ជាតិ
តុលាការ កំពុងចាត់ការបណ្តឹងលើកទី២របស់អតីតបក្សសង្គ្រោះជាតិ ដែលសុំជម្រះក្តីឡើងវិញ (ពីឆ្វេងទៅស្តាំ) លោកមេធាវី ផែង ហេង និងអតីតតំណាងរាស្រ្តគណបក្សសង្គ្រោះជាតិ លោក អ៊ូ ច័ន្ទរ័ត្ន យកបណ្តឹងទៅដាក់នៅតុលាការកំពូល កាលពីថ្ងៃ២៨ ខែធ្នូ ឆ្នាំ២0១៧។ រូបភាពពីគណនីហ្វេសប៊ុក Chhoeun Chhum
× ភ្នំពេញ៖ មន្ត្រីផ្នែករដ្ឋបាលនៃតុលាការកំពូល បានទទួលបណ្តឹងជាលើកទីពីររបស់លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ រួចហើយ កាលពីថ្ងៃទី២៨ ខែធ្នូ ឆ្នាំ២0១៧។
លោក អ៊ូ ច័ន្ទរ័ត្ន ដែលទើបនឹងត្រឡប់មកពីបរទេស បានប្រាប់សារព័ត៌មានថ្មីៗថា ការដាក់បណ្តឹងលើកទីពីរនេះ ដើម្បីទាមទារបីចំណុចធំៗ ដែលរួមមាន សុំឲ្យជម្រះក្តីឡើងវិញ លើការរំលាយគណបក្សសង្គ្រោះជាតិ, សុំឲ្យការពារអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ និងអាសនៈក្រុមប្រឹក្សាឃុំ សង្កាត់ និងសុំឲ្យផ្តល់សិទ្ធិនយោបាយដល់ថ្នាក់ដឹកនាំ១១៨រូបនៃគណបក្សសង្គ្រោះជាតិ។ អតីតតំណាងរាស្ត្រគណបក្សសង្គ្រោះជាតិរូបនេះ និយាយដូច្នេះថា៖«ខ្ញុំ គិតថា បើតុលាការ ចង់ផ្តល់យុត្តិធម៌ ដល់ប្រជាពលរដ្ឋ និងក្រុមប្រឹក្សាទាំងអស់ពិតមែន តុលាការ អាចនឹងពិចារណា ដើម្បីជម្រះឡើងវិញ»។
ដោយឡែកអាសនៈក្នុងរដ្ឋសភា លោក អ៊ូ ច័ន្ទរ័ត្ន អះអាងថា មិនទាមទារនោះទេ។ លោក លើកឡើងថា អាសនៈក្នុងរដ្ឋសភា ត្រូវបានបែងចែកអស់ហើយ ហើយម្យ៉ាងទៀតក៏ជិតផុតអាណត្តិដែរ ដូច្នេះសុខចិត្តប្រគល់ឲ្យគណបក្សដទៃចុះ។
លោក អ៊ុក គឹមសិទ្ធិ អគ្គព្រះរាជអាជ្ញរង និងជាអ្នកនាំពាក្យនៃមហាអយ្យការអមតុលាការកំពូល បានប្រាប់សារព័ត៌មានថ្មីៗថា ដោយសារតែលោក អ៊ូ ច័ន្ទរ័ត្ន ទើបនឹងដាក់បណ្តឹងនេះ ដូច្នេះតុលាការកំពូល មិនទាន់អាចចាត់ការភ្លាមៗនោះទេ។ លោក បកស្រាយដូច្នេះថា៖«ខ្ញុំ មិនទាន់និយាយអ្វីបានទេ ដោយសារតែតុលាការទើបនឹងទទួលបាន។ ខ្ញុំគ្រាន់តែបញ្ជាក់ថា តុលាការ នឹងចាត់ការតាមនីតិវិធី»។
សូមរម្លឹកថា បណ្តឹងលើកទីមួយរបស់អតីតគណបក្សសង្គ្រោះជាតិ ដែលសុំឲ្យជម្រះឡើងវិញ ត្រូវបានតុលាការកំពូលបដិសេធ៕
Tag:
តុលាការ
អ៊ូ ច័ន្ទរ័ត្ន
បណ្តឹង
CNRP
© រក្សាសិទ្ធិដោយ thmeythmey.com