ជាតិ
សុខភាព
២៥ឆ្នាំ គន្ធបុប្ផាចំណាយ៦៣២លានដុល្លារ តែការព្យាបាលមានប្រសិទ្ធភាពខ្ពស់
× ថ្ងៃទី២ ខែវិច្ឆិកា គឺជាខួប២៥ឆ្នាំ នៃការបង្កើតមន្ទីរពេទ្យគន្ធបុប្ផា។ រយៈពេល២៥ឆ្នាំមកនេះ មូលនិធិគន្ធបុប្ផា បានចំណាយថវិកាអស់ ៦៣២លានដុល្លារ។ ទោះយ៉ាងណា ក៏ត្រូវបានគេកត់ត្រាជាសកលថា មន្ទីរពេទ្យយើងមានប្រសិទ្ធភាព ព្យាបាលជាសះស្បើយខ្ពស់លើសគេ ធៀបនឹងការចំណាយ។ នេះបើតាមលិខិត របស់មន្ទីរពេទ្យ ផ្សាយនៅថ្ងៃទី២ ខែវិច្ឆិកា។
លិខិតដដែល ក៏បង្ហាញតួលេខអ្នកជំងឺដែលមកពីគ្រប់ច្រកល្អកនៃប្រទេសកម្ពុជា ហើយភាគច្រើនមានជីវភាពទីទ័លក្រ។ ហេតុនេះហើយ ទើបរាល់ការព្យាបាលទាំងអស់ គឺឥតគិតថ្លៃសម្រាប់គ្រប់ៗគ្នា។
កុមារមានជំងឺ និងស្ត្រីមានផ្ទៃពោះ ចំនួន១៦,៨២២,២២៥ករណី ត្រូវបានពិនិត្យ និងព្យាបាលនៅក្នុងផ្នែកពិគ្រោះជងឺក្រៅ ។ កុមារមានជំងឺធ្ងន់ធ្ងរចំនួន១,៨៥៣,៥១០ ត្រូវបានដាក់ឲ្យសម្រាកនៅក្នុងមន្ទីរពេទ្យ។ ស្ត្រីមានផ្ទៃពោះចំនួន ២៤៥,៥៩១នាក់ បានសម្រាលកូននៅក្នុងមន្ទីរសម្ភពនៃមន្ទីរពេទ្យជ័យវ័រ្មនទី៧(គន្ធបុប្ផាទី៣)។
ដូច្នេះហើយ ដែល២៥ឆ្នាំកន្លងទៅនេះ មន្ទីរគន្ធបុប្ផា បានក្លាយទៅជាមន្ទីរពេទ្យគំរូមួយ និងដែលកាកបាទក្រហមកម្ពុជា និងរាជរដ្ឋាភិបាលកម្ពុជា បានទទួលស្គាល់ និងអរគុណ ដល់សកម្មភាពដ៏ជោគជ័យ របស់មន្ទីរពេទ្យគន្ធបុប្ផា ថាបានចូលរួមកាត់បន្ថយ«អត្រាស្លាប់របស់មាតា និងទារក» នៅក្នុងប្រទេសកម្ពុជាថែមទៀតផង។
មុនបញ្ចប់ លោក បេអាត រីច្នឺ ក៏បានថ្លែងអរគុណដល់ការគាំទ្ររបស់សប្បុរសជនទាំងអស់គ្នា ដែលបានញ៉ាំងឲ្យបុគ្គលិកកម្ពុជាយើងទាំង២៥០០នាក់ សម្រេចបានស្នាដៃដ៏ធំធេងនេះ ជាមួយនឹងការបង្ហាញពាក្យស្លោក«ប្រាក់១ហ្វ្រង់ ឬ១ដុល្លារ គឺជាការចូលរួមចំណែក ជួយព្យាបាល ជួយសង្គ្រោះជីវិត និងជួយការពារជំងឺ»៕
© រក្សាសិទ្ធិដោយ thmeythmey.com