សមត្ថកិច្ច បានឃាត់ទុកយានយន្តជាង៤០០គ្រឿង ក្នុងយុទ្ធនាការរឹតបន្តឹងច្បាប់ចរាចរណ៍

ជាតិ

រថយន្ត

06, Jan 2018 , 12:59 pm

រូបភាព

ភ្នំពេញ៖ នគរបាលចរាចរផ្លូវគោក បានឃាត់ទុកយានយន្តជាង៤០០គ្រឿង ក្នុងយុទ្ធនាការរឹតបន្តឹងច្បាប់ចរាចរណ៍នៅរាជធានីភ្នំពេញ កាលពីថ្ងៃទី៥ មករា។នេះបើតាមរបាយការណ៍អគ្គស្នងការនគរបាលជាតិ។

របាយការណ៍ខាងលើបញ្ជាក់ថា ការរឹតបន្តឹងចរាចរណ៍ក្នុងរាជធានីភ្នំពេញ បានឃាត់យានយន្ដបើកបរបញ្ច្រាសទិស មិនពាក់មួកសុវត្ថិភាព មិនដាក់កញ្ចក់មើលក្រោយ ចំនួន៤៧៨គ្រឿង ក្នុងនោះរថយន្ដចំនួន០៧គ្រឿង, ម៉ូតូចំនួន៤៣៤គ្រឿង និងរ៉ឺម៉កកង់បីចំនួន៣គ្រឿង។

បើតាមយុទ្ធនាការត្រួតពិនិត្យចរាចរណ៍ទូទាំងប្រទេសវិញ នគរបាលពិនិត្យមួក និងកញ្ចក់២,៧៥៨គ្រឿង ក្នុងនោះអ្នកបើកបរអត់មួក៤៣៥គ្រឿង, អត់កញ្ចក់១៣៩គ្រឿង និងយានផ្សេងៗ២១គ្រឿង ហើយបង់ផាកពិន័យបាន៥៩៥គ្រឿង ។

នគរបាលបានបើកយុទ្ធនាការរឹតបន្ដឹងច្បាប់ចរាចរណ៍ បន្ទាប់ពីសម្តេចនាយករដ្ឋមន្ត្រី ហ៊ុន សែន បន្ទោសអាជ្ញាធរមូលដ្ឋាន និងព្រមានដកអភិបាលខណ្ឌដូនពេញ ទាក់ទងនឹងចរាចរណ៍គ្មានសណ្តាប់ធ្នាប់ក្នុងរាជធានី កងកម្លាំងនគរបាលទាំងផ្នែកចរាចរណ៍ និងសណ្តាប់ធ្នាប់ ចាប់បើកប្រតិបត្តិការឃាត់យានយន្ត ជាពិសេសម៉ូតូ និងម្ចាស់យានយន្ត៕