ជាតិ
នយោបាយជាតិ
ក្រសួងការបរទេស ចាត់ទុកវិធានការអាល្លឺម៉ង់ ដែលផ្អាកទិដ្ឋាការមន្ត្រីរដ្ឋាភិបាល ជាការមើលងាយកម្ពុជា លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា
× ភ្នំពេញ៖ បន្ទាប់ពីសហរដ្ឋអាមេរិក និងសហភាពអឺរ៉ុប ដល់វេនអាល្លឺម៉ងវិញម្ដង ដែលសម្រេចផ្អាកទិដ្ឋាការចំពោះមន្ត្រីជាន់ខ្ពស់កម្ពុជា។ កម្ពុជា ចាត់ទុកការសម្រេចចិត្តរបស់អាល្លឺម៉ង ក្នុងហេតុផលនយោបាយដោយភាពលំអៀង និងគ្មានភាពស្មោះត្រង់ចំពោះកម្ពុជា។
ក្រសួងការបរទេស និងសហប្រតិបត្តិការអន្តរជាតិ សោកស្ដាយចំពោះវិធានការអាល្លឺម៉ង់ ដែលផ្អាកទិដ្ឋាការចំពោះមន្ត្រីជាន់ខ្ពស់កម្ពុជា។ ក្រសួងការបរទេស ចាត់ទុកការសម្រេចរបស់អាល្លឺម៉ង់បែបនេះ ជាការមើលស្រាលទាំងស្រុងដល់ឯករាជ្យភាពនៃប្រព័ន្ធច្បាប់ និងតុលាការរបស់កម្ពុជា ដោយមិនបានពិចារណាពីតថភាពនយោបាយឲ្យបានច្បាស់លាស់។
សេចក្តីថ្លែងការណ៍ក្រសួងការបទេសកម្ពុជា កាលពីថ្ងៃទី២២ កុម្ភៈ បានសរសេរដូច្នេះថា៖«សកម្មភាព(ផ្អាកទិដ្ឋាការ)ឯកតោភាគីនេះ មានមូលហេតុនយោបាយ និងមានភាពលំអៀងមិនប្រកបដោយគតិច្បាប់ ហើយដែលផ្ទុយនឹងការខិតខំប្រឹងប្រែងបច្ចុប្បន្នរបស់ប្រទេសទាំងពីរនៅក្នុងការអភិវឌ្ឍទំនាក់ទំនងយូរអង្វែង និងកិច្ចសហប្រតិបត្តិការទ្វេភាគី»។
បន្ថែមពីនេះក្រសួងការបរទេស ចាត់ទុកប្រតិកម្មរបស់អាល្លឺម៉ង់ ចំពោះការវិវត្តផ្នែកនយោបាយថ្មីនៅកម្ពុជា ដោយគ្មានភាពស្មោះត្រង់ និងមានស្តង់ដារពីរជាន់ ខណៈដែលអាល្លឺម៉ងអនុវត្តវិធានការ ចំពោះប្រទេសផ្សេងៗ ពាក់ព័ន្ធនឹងបញ្ហាលទ្ធិប្រជាធិបតេយ្យ និងសិទ្ធិមនុស្ស ខុសគ្នាពីកម្ពុជានេះ។
«ទោះបីជាមានការសម្រេចចិត្តបែបនេះក៏ដោយ ក្រសួងការបរទេស និងសហប្រតិបត្តិការអន្តរជាតិបញ្ជាក់ជាថ្មីម្ដងទៀត ពីការតាំងចិត្តឥតងាករេរបស់កម្ពុជា ក្នុងការអនុវត្តលទ្ធិប្រជាធិបតេយ្យ សេរីពហុបក្ស ដោយអនុលោមតាមរដ្ឋធម្មនុញ្ញរបស់កម្ពុជា ក្នុងការពង្រឹងនីតិរដ្ឋ និងការរៀបចំការបោះឆ្នោតសភា នៅថ្ងៃទី២៩ ខែកក្កដា ឆ្នាំ២០១៨ខាងមុខ ដោយសេរី យុត្តិធម៌ និងមានរបៀបរៀបរយ»។ នេះជាការបញ្ជាក់របស់ក្រសួងការបរទេស ដែលភ្ជាប់ជាមួយនឹងការគោរពចំពោះសិទ្ធិអធិបតេយ្យរបស់រដ្ឋាភិបាលអាល្លឺម៉ង។
ស្ថានទូតសាធារណរដ្ឋសហព័ន្ធអាល្លឺម៉ងប្រចាំកម្ពុជា បានប្រាប់ក្រសួងការបរទេស កាលពីថ្ងៃទី២១ កុម្ភៈឆ្នាំ២០១៨ ថា អាល្លឺម៉ងផ្អាកផ្ដល់ទិដ្ឋាការតាមលក្ខខណ្ឌពិសេសចំពោះមន្ត្រីជាន់ខ្ពស់កម្ពុជា។ ស្ថានទូតអាល្លឺម៉ង បានបញ្ជាក់ថា ការផ្អាកបែបនេះមិនមានលក្ខណៈ ដូចការដាក់កម្រិតទិដ្ឋាការទូទៅនោះទេ។
ទាក់ទងនឹងបញ្ហាផ្អាកទិដ្ឋាការនេះ សម្ដេចនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី២១ កុម្ភៈថា សម្ដេចមិនខ្វល់ពីបញ្ហារឿងផ្អាកទិដ្ឋាការនេះឡើយ។ ប្រមុខរដ្ឋាភិបាល ចំអកវិញថា សម្ដេចគ្មានបំណង និងគ្មានពេលវេលាទៅលេងអាល្លឺម៉ង់ ទេ ខណៈកម្ពុជាសម្បូរទីកន្លែងកម្សាន្ត ដែលសម្ដេច មិនទាន់ដើរគ្រប់សព្វផង៕
Tag:
អាល្លឺម៉ង់
ទិដ្ឋាការ
© រក្សាសិទ្ធិដោយ thmeythmey.com