តុលាការ រឹបអូសទ្រព្យសម្បត្តិរបស់លោក សម រង្ស៊ី ជាថ្នូរសងជំងីចិត្តមេបក្សកាន់អំណាច

ជាតិ

នយោបាយជាតិ

តុលាការ រឹបអូសទ្រព្យសម្បត្តិរបស់លោក សម រង្ស៊ី ជាថ្នូរសងជំងីចិត្តមេបក្សកាន់អំណាច

27, Feb 2018 , 12:45 pm

រូបភាព

ទីស្នាក់ការកណ្តាលរបស់គណបក្សសង្គ្រោះជាតិ កាលពីមិនទាន់ត្រូវបានរំលាយ

ដោយ: សារព័ត៌មានថ្មីៗ

ភ្នំពេញ៖ លោក រស់ ពិសិដ្ឋ ចៅក្រមនៃសាលាដំបូងរាជធានីភ្នំពេញ បានចេញដីកា ដោយសម្រេចរឹបអូសជាបណ្តោះអាសន្តនូវទ្រព្យសម្បត្តិរបស់លោក សម រង្ស៊ី នៅប្រទេសកម្ពុជា ដូចជា ដីនិងអគារ ជាដើម។ បើតាមសេចក្តីសម្រេច ដីនិងអាគារនោះ គឺស្ថិតនៅសង្កាត់ចាក់អង្រែលើ ខណ្ឌមានជ័យ ដែលទំនងជាទីស្នាក់ការកណ្តាលរបស់អតីតគណបក្សសង្គ្រោះជាតិ។

ការសម្រេចរបស់ចៅក្រមបែបនេះ គឺដោយសារតែលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេស មិនព្រមបង់ប្រាក់សងជំងឺចិត្តដល់ សម្តេច ហ៊ុន សែន នាយករដ្ឋមន្ត្រីកម្ពុជា និងសម្តេច ហេង សំរិន ប្រធានរដ្ឋសភា។ ចៅក្រម បានប្រាប់លោក សម រង្ស៊ី ក្នុងសេចក្តីសម្រេច យ៉ាងដូច្នេះថា៖«ដើម្បីឲ្យមានការលុបចោលនូវការរឹបអូសនេះ លោក សម រង្ស៊ី ត្រូវផ្ញើប្រាក់តម្កល់នៅសាលាដំបូងរាជធានីភ្នំពេញ ចំនួន៤២៥0 លានរៀល ជាប្រាក់រំដោះ»។

ទាក់ទងបញ្ហានេះលោក ម៉ៅ មុន្នីវណ្ណ អតីតតំណាងរាស្ត្រគណបក្សសង្គ្រោះជាតិ ប្រាប់សារព័ត៌មានថ្មីៗយ៉ាងដូច្នេះថា៖«ដីនិងអាគារហ្នឹងជារបស់គាត់ [លោក សម រង្ស៊ី]។ គ្មានទ្រព្យសម្បតិ្តអីផ្សេងទៀតទេ គឺគាត់មានតែដីនិងអាគារហ្នឹង។ ប៉ុន្តែទីស្នាក់ការគណបក្សមិនមែនជារបស់គាត់ទេ គឺជារបស់គណបក្ស។ ផ្ទះនៅខាងក្រោយទីស្នាក់ការ ទើបបានជាកម្មសិទ្ធិរបស់គាត់»។

បើតាមសេចក្តីសម្រេច បំណុលដែលលោក សម រង្ស៊ី ត្រូវបង់ជូនសម្តេច ហេង សំរិន មានចំនួន២៥0លានរៀល។ កន្លងមក សម្តេច ហេង សំរិន បានប្តឹងឯកឧត្តម សម រង្ស៊ី ពីបទ «បរិហារកេរិ៍្តជាសាធារណៈ»។

ឯបំណុល ដែលលោក សម រង្ស៊ី ត្រូវបង់ជូនសម្តេច ហ៊ុន សែន មានចំនួនដល់ទៅ៤ពាន់លានរៀលឯណោះ។ នេះបើតាមសេចក្តីសម្រេចដដែល។

លោក សម រង្ស៊ី បានចាញ់ក្តីសម្តេច ហ៊ុន សែន ជាច្រើនករណី។ បណ្តឹងខ្លះ ត្រូវបានតុលាការ បង្គាប់ឲ្យលោក សម រង្ស៊ី បង់ប្រាក់ជូនសម្តេច ហ៊ុន សែន និងបណ្តឹងខ្លះទៀត តម្រូវឲ្យលោក សម រង្ស៊ី ជាប់ពន្ធនាគារផងដែរ៕

អត្ថបទទាក់ទង

តុលាការកាត់ឲ្យលោក សម រង្ស៊ី សងជំងឺចិត្តសម្ដេច ហ៊ុន សែន ១លានដុល្លារ

បណ្តឹង៨ របស់បក្សកាន់អំណាចហ៊ុមព័ទ្ធឯកឧត្តម សម រង្ស៊ី

តុលាការពិន័យឯ.ឧ សម រង្ស៊ី ឲ្យបង់ថវិកា ១៥០លានរៀលដល់សម្តេច ហេង សំរិន