ជាតិ
សម្តេច ហ៊ុន សែន៖«កម្ពុជាគ្មានវិបត្តិនយោបាយ ក៏គ្មានអ្នកទោសនយោបាយដែរ» រូបពីហ្វេសប៊ុកសម្តេច ហ៊ុន សែន
× សម្តេច ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា កម្ពុជាគ្មានវិបត្តិនយោបាយ ក៏គ្មានអ្នកទោសនយោបាយដែរ។ ផ្ទុយទៅវិញប្រទេសកម្ពុជា កំពុងមានស្ថិរភាពនយោបាយ ហើយប្រជាពលរដ្ឋកំពុងរស់នៅដោយសុខសាន្ត។
សំណេរនៅក្នុងហ្វេសប៊ុកផ្ទាល់ខ្លួន អមដោយរូបថតនាពិធីសំណេះសំណាលជាមួយកម្មករ-កម្មការិនី ចំនួន៤ពាន់នាក់នៅមជ្ឈមណ្ឌលកោះពេជ្រ សម្តេច ហ៊ុន សែន បានសរសេរដូច្នេះ៖«ខ្ញុំសូមបញ្ជាក់ថា កម្ពុជាគ្មានវិបត្តិនយោបាយទេ គឺមានតែអ្នកនយោបាយដែលមានវិបត្តិដោយខ្លួនឯងផ្ទាល់ ហើយប្រទេសយើង ក៏គ្មានអ្នកទោសនយោបាយដែរ មានតែអ្នកនយោបាយ ដែលប្រព្រឹត្តបទឧក្រិដ្ឋដោយខ្លួនឯង»។
ការបញ្ជាក់ដូច្នេះ ជាការឆ្លើយតបរបស់នាយករដ្ឋមន្ត្រីកម្ពុជានៅពេលនេះ គឺធ្វើឡើង៣ថ្ងៃ បន្ទាប់ពីតុលាការកំពូលបានរំលាយគណបក្សសង្គ្រោះជាតិដែលជាបក្សប្រឆាំងធំ និងមានឥទ្ធិពលជាងគេនៅកម្ពុជា។ សហគមន៍អន្តរជាតិ ដែលមានដូចជាសហភាពអឺរ៉ុប អាមេរិក អូស្តាលី និងការិយាល័យសិទ្ធិមនុស្សនៃអង្គការសហប្រជាជាតិ ជាដើម បានប្រតិកម្ម និងរិះគន់ជាបន្តបន្ទាប់ ចំពោះការរំលាយបក្សគណបក្សសង្គ្រោះជាតិ៕
© រក្សាសិទ្ធិដោយ thmeythmey.com