ប្រមុខការទូតចិនទាត់ចោលការចោទប្រកាន់ថា ចិននឹងធ្វើឲ្យបណ្តារដ្ឋអាហ្វ្រិកវ័ណ្ឌកនឹងបំណុល

អន្តរជាតិ

ប្រមុខការទូតចិនទាត់ចោលការចោទប្រកាន់ថា ចិននឹងធ្វើឲ្យបណ្តារដ្ឋអាហ្វ្រិកវ័ណ្ឌកនឹងបំណុល

15, Jan 2018 , 9:59 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋមន្ត្រីការបរទេសចិនលោក វ៉ាង យី បានទាត់ចោលការចោទប្រកាន់ខុសការពិតថា ចិនធ្វើឲ្យប្រទេសអាហ្វ្រិក មានបំណុលកាន់តែច្រើនរហូតដល់វ័ណ្ឌក។ ប្រមុខការទូតចិនរូបនេះ បានបកស្រាយបែបនេះ នៅក្នុងពេលលោកបំពេញទស្សនកិច្ច នៅក្នុងប្រទេសអង់ហ្គោឡា នៅសប្តាហ៍មុន។

ការពង្រឹងឥទ្ធិពលរបស់ចិន និងវត្តមានក្រុមហ៊ុនចិនច្រើន នៅអាហ្វ្រិក ត្រូវបានមតិមួយចំនួនចាត់ទុក ជារឿងអវិជ្ជមាន។ ខ្លះអះអាងថា ចិនកំពុងដាក់អាណានិគមថ្មី លើបណ្តាប្រទេសអាហ្វ្រិកតាមរយៈការផ្តល់កម្ចី និងជំនួយជាដើម ដែលវាធ្វើប្រទេសទាំងនោះ ជាប់បំណុលចិនកាន់តែច្រើន។

ក្នុងសន្និសីទសារព័ត៌មានរួមគ្នា ជាមួយរដ្ឋមន្ត្រីការបរទេសអង់ហ្គោឡា លោក វ៉ាង យី ត្រូវបានអ្នកសារព័ត៌មាន សាកសួរពាក់ព័ន្ធការចោទប្រកាន់ថា ចិនធ្វើបណ្តារដ្ឋអាហ្វ្រិកវ័ណ្ឌក នឹងបំណុលចិននៅពេលអនាគត។ ប៉ុន្តែលោក វ៉ាង យី បានឆ្លើយតបយ៉ាងច្បាស់ថា រាល់ការលើកឡើងពាក់ព័ន្ធនឹងចិន ជាការចោទប្រកាន់ខុសការពិតប៉ុណ្ណោះ។

ប្រមុខការទូតចិនរូបនេះ បានពន្យល់ថា ទំនាក់ទំនងរវាងចិន និងអាហ្វ្រិក ក្នុងរយៈពេលចុងក្រោយមានការរីកចម្រើនខ្លាំង ហើយវាជារឿងចាំបាច់ ដែលចិនត្រូវបង្កើនការផ្តល់ជំនួយហិរញ្ញវត្ថុដល់ប្រទេសអាហ្វ្រិក ខណៈដែលមហាអំណាចនេះ នៅបន្តគោរពគោលការណ៍ជាមូលដ្ឋាន មិនជ្រៀតជ្រែក និងគោរពគ្នាទៅវិញទៅមកដដែល។

លោក វ៉ាង យី បានលើកឡើងហេតុផល៣យ៉ាង ដែលអាចពន្យល់បានថា ចិនជាមិត្តល្អ មានបំណងល្អ និងចង់ជួយឲ្យមិត្តអាហ្វ្រិករីកចម្រើនទាំងអស់គ្នា។ បើតាមប្រមុខការទូតចិនរូបនេះ ហេតុផលទី១ ចិនផ្តល់ជំនួយដើម្បីឆ្លើយតបនឹងតម្រូវការហិរញ្ញវត្ថុរបស់អាហ្វ្រិក ព្រោះចិនយល់ច្បាស់ថា ប្រទេសនីមួយៗ ត្រូវការហិរញ្ញវត្ថុច្រើន នៅពេលដែលគេកំពុងស្ថិតនៅដំណាក់កាលដំបូងនៃការអភិវឌ្ឍ និងឈានទៅធ្វើឧស្សាហូបនីយកម្មសេដ្ឋកិច្ច។

ចំណុចទី២ គឺ ចិនមិនដែលដាក់លក្ខខណ្ឌនយោបាយណាមួយ លើប្រទេសជាមិត្តដែលទទួលជំនួយពីចិនឡើយ។ ចិនធ្លាប់ជាប្រទេសដែលមានប្រវត្តិសាស្ត្រល្វីងជូរចត់ដូចអាហ្វ្រិកដែរ ដោយសេដ្ឋកិច្ចខ្លួន ត្រូវបានកេងប្រវ័ញ្ច និងសង្កត់សង្កិន ដោយបរទេសនោះ។ ដូច្នេះហើយ អ្វីដែលចិនចង់បាននោះ គឺធានាជួយគាំទ្រ និងបង្កើនកិច្ចសហប្រតិបត្តិការជាមួយអាហ្វ្រិក និងមិនដាក់គំនិតខ្លួនឲ្យគេធ្វើតាមដូចលោកខាងលិចឡើយ។

ចំណុចទី៣ គឺចិនធានាឈរលើគោលការណ៍គោរពប្រយោជន៍គ្នាទៅវិញទៅមក និងឈ្នះឈ្នះទាំងអស់គ្នា។ លោក វ៉ាង យីង បានសង្កត់ធ្ងន់ថា កិច្ចសហប្រតិបត្តិការរវាងចិន និងអាហ្វ្រិក ជាផ្នែកមួយនៃកិច្ចសហប្រតិបត្តិការត្បូង-ត្បូង ហើយចិនយល់ច្បាស់ថា ការអភិវឌ្ឍរួមអាចសម្រេចបានដរាបណា ភាគីត្រូវឈរលើគោលការណ៍ស្មើភាពគ្នា និងធានាប្រយោជន៍គ្នាទៅវិញទៅមកដែរ។

ប្រមុខការទូតរូបនេះ បានគូសបញ្ជាក់ផងដែរថា ចិនផ្តល់ជំនួយគាំទ្រដល់អាហ្វ្រិក តាមរយៈការសិក្សាស៊ីជម្រៅពីទីផ្សារ សក្តានុពលសេដ្ឋកិច្ច និងសង្គម ដែលវារួមចំណែកជួយដល់ភាពជោគជ័យ នៃកិច្ចសហប្រតិបត្តិការរួមគ្នានេះដែរ។

បន្ថែមពីលើហេតុផលដែលបានរៀបរាប់នេះ លោក វ៉ាង យី ក៏បានឆ្លៀតរម្លឹកផងដែរថា មានតែ បណ្តាប្រទេសអាហ្វ្រិកប៉ុណ្ណោះ ដែលស័ក្តិសមនិយាយពីភាពវិជ្ជមាន ឬអវិជ្ជមានទំនាក់ទំនងទ្វេភាគីរវាងចិន និងអាហ្វ្រិក មិនមែនអ្នកក្រៅទេ ហើយលោកបានលើកយកសុភាសិតមួយឃ្លាដែលពោលថា៖«មានតែជើងប៉ុណ្ណោះ ដែលអាចដឹងច្បាស់ថា ស្បែកជើងវាល្មម នឹងខ្លួនឬអត់»៕