ជាតិ
សិល្បះ
ថាសចម្រៀងថ្មីរបស់ លោក យឹង យន រៀបរាប់ពីការស្រឡាញ់ទឹកដីអាមេរិក សម្ពោធនៅថ្ងៃសុក្រនេះ
× ថាសចម្រៀងថ្មីដែលមានឈ្មោះថា «ស្រឡាញ់សហរដ្ឋអាមេរិក៖ ដំណើររបស់យឹង យននៅក្នុងសហរដ្ឋអាមេរិក» ឬ "Lovin' USA: Yorn Young's Journey Across America" នឹងសម្ពោធនៅល្ងាចថ្ងៃសុក្រ ទី១៥ ខែធ្នូនេះ នៅCKCC។ ចម្រៀងនេះ ត្រូវបានផលិត គ្រាដែល លោក យឹង យន បានចូលរួមក្នុងកម្មវិធីផ្លាស់ប្តូរផ្នែកតន្ត្រី ដែលមានឈ្មោះថា OneBeat នៅសហរដ្ឋអាមេរិក កាលពីឆ្នាំ២០១៣ ។
ស្ថានទូតអាមេរិក រៀបចាំការប្រគំតន្ត្រី ដើម្បីសម្ពោធថាសចម្រៀងរបស់លោក យឹង យន រៀបរាប់ពីទឹកដីសហរដ្ឋអាមេរិក នៅម៉ោង៦ល្ងាច ថ្ងៃសុក្រ ទី១៥ ខែធ្នូនេះ នៅមជ្ឈមណ្ឌសហប្រតិបត្តិការកម្ពុជា កូរ៉េ (CKCC)។ ថាសចម្រៀងថ្មីដែលមានឈ្មោះថា «ស្រឡាញ់សហរដ្ឋអាមេរិក៖ ដំណើររបស់យឹង យននៅក្នុងសហរដ្ឋអាមេរិក» ឬ "Lovin' USA: Yorn Young's Journey Across America"។
តាមសេចក្តីជូនព័ត៌មានរបស់ស្ថានទូតអាមេរិក សាធារណជនអាចចូលទស្សនាដោយមិនគិតថ្លៃ ហើយទស្សនិកជនម្នាក់ៗ នឹងទទួលបានថាសចម្រៀងថ្មីនេះ ដោយឥតគិតថ្លៃ។
នៅឆ្នាំ២០១៣ លោក យឹង យន បានចូលរួមនៅក្នុងកម្មវិធីផ្លាស់ប្តូរផ្នែកតន្ត្រី ដែលមានឈ្មោះថា OneBeat នៅសហរដ្ឋអាមេរិក។ កម្មវិធីផ្លាស់ប្តូរនោះ មានការចូលរួមនៃតន្ត្រីករ មកពីទូទាំងពិភពលោក ដើម្បីសហការគ្នា និងបង្កើតបទចម្រៀងដើម ហើយត្រូវបានឧបត្ថម្ភដោយសហរដ្ឋអាមេរិក។ លោក យនរំភើប ចំពោះការចូលរួមនោះ ហើយបានសរសេរបទចម្រៀងខ្មែរចំនួន ១១ បទ ជាស្នាដៃដើម របស់លោក ស្តីពីរដ្ឋនានា ក្នុងសហរដ្ឋអាមេរិក ដូចជារដ្ឋ Minnesota, North Carolina និងរដ្ឋ Florida ហើយការប្រគំតន្ត្រីនេះ នឹងបង្ហាញបទចម្រៀងទាំង ១១ នោះ នៅលើថាសចម្រៀងមួយជាលើកដំបូង។
ក្រៅពីនេះទៀត នៅថ្ងៃសុក្រ ពីម៉ោង ២ រសៀល ដល់ម៉ោង ៣កន្លះ អ្នកចម្រៀងនេះ នឹងដំណើរការសិក្ខាសាលាមួយ សម្រាប់ទស្សនិកជនជាក្រុមតូចមួយ ស្តីពីអំណាចនៃដូរ្យតន្ត្រី។ ក្រៅពីនេះទៀត លោកនឹងនិយាយពីអ្វី ដែលោកបានរៀនសូត្រ ពីកម្មវិធីផ្លាស់ប្តូរនេះ៕
© រក្សាសិទ្ធិដោយ thmeythmey.com