ជាតិ
នយោបាយជាតិ
ក្រុមប្រឹក្សាសហភាពអឺរ៉ុបព្រមានចាត់វិធានការជាក់លាក់ បើនយោបាយកម្ពុជាបន្តគាំង
× ក្រុមប្រឹក្សាសហភាពអឺរ៉ុប បានចេញសេចក្តីសម្រេចរបស់ខ្លួន១១ចំណុចស្តីពីបញ្ហាកម្ពុជា ក្រោយកិច្ចប្រជុំលើកទី៣៥៩៨របស់ខ្លួននៅក្នុងទីក្រុងព្រុចសែល ប្រទេសបែលហ្សិកនាថ្ងៃទី២៦ ខែកុម្ភៈ នេះ។
ស្ថានការណ៍នយោបាយបច្ចុប្បន្នរបស់កម្ពុជា បានក្លាយជារបៀបវារៈនៃកិច្ចប្រជុំក្រុមប្រឹក្សាសហភាពអឺរ៉ុប (Council of the European Union) ដែលមានរដ្ឋ២៨ជាសមាជិក។ ក្រុមប្រឹក្សានេះ ត្រូវបានចាត់ទុកដូចជាគណៈរដ្ឋមន្ត្រីអឺរ៉ុប ដែលមានទីស្នាក់ការនៅក្រុងព្រុចសែល ហើយអ្នកជំនាញការទូតដាណឺម៉ាក លោក Jeppe Tranholm-Mikkelsen បានកាន់តំណែងជាអគ្គលេខាធិការចាប់ពីឆ្នាំ២០១៥មក។
ក្នុង
សេចក្តីសម្រេចក្រោយកិច្ចប្រជុំលើកទី៣៥៩៨របស់ខ្លួន ក្រុមប្រឹក្សាសហភាពអឺរ៉ុប បានរំលឹកជាចម្បងពីកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១ ហើយក្រុមប្រឹក្សាបានលើកឡើងពីកាតាព្វកិច្ចរបស់រដ្ឋាភិបាលកម្ពុជាក្នុងការអនុវត្តប្រព័ន្ធប្រជាធិបតេយ្យសេរី ពហុបក្ស ក៏ដូចជាការគោរពសិទ្ធមនុស្ស និងសេរីភាពជាមូលដ្ឋាន។ ក្រុមប្រឹក្សាបានក្រើនរំលឹកដល់រដ្ឋជាសមាជិករបស់ខ្លួន ជាពិសេសបារាំង និងចក្រភពអង់គ្លេស ដែលស្ថិតក្នុងចំណោមប្រទេសហត្ថលេខីនៃកិច្ចព្រមព្រៀងសន្តិភាពក្រុងប៉ារីស កាលពីឆ្នាំ១៩៩១ ។
ស្ថានភាពនយោបាយ ដូចជាការចាប់ខ្លួនលោក កឹម សុខា អតីតមេដឹកនាំគណបក្សប្រឆាំង ការបិទ និងការព្យួរអង្គការក្រៅរដ្ឋាភិបាល និងសារព័ត៌មានមួយចំនួន រួមទាំងការរំលាយគណបក្សសង្គ្រោះជាតិ និងការដកសិទ្ធិនយោបាយរបស់មន្ត្រី CNRP ១១៨នាក់ គឺជាកង្វល់ដ៏ធំមួយ របស់ស្ថាប័នសហភាពអឺរ៉ុបមួយនេះ ហើយបានទាមទារឲ្យរដ្ឋាភិបាលបញ្ឈប់ការប្រើប្រាស់ប្រព័ន្ធយុត្តិធម៌ ជាឧបករណ៍នយោបាយ។
ជាមួយនឹងការស្នើឲ្យដោះលែងលោក កឹម សុខា ក្រុមប្រឹក្សាសហភាពអឺរ៉ុប ក៏បានបង្ហាញពីការគាំទ្រសហភាពអឺរ៉ុបផងដែរលើការផ្អាកជំនួយហិរញ្ញវត្ថុដល់គណៈកម្មាធិការជាតិរៀបចំការបោះឆ្នោត (គ.ជ.ប)។
ក្រុមប្រឹក្សាអឺរ៉ុប បានអំពាវនាវដល់ស្ថាប័នកំពូលរបស់អឺរ៉ុប តាមដានដោយយកចិត្តទុកដាក់លើការវិវត្តនយោបាយនៅកម្ពុជា ដើម្បីធានាឲ្យបាននូវគោលការណ៍ប្រជាធិបតេយ្យ ការគោរពសិទ្ធិមនុស្ស និងនីតិរដ្ឋ ព្រមទាំងរំលឹកផងដែរថា អឺរ៉ុបគឺជាទីផ្សាដ៏ធំបំផុតរបស់កម្ពុជា។
ប្រសិនបើស្ថានភាពមិនមានលក្ខណៈល្អប្រសើរទេនោះ ក្រុមប្រឹក្សាសហភាពអឺរ៉ុប នឹងចាត់វិធានការជាក់លាក់ មកលើកម្ពុជា។ នេះបើតាមខ្លឹមសារក្នុងចំណុចទី៩ នៃសេចក្តីសម្រេចនាថ្ងៃទី២៦ ខែកុម្ភៈ។
ជាថ្មីម្តងទៀត ក្រុមប្រឹក្សាអឺរ៉ុបស្នើឲ្យរដ្ឋាភិបាលកម្ពុជា បើកការចរចាជាមួយគណបក្សប្រឆាំងដែលបានជាប់ឆ្នោត ហើយអះអាងថា សហភាពអឺរ៉ុបត្រៀមខ្លួនជានិច្ចជួយកម្ពុជា៕
Tag:
ក្រុមប្រឹក្សាសហភាពអឺរ៉ុប
© រក្សាសិទ្ធិដោយ thmeythmey.com