សេដ្ឋកិច្ចអន្តរជាតិ
អន្តរជាតិ
ជប៉ុនបើកទ្វារទទួលចិនឲ្យចូលរួមក្នុងគម្រោងអភិវឌ្ឍហេដ្ឋារចនាសម្ព័ន្ធរបស់ខ្លួននៅទ្វីបអាហ្វ្រិក
× រដ្ឋាភិបាលក្រុងតូក្យូបានសម្រេចបើកទ្វារឲ្យក្រុងប៉េកាំងចូលរួមជាមួយខ្លួនក្នុងការអនុវត្តគម្រោងអភិវឌ្ឍនៅទ្វីបអាហ្វ្រិកតាមរយៈការកសាងហេដ្ឋារចនាសម្ព័ន្ធនៅទីនោះ។ អ្នកជំនាញខ្លះយល់ថា ជប៉ុនកំពុងពង្រឹងទំនាក់ទំនងជាមួយចិនដើម្បីដោះស្រាយបញ្ហាកូរ៉េខាងជើង ខណៈខ្លះទៀតយល់ថា វាជាយុទ្ធសាស្ត្ររបស់ជប៉ុន ព្រោះមហាអំណាចនេះលែងពឹងពាក់អាមេរិកបានស្រួលដូចមុនទៀតហើយ។
ជប៉ុនសម្រេចអញ្ជើញចិនឲ្យចូលរួមក្នុងការអនុវត្តគម្រោងអភិវឌ្ឍរួមគ្នានៅក្នុងទ្វីបអាហ្វ្រិក។ វាជាកាយវិការវិជ្ជមានមួយរបស់ជប៉ុនក្នុងការពង្រឹងកិច្ចសហប្រតិបត្តិការរួមគ្នាដែលធានាបាននូវការអភិវឌ្ឍ និងដោះស្រាយបញ្ហាប្រឈមរួមគ្នាផង។
សារព័ត៌មានចិន South China Morning Post ផ្សាយថា រដ្ឋាភិបាលជប៉ុនរបស់លោក ស៊ីនហ្សូ អាបេ សម្រេចចេញគម្រោងអភិវឌ្ឍដោយអញ្ជើញឲ្យចិនចូលរួមជាមួយខ្លួនក៏ដោយសាររដ្ឋាភិបាលនេះចង់ឲ្យចិនចូលរួមដោះស្រាយវិបត្តិនុយក្លេអ៊ែរ និងកម្មវិធីផលិតមីស៊ីលរបស់ខ្លួនផង។
យ៉ាងណាមិញអ្នកជំនាញខ្លះមើលឃើញថា វាជាយុទ្ធសាស្ត្ររបស់ជប៉ុនក្នុងការពង្រឹងកិច្ចសហប្រតិបត្តិការជាមួយចិន ព្រោះមហាអំណាចនេះមិនអាចពឹងលើគំនិតផ្តួចផ្តើម ឬគោលនយោបាយរបស់អាមេរិកដូចពីមុនឡើយ។ ដូច្នេះហើយ វាជារឿងចាំបាច់ដែលត្រូវបង្កើតគោលនយោបាយផ្ទាល់ខ្លួន ដើម្បីធានាស្ថិរភាពតំបន់ និងពង្រឹងកិច្ចសហប្រតិបត្តិការជាមួយមហាអំណាចចិន ល្គឹកណាអាមេរិកមិនទាន់ប្តូរជំហររបស់ខ្លួននោះ។
គម្រោងរបស់ជប៉ុននេះមានឈ្មោះថា Growth Ring ដែលត្រូវបានបង្កើតឡើងដើម្បីគាំទ្រគម្រោងអភិវឌ្ឍផ្លូវចម្ងាយ ៦២០០ គីឡូម៉ែត្រ ដែលនាំជួយគាំទ្រការអភិវឌ្ឍនៅប្រទេស បួគីណា ហ្វាសូ, កូឌីវ័រ, ហ្កាណា, បេណាំង និងនីហ្សេរីយ៉ា។ គម្រោងនេះផ្តល់មូលនិធិដែលមានទំហំ ២៨០ លានដុល្លារបន្ថែមលើកម្ចី និងជំនួយឥតសំណងដែលមានស្រាប់ផង។
ម្យ៉ាងទៀត ជប៉ុនដាក់ចេញគម្រោងនេះក៏ដើម្បីឆ្លើយតបនឹងគម្រោងរបស់មហាយក្សចិន គំនិតផ្តួចផ្តើមខ្សែក្រវាត់មួយវិថីមួយ។ ប៉ុន្តែកញ្ចប់ហិរញ្ញវត្ថុនេះមានទំហំតូចបើប្រៀបធៀបនឹងគម្រោងរបស់មហាយក្សចិន ដោយសារប្រព័ន្ធនយោបាយនិងសេដ្ឋកិច្ចរបស់ជប៉ុនមិនអនុញ្ញាតឲ្យចាយលុយច្រើនសន្ធឹកសន្ធាប់ដូចចិនដើម្បីវិនិយោគនៅអាហ្វ្រិក ឬតំបន់ផ្សេងទៀតឡើយ៕
Tag:
ចិន
ជប៉ុន
អាហ្វ្រិក
ហេដ្ឋារចនាសម្ព័ន្ធ
© រក្សាសិទ្ធិដោយ thmeythmey.com