ជាតិ
សិល្បះ
ក្រសួងព័ត៌មានហាមចាក់ផ្សាយបទ «គ្រូបង្រៀនស្រវឹងស្រា»
× គ្រូបង្រៀនត្រូវតែជាបុគ្គលខ្ពង់ខ្ពស់ និងគួរឲ្យគោរពជាដរាប។ មូលហេតុបែបនេះហើយ ទើបលោក ខៀវ កាញារីទ្ធ កាល ពីថ្ងៃទី១៩ ខែធ្នូ បានសរសេរលិខិតទៅម្ចាស់ស្ថានីយវិទ្យុ-ទូរទស្សន៍ទាំងអស់ អំពីការហាមចាក់ផ្សាយបទចម្រៀងដែលមានចំណងជើងថា «គ្រូបង្រៀនស្រវឹងស្រា» របស់ផលិតកម្មថោន។
ច្រៀងដោយតារាចម្រៀងខ្មែរ-សុរិន្ទ ចេន សាយចៃនៃផលិតកម្មថោន បទ «គ្រូបង្រៀនស្រវឹងស្រា» ត្រូវបានចាត់ទុកថា មានខ្លឹមសារបន្តុះបង្អាប់ ប្រមាថគ្រូបង្រៀន ដែលថា ផឹកស្រាស្ទើររាល់ថ្ងៃ ស្រវឹងស្ទើររាល់ថ្ងៃ វាចាធំក្លិនតែស្រា។ លោក ខៀវ កាញារីទ្ធ បានលើកឡើងថា៖ «ខ្លឹមសារនៃបទចម្រៀងនេះ បានប្រាសចាកអំពីអកប្បករិយា និងសីលធម៌សេចក្តីថ្លៃថ្នូររបស់គ្រូបង្រៀនទូទៅ […] វាបានដក់ជាប់នឹងអារម្មណ៍កុមារតូចៗ ដែលពុំទាន់មានមូលដ្ឋាននៃការពិចារណាច្បាស់លាស់នៅឡើយ»។
ដើម្បីចៀសវាងផលអវិជ្ជមាន និងប៉ះពាល់ដល់អារម្មណ៍កិត្តិយស និងសេចក្តីថ្លៃថ្នូរគ្រូបង្រៀន លោករដ្ឋមន្ត្រីក្រសួងព័ត៌មាន បានប្រាប់ទៅម្ចាស់ស្ថានីយវិទ្យុ-ទូរទស្សន៍ទាំងអស់កុំចាក់ផ្សាយបទ «គ្រូបង្រៀនស្រវឹងស្រា» ចាប់ពីថ្ងៃដែលខ្លួនបានជូនដំណឹង។
យោងតាមឃ្លីបវីដេអូផ្សព្វផ្សាយមួយ តារាចម្រៀង ចេន សាយចៃ លោក យឹម តាស្រង់ ដែលជាអ្នកនិពន្ធ និងលោក Tho Meet អ្នកនិពន្ធបទភ្លេង សុទ្ធតែអះអាង ពីចេតនារបស់ខ្លួនក្នុងជួយសង្គម តាមរយៈសារអប់រំនៅក្នុងបទចម្រៀង។
អ្នកនាង ចេន សាយចៃ រីករាយដែលខ្លួនអាចជួយសង្គមតាមបទចម្រៀង ដោយមិនផ្តោតតែលើអត្ថន័យស្នេហាអូនបង។ ជាមួយគ្នានេះ លោក យឹម តាស្រង់ថា បទ «គ្រូបង្រៀនស្រវឹងស្រា» លើកឡើងពីទិដ្ឋភាពជាក់ស្តែង ប៉ុន្តែមិនមែនឆ្លុះបញ្ចាំងពីទង្វើគ្រូបង្រៀនទាំងអស់នោះឡើយ៕
© រក្សាសិទ្ធិដោយ thmeythmey.com