ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
រថយន្ត
មូលនិធិទ្រទ្រង់របរស៊ីក្លូរបស់នាយករដ្ឋមន្ត្រី នឹងលើកស្ទួយការអភិរក្សស៊ីក្លូ
03, Jan 2018 ,
11:07 am
រូបភាព
×
ដោយ:
លាង ដឺលុច (Leang Delux)
សម្តេច ហ៊ុន សែន បានប្រកាសផ្តួចផ្តើមគំនិតបង្កើតមូលនិធិទ្រទ្រង់កម្មករប្រកបរបរធាក់ស៊ីក្លូនៅកម្ពុជា។ ក្រុមអ្នកតំណាងរបរក្រៅប្រព័ន្ធអត្ថាធិប្បាយដូចគ្នាថា មូលនិធិនេះនឹងជួយអភិរក្សរបរស៊ីក្លូឲ្យមាននិរន្តរភាព។
អត្ថបទទាក់ទង
តើពាក្យ«ស៊ីក្លូ»មានឫសគល់មកពីភាសាអ្វី? ហើយមានន័យយ៉ាងដូចម្តេច?
ប្រមុខរដ្ឋាភិបាលកម្ពុជាបានប្រកាសបរិច្ចាគថវិកា១០០លានរៀល ដើម្បីធ្វើជាទុនដំបូងក្នុងការបង្កើតមូលនិធិទ្រទ្រង់របបស៊ីក្លូ។ សេចក្តីសម្រេចនេះត្រូវបានប្រកាសដោយសម្តេចនាយករដ្ឋមន្ត្រីខ្លួនឯងនាព្រឹកថ្ងៃទី៣ខែមករានេះ នៅក្នុងជំនួបជាមួយកម្មករកម្មការិនីក្នុងតំបន់ទួលសង្កែ។ ការប្រកាសបង្កើតមូលនិធិទ្រទ្រង់អាជីពធាក់ស៊ីក្លូ ធ្វើឡើងបន្ទាប់ពីសម្តេចបានឮពីការស្នើសុំរបស់ក្រុមអ្នកធាក់ស៊ីក្លូដែលចង់ឲ្យរដ្ឋាភិបាលជួយទ្រទ្រង់ក្រុមអ្នកធាក់ស៊ីក្លូ។ នៅក្នុងក្របខណ្ឌនៃការទ្រទ្រង់អាជីពអ្នកធាក់ស៊ីក្លូ សម្តេច ហ៊ុន សែន ក៏សម្រេចឲ្យកម្មករអ្នកប្រកបរបរធាក់ស៊ីក្លូទទួលបានការព្យាបាលពីមន្ទីរពេទ្យរដ្ឋដោយឥតបង់ថ្លៃផងដែរ។
ពីលើវេទិកាជួបជាមួយកម្មករកម្មការិនីរោងចក្រកាត់ដេរ សម្តេចនាយករដ្ឋមន្ត្រីបានណែនាំឲ្យលោកអភិបាលរាជធានីភ្នំពេញដឹកនាំការងារបង្កើតមូលនិធិនេះ ដោយត្រូវសរសេរលក្ខន្តិកៈតម្កល់នៅក្រសួងមហាផ្ទៃ។
សូមស្ដាប់សំឡេង៖
សម្តេច ហ៊ុន សែន ក៏នឹងស្វាគមន៍ជំនួយពីសប្បុរសជនដែលចង់ចូលរួមក្នុងមូលនិធិនេះផងដែរ។ សម្តេច ហ៊ុន សែន បន្ថែមយ៉ាងដូច្នេះ៖«ខ្ញុំនឹងឧបត្ថម្ភ១០លានរៀលទៀតក្នុងមួយខែ។ បានន័យថា ខ្ញុំនឹងចំណាយ១២០លានរៀលថែមទៀតក្នុងមួយឆ្នាំ ហើយយើងស្វាគមន៍ជំនួយសប្បុរសជននានាដែលចង់ចូលរួមក្នុងមូលនិធិនេះ»។
សេចក្តីសម្រេចរបស់ប្រមុខរដ្ឋាភិបាល បានធ្វើឲ្យក្តីសុបិន្តរបស់លោក អ៊ឹម សម្បត្តិ ប្រធានសមាគមអភិរក្សស៊ីក្លូ និងមុខរបរក្រៅប្រព័ន្ធ ក្លាយជាការពិត។ លោក អ៊ឹម សម្បត្តិ ដែលកំពុងគ្រប់គ្រងសមាជិកជាអ្នកធាក់ស៊ីក្លូប្រមាណ១២០នាក់ក្នុងពេលបច្ចុប្បន្ននេះ បានអត្ថាធិប្បាយថា មូលនិធិនេះនឹងទ្រទ្រង់គំនិតនៃការអភិរក្សស៊ីក្លូឲ្យមាននិរន្តរភាព។
