សម្ដេច ហ៊ុន សែន បន្ទោសលោក William Heidt ថា ពូកែភូតកុហក និងបង្ខូចឈ្មោះកម្ពុជា

ជាតិ

នយោបាយជាតិ

សម្ដេច ហ៊ុន សែន បន្ទោសលោក William Heidt ថា ពូកែភូតកុហក និងបង្ខូចឈ្មោះកម្ពុជា

03, Mar 2018 , 11:04 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានស្តីបន្ទោសឲ្យឯកអគ្គរដ្ឋទូតអាមេរិប្រចាំកម្ពុជាលោក William Heidt ថា ជាមនុស្សភូតកុហក និងពូកែបង្ខូចកេរ្តិ៍ឈ្មោះប្រទេសកម្ពុជា។ ការស្តីបន្ទោសរបស់សម្ដេច ហ៊ុន សែន បែបនេះ ធ្វើឡើងបន្ទាប់ពីលោក William Heidt ព្រមានផ្ដាច់ជំនួយលើវិស័យពន្ធដារកម្ពុជា។

ថ្លែងក្នុងពិធីជួបសំណេះសំណាលជាមួយកម្មករ និយោជិតជាង២ម៉ឺននាក់ មកពីរោងចក្រ សហគ្រាស៧៧ នៅតំបន់សេដ្ឋកិច្ចពិសេសក្រុងព្រះសីហនុ សម្ដេច ហ៊ុន សែន បាននិយាយថា ជំនួយអាមេរិកលើវិស័យពន្ធដានេះ បានបញ្ចប់កាលពីឆ្នាំ២០១៦មកម្ល៉េះ ដូច្នេះវាគ្មានអ្វីដែលអាមេរិកត្រូវព្រមានផ្ដាច់ជំនួយនេះ មកលើកម្ពុជាទៀតទេ។ ក្នុងន័យនេះប្រមុខរដ្ឋភិបាល ចាត់ទុកការប្រកាសរបស់ទូតអាមេរិកបែបនេះ ជាគោលបំណងបំផ្លាញកិត្តិយសប្រទេសកម្ពុជាប៉ុណ្ណោះ។

នាយករដ្ឋមន្ត្រី ហ៊ុន សែន បានអត្ថាធិប្បាយដូច្នេះថា៖ «យើងមិនបានទទួលជំនួយអាមេរិកលើវិស័យពន្ធដារទេ។ ពីមុនគេធ្លាប់ផ្ដល់អ្នកជំនាញការទៅលើបញ្ហារតនាគារ និងពន្ធដារ។ ប៉ុន្តែជំនួយនេះត្រូវបានបញ្ចប់តាំងពីឆ្នាំ២០១៦ ឯណោះ។ ហេតុអ្វីបានជាគេសរសេរថា ផ្ដាច់ជំនួយយើងនៅឆ្នាំ២០១៨។ តើគោលបំណងជាក់លាក់លើបញ្ហានេះជាអ្វី? ប្រហែលជា (អាមេរិក)ពិបាកឆ្លើយនឹងសំនួរនេះ ។ខ្ញុំមិនយល់! តើអ្នកមានបំណងបង្ខូចកេរ្តិ៍ឈ្មោះប្រទេសកម្ពុជា? ហើយថាអ្នកផ្ដល់ជំនួយ ហើយអ្នកផ្ដាច់ជំនួយដោយសារមិនពេញចិត្ត?»។

ជាមួយគ្នានេះសម្ដេច ហ៊ុន សែន ស្នើឲ្យលោក William Heidt ចេញមុខបកស្រាយលើបញ្ហានេះ ដើម្បីកុំឲ្យប្រជាពលរដ្ឋខ្មែរយល់ច្រឡំ។ «ប្រធានាធិបតី ត្រាំទើបបង្កើតពានរង្វាន់សារព័ត៌មានភូតកុហក ឥឡូវនេះមានអគ្គរដ្ឋទូតភូតកុហក ជិះឡានដាក់ទង់ជាតិសរសេរកំណត់ទូតភូតកុហក…។ ខ្ញុំចង់ប្រាប់ប្រជាពលរដ្ឋរបស់ខ្ញុំកុំឲ្យជឿអ្នកឯង អ្នកឯងភូតប្រជាជនកម្ពុជា។ ប៉ុន្តែអ្វីដែលនៅក្រោយខ្នងពិតប្រាកដ គឺការមួលបង្កាច់ ដើម្បីបង្កើតចិត្តសាស្ត្រ ឲ្យពួកអាងាប់(CNRP)ទៅហើយនោះ រស់ឡើងវិញ។ វាមិនