អន្តរជាតិ
រដ្ឋាភិបាល ឌូទើតេ បិទសារព័ត៌មានល្បីឈ្មោះ Rappler
× អាជ្ញាធរហ្វីលីពីនបានសម្រេចចិត្តបិទសារព័ត៌មានអនឡាញល្បីឈ្មោះ Rappler ដោយលើកឡើងថា សារព័ត៌មាននេះបំពានរដ្ឋធម្មនុញ្ញ និងច្បាប់ស្ដីពីកម្មសិទ្ធិលើក្រុមហ៊ុនក្នុងស្រុក។ សារព័ត៌មាននេះអះអាងថា ខ្លួននឹងតវ៉ាតាមផ្លូវច្បាប់ចំពោះការបិទដំណើរការអង្គភាពរបស់ខ្លួន។
គណៈកម្មការមូលបត្ររបស់ហ្វីលីពីន បានលុបចោលការចុះឈ្មោះបញ្ជីអាជីវកម្មរបស់សារព័ត៌មាន Rappler ដែលគេស្គាល់ថា ជាបណ្ដាញសារព័ត៌មានរិះគន់រដ្ឋាភិបាលប្រធានាធិបតី រ៉ូឌ្រីហ្គោ ឌូទើតេ ខ្លាំងពេលកន្លងមក។ ក្នុងសេចក្ដីប្រកាសចុះថ្ងៃទី១១ ខែមករា ដែលត្រូវបានផ្សព្វផ្សាយនៅថ្ងៃទី១៥ ខែមករា គណៈកម្មការនេះអះអាងថា សារព័ត៌មាន Rappler បំពានច្បាប់រដ្ឋធម្មនុញ្ញ ដែលហាមឃាត់ជនបរទេសមានកម្មសិទ្ធិលើអង្គភាពសារព័ត៌មាន។
បើតាមសារព័ត៌មាន Rappler គណៈកម្មការខាងលើរកឃើញថា សារព័ត៌មាន Rappler ទទួលលុយដើម្បីដំណើការពីមូលនិធិ Omidyar Network ដែលបង្កើតដោយម្ចាស់គេហទំព័រ eBay លោក Pierre Omidyar ។ គណៈកម្មការនេះក៏បានលុបចោលលិខិតតម្ដល់លុយ ឬ Philippine Depositary Receipts (PDRs) របស់មូលនិធិនេះ និងសម្រេចចិត្តលុបចោលលិខិតអាជីវកម្មរបស់ Rappler តែម្ដង។
PDRs គឺជាទម្រង់មួយនៃការវិនិយោគផ្នែកហិរញ្ញវត្ថុនៅក្នុងក្រុមហ៊ុនមួយ ដែលម្ចាស់កាន់កាប់ PDRs គ្មានសិទ្ធិបោះឆ្នោតក្នុងគណៈគ្រប់គ្រង ឬការគ្រប់គ្រង ឬក៏ដំណើការប្រចាំថ្ងៃរបស់ក្រុមហ៊ុនឡើយ។ ឆ្លើយតបនឹងការសម្រេចចិត្តខាងលើ សារព័ត៌មាន Rappler និយាយរំឭកថា PDRs មិនបានបង្ហាញពីភាពជាម្ចាស់កម្មសិទ្ធិឡើយ ហើយនេះបង្ហាញថា Omidyar Network និង North Base Media ដែលជាអ្នកវិនិយោគបរទេស គ្មានកម្មសិទ្ធិលើ Rappler ឡើយ។
រដ្ឋាភិបាលលោក ឌូទើតេ បានរិះគន់សារព័ត៌មាន Rappler ជាយូរមកហើយ។ គណៈកម្មការពិសេសមួយត្រូវបានបង្កើតកាលពីខែកក្ដដា ឆ្នាំ២០១៧ ដើម្បីស៊ើបអង្កេតអង្គភាពសារព័ត៌មានមួយនេះជុំវិញការសង្ស័យថាបំពានរដ្ឋធម្មនុញ្ញ។ មិនបានប៉ុន្មានផង លោក ឌូទើតេ ក៏ព្រមានចំៗថា លោកនឹងបើកការស៊ើបអង្កេតលើម្ចាស់កម្មសិទ្ធិរបស់ Rappler នេះ។
ក្រោយការចេញលិខិតលុបចោលដំណើការរបស់ខ្លួន សារព័ត៌មាន Rappler បានចេញសេចក្ដីថ្លែងការណ៍មួយ ដោយចាត់ទុកការសម្រេចចិត្តនេះជារឿងប្រវត្តិសាស្ត្ររបស់គណៈកម្មការ និងប្រព័ន្ធផ្សព្វផ្សាយក្នុងស្រុកផង។ «យើងមានបំណងមិនត្រឹមតែតស៊ូតាមផ្លូវច្បាប់ដែលមានឡើយ តែនឹងតស៊ូដើម្បីសេរីភាពក្នុងវិស័យសារព័ត៌មាន និងសិទ្ធិរបស់អ្នកអានក្នុងការទទួលព័ត៌មានពីវេទិកាឯករាជ្យ»។ នេះជាសាររបស់សារព័ត៌មានអនឡាញ Rappler នៅថ្ងៃទី១៥ ខែមករា៕
Tag:
ហ្វីលីពីន
រ៉ូឌ្រីហ្គោ ឌូទើតេ
Rappler
© រក្សាសិទ្ធិដោយ thmeythmey.com