រថយន្ត
អន្តរជាតិ
ភ្ញៀវម្នាក់ជូនរថយន្តមួយគ្រឿងដល់អ្នករត់តុ ព្រោះអាណិតគាត់ដែលរង់ចាំរថយន្តក្រុងរាល់ថ្ងៃ
× អស់រយៈពេលជាច្រើនឆ្នាំ លោក Edward Pollard សង្កេតឃើញអ្នករត់តុឈ្មោះ James Booker ចំណាយពេលដ៏យូរដើម្បីរង់ចាំរថយន្តក្រុងសម្រាប់ដំណើរទៅវិញទៅមក។ ដោយមនោសញ្ចេតនា និងក្តីអាណិត មេធាវីរូបនេះ បានសម្រេចចិត្តផ្តល់កាដូរថយន្តដល់លោក Booker នាឱកាសបុណ្យណូអែលកន្លងមក។
លោក Edward Pollard មេធាវីនៅក្រុមហ៊ុនឯកជនក្នុងក្រុង Houston រដ្ឋតិចសាស់ សហរដ្ឋអាមេរិក ជាភ្ញៀវប្រចាំហាង Willie G’s Seafood & Steaks អស់រយៈពេលជាច្រើនឆ្នាំមកហើយ។ រាល់ពេលដែលលោកមានវត្តមាននៅហាង លោកតែងតែទទួលបាននូវការប្រើសេវាកម្មពីសំណាក់លោក James Booker ដែលជាអ្នករត់តុ។
អ្វីដែលលោក Pollard ចាប់អារម្មណ៍នោះ គឺសកម្មភាពប្រចាំថ្ងៃរបស់លោក Booker។ បន្ទាប់ពីមមាញឹកក្នុងការងារនៅភោជនីយដ្ឋាន លោក Booker តែងតែទៅចាំរថយន្តក្រុងសម្រាប់ដំណើរទៅផ្ទះរបស់ខ្លួនវិញ។ ដោយសារ ចំណតរថយន្តជិតការិយាល័យមេធាវី លោក Pollard បានមើលឃើញលោក Booker រង់ចាំរថយន្តជារៀងរាល់ថ្ងៃ។
លោក Pollard បានរៀបរាប់នៅលើទំព័រហ្វេសប៊ុករបស់ខ្លួនថា៖ «នាអំឡុងថ្ងៃបុណ្យណូអែល ពេលដែលអ្នកចំណាយពេលនៅជាមួយគ្រួសារ អ្នកច្បាស់ជានឹកឃើញរឿងមួយ។ ពេលដែលខ្ញុំនឹកឃើញរឿងរថយន្ត ខ្ញុំក៏បាននឹកឃើញលោក James [Booker] ផងដែរ ដែលជាហេតុនាំឲ្យខ្ញុំជូនកាដូដល់គាត់សម្រាប់ថ្ងៃបុណ្យណូអែល»។
តាមឃ្លីបវីដេអូមួយ លោក Pollard បានផ្តល់ការភ្ញាក់ផ្អើលចំពោះលោក Booker ដោយលោកបានជូនសោររថយន្តដល់គាត់នៅក្រៅភោជនីយដ្ឋាន Willie G’s។ កាដូនោះ ជាប្រភេទរថយន្ត Oldsmobile Alero ផលិតឆ្នាំ២០០០ ដែលលោក Pollard កម្រប្រើប្រាស់។
«ខ្ញុំដឹងហើយថា អំណោយជារថយន្ត គួរតែជារថយន្តអស្ចារ្យ»។ នេះជាការលើកឡើងរបស់លោក Pollard ដោយអះអាងថា ទោះបីរថយន្តនោះមានអាយុកាល១៧ឆ្នាំក៏ដោយ ប៉ុន្តែវានៅតែស្ថិតក្នុងលក្ខខណ្ឌល្អ ដោយលោកប្តូរប្រេង និងបង់ពន្ធជាប្រចាំ។
លោក Pollard និយាយទៅកាន់លោក Booker ថា៖ «ពេលខ្លះ ពេលខ្ញុំចេញពីការងារទៅហើយនោះ ខ្ញុំនៅតែឃើញលោកឈរនៅចាំរថយន្តក្រុង។ ខ្ញុំមានរថយន្តមួយទៀត ដូច្នេះខ្ញុំគិតច្បាស់ថា លោកជាមនុស្សដ៏ត្រឹមត្រូវបំផុតដែលត្រូវទទួលរថយន្តមួយនេះពីខ្ញុំ»។
លោក Booker មានការភ្ញាក់ផ្អើល ហើយចាប់ឱបលោក Pollard និងថ្លែងការអរគុណដោយក្តីរំភើប។ «លោកសក្តិសមទទួលបានរថយន្តនេះ ពីព្រោះលោកបម្រើសេវាកម្មបានយ៉ាងល្អសម្រាប់យើងទាំងអស់គ្នានៅក្នុងភោជនីយដ្ឋាន»៕
© រក្សាសិទ្ធិដោយ thmeythmey.com