យុវជនឥណ្ឌូណេស៊ីម្នាក់ ជាប់ពន្ធនាគារជាង១ឆ្នាំ ព្រោះប្រមាថប្រធានាធិបតីតាមហ្វេសប៊ុក

អន្តរជាតិ

យុវជនឥណ្ឌូណេស៊ីម្នាក់ ជាប់ពន្ធនាគារជាង១ឆ្នាំ ព្រោះប្រមាថប្រធានាធិបតីតាមហ្វេសប៊ុក

17, Jan 2018 , 5:24 pm

រូបភាព

ដោយ:

តុលាការឥណ្ឌូណេស៊ី បានសម្រេចកាត់ទោសឲ្យយុវជនម្នាក់ជាប់ពន្ធនាគាររយៈពេល១៨ខែ ពីបទប្រមាថលោកប្រធានាធីបតី ចូកូ វីដូដូ តាមបណ្តាញសង្គមហ្វេសប៊ុក ។ យុវជនរូបនោះ ក៏មិនមានការជំទាស់អ្វីដែរ ។

តុលាការឥណ្ឌូណេស៊ី នៅថ្ងៃ១៦ មករា បានកាត់ទោសសិស្សវិទ្យាល័យម្នាក់មកពីកោះស៊ូម៉ាត្រារបស់ឥណ្ឌូណេស៊ីឲ្យជាប់ពន្ធនាគាររយៈពេល ១៨ខែ ក្រោយពីបានរកឃើញថា យុវជនរូបនេះ បំពានច្បាប់គ្រប់គ្រងអ៊ីនធឺណិត។ ជននេះបាននិយាយប្រមាថដល់ប្រមុខដឹកនាំប្រទេសតាមប្រព័ន្ធទំនាក់ទំនងសង្គមខ្លួន។ នេះបើយោងតាមការចុះផ្សាយភ្នាក់ងារព័ត៌មាន AFP ។

បើតាមប្រភពព័ត៌មានដដែលនោះ បន្ថែមពីទោសជាប់ពន្ធនាគារ តុលាការឥណ្ឌូណេស៊ី ក៏បានពិន័យយុវជនរូបនោះ ក្នុងចំនួនទឹកប្រាក់ប្រមាណ ៧០០ ដុល្លារ ផងដែរ ហើយបើគេ មិនបានបំពេញកាតព្វកិច្ចនេះទេ តុលាការនឹងបន្ថែមទោសរយៈពេល មួយខែទៀត ពោលគឺ ១៩ ខែ។ តែយ៉ាងណា យុវជនរូបនោះ មិនបានប្តឹងជំទាស់នឹងសាលក្រមរបស់តុលាការឡើយ ។

យុវជនរូបនោះ ត្រូវបានចាប់ខ្លួនតាំងពីខែសីហាកន្លងទៅ ពោលគឺបន្ទាប់ពីគេ បានបង្ហោះសារបរិហារកេរ្តិ៍ និងបែបប្រមាថជាច្រើន តាមបណ្តាញសង្គម ជាពិសេស ជាសារដែលប្រឆាំងនឹងលោកប្រធានាធិបតី ចូកូ វីដូដូ តែម្តង ។

គួរជម្រាបផងដែរថា ឥណ្ឌូណេស៊ី ត្រូវបានគេចាត់ថាជាប្រទេសប្រជាធិបតេយ្យចាស់ទុំមួយនៅក្នុងតំបន់ ក៏ប៉ុន្តែកន្លងមក រដ្ឋដែលមានប្រជាជនឥស្លាមច្រើនជាងគេលើពិភពលោកមួយនេះ ក៏ទទួលរងការរិះគន់ច្រើន ពាក់ព័ន្ធការបង្ក្រាបបុគ្គលណាដែលបញ្ចេញមតិរិះគន់តាមបណ្តាញសង្គមផងដែរ ។ ឥណ្ឌូណេស៊ីរឹតត្បិតខ្លាំងលើចលនាទាំងឡាយណាបង្កផលប៉ះពាល់ដល់សាសនាជាតិរបស់ខ្លួន ៕