លោក អ៊ឹម សម្បត្តិ ពន្យល់យ៉ាងដូច្នេះ៖«អ្វីដែលខ្ញុំធ្លាប់បានគិតសម្រាប់ការអភិរក្សរបរស៊ីក្លូនេះ គឺត្រូវមានទីតាំងមួយកន្លែងដែលអាចចត និងថែរក្សាស៊ីក្លូបាន។ វាអាចចាត់ទុកជាសារមន្ទីរស៊ីក្លូក៏បាន។ ទីតាំងនេះគ្រប់គ្រងដោយរដ្ឋាភិបាលក៏បានដែរ»។ ប្រធានសមាគមអភិរក្សស៊ីក្លូ បានបន្តទៀតថា៖«សព្វថ្ងៃនេះ ដោយសារតែមិនមានទីកន្លែងសមរម្យ ស៊ីក្លូជាច្រើនត្រូវបានទុកចោលក្រោមភ្លៀង និងកំដៅថ្ងៃ ដែលធ្វើឲ្យវាឆាប់ខូច»។
លោក អ៊ឹម សម្បត្តិ បានបញ្ជាក់ឲ្យដឹងថា នៅក្នុងរាជធានីមានចំនួនស៊ីក្លូសរុបប្រមាណ៤០០គ្រឿង ប៉ុន្តែមានកម្មករប្រើប្រាស់តែប្រមាណជាង២០០គ្រឿងប៉ុណ្ណោះ។
ពាក់ព័ន្ធនឹងការបង្កើតមូលនិធិទ្រទ្រង់របរស៊ីក្លូដែលស្ទើរតែបាត់បង់នេះ សម្តេច ហ៊ុន សែន ក៏បានណែនាំឲ្យលោកអភិបាលរាជធានីធ្វើទំនាក់ទំនងជាមួយលោក វន់ ពៅ ដែលជាប្រធានសមាគមប្រជាធិបតេយ្យឯករាជ្យ និងសេដ្ឋកិច្ចក្រៅប្រព័ន្ធចូលរួមផ្តល់គំនិតផងដែរ។
លោក វន់ ពៅ បានប្រាប់សារព័ត៌មានថ្មីៗតាមទូរសព្ទថា លោកនឹងគាំទ្រគំនិតបង្កើតមូលនិធិនេះរបស់សម្តេច ហ៊ុន សែន។ លោក វន់ ពៅ បានបញ្ជាក់យ៉ាងដូច្នេះ៖«មូលនិធិនេះនឹងជួយដោះស្រាយការលំបាក និងជីវភាពរបស់អ្នកប្រកបរបរធាក់ស៊ីក្លូ ដែលផ្ញើជីវិតនៅលើផ្លូវថ្នល់ដ៏គ្រោះថ្នាក់។ ម្យ៉ាងទៀត វាក៏នឹងជួយដល់ការអភិរក្សរបរស៊ីក្លូដែលជារបរដឹកជញ្ជូនបែបបុរាណមួយ ហើយដែលបានក្លាយជាអត្តសញ្ញាណរបស់រាជធានីភ្នំពេញផងដែរ»។
សម្រាប់លោក អ៊ឹម សម្បត្តិ វិញ មូលនិធិនេះក៏នឹងអាចលើកទឹកចិត្តឲ្យកម្មករអ្នកធាក់ស៊ីក្លូមួយចំនួនដែលមានបំណងចង់បញ្ចប់របរនេះ ឲ្យនៅបន្តអាជីពនេះទៅមុខទៀត។
សព្វថ្ងៃនេះ ស៊ីក្លូបានក្លាយជាផលិតផលទេសចរណ៍មួយដែរសម្រាប់ភ្ញៀវទេសចរបរទេស។ សមាគមអភិរក្សស៊ីក្លូបានធ្វើការជាមួយក្រុមហ៊ុនភ្នាក់ងារទេសចរណ៍នានា ដើម្បីធ្វើដំណើរទស្សនារាជធានីតាមរយៈស៊ីក្លូនេះ។ ជាក្រុមអ្នកធាក់ស៊ីក្លូដែលមិនប្រើប្រាស់បារីទៀតផង៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
មូលនិធិ
ស៊ីក្លូ
ហ៊ុន សែន
វន់ ពៅ
អ៊ឹម សម្បត្តិ
Cyclo
© រក្សាសិទ្ធិដោយ thmeythmey.com
អត្ថបទពេញនិយម
ដំណឹងបឋម៖ ករណីផ្ទុះឃ្លាំងគ្រាប់នៅបន្ទាយភូមិភាគ៣ ក្រុងច្បារមន មានអ្នកស្លាប់ និងរបួសច្រើននាក ...
2 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
ផ្សារដើមគរថ្មី លើផ្ទៃដី៣០ហិកតា ត្រូវបានដាក់ដំណើរការជាផ្លូវការហើយ
2 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
5 ថ្ងៃ
តើពាក្យ «ដុតដៃដុតជើង» មានន័យដូចម្តេច?
4 ថ្ងៃ
អត្ថបទពេញនិយមបន្ថែម