌មានថ្មីៗថា ច្បាប់ទាំង៤ ត្រូវចូលជាធរមាន ហើយដាក់ឲ្យអនុវត្តភ្លាមតែម្តង បន្ទាប់ពីព្រះមហាក្សត្រ ឡាយព្រះហស្តលេខា។ លោក បញ្ជាក់យ៉ាងដូច្នេះថា៖«ច្បាប់ទាំងនេះ ត្រូវដាក់ឲ្យប្រើប្រាស់ទូទាំងប្រទេសពីថ្ងៃនេះទៅ ព្រោះជាការប្រញាប់»។
ការកែច្បាប់ទាំង៤ ដែលកើតចេញពីការផ្តួចផ្តើមរបស់ក្រុមតំណាងរាស្ត្រគណបក្សប្រជាជនកម្ពុជា ទទួលបានការយល់ព្រមជាបន្តបន្ទាប់ពីស្ថានប័នជាតិកំពូលៗ ដែលរួមមាន រដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញ។ ស្ថាប័នទាំងនេះ ចាត់ទុកខ្លឹមសារថ្មីនៃច្បាប់ទាំងនេះ ថាស្របនឹងរដ្ឋធម្មនុញ្ញ។
ច្បាប់ទាំង៤ ដែលត្រូវបានកែប្រែ រួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ៕
Tag:
ច្បាប់ចែកអាសនៈ
ព្រះមហាក្សត្រ
© រក្សាសិទ្ធិដោយ thmeythmey.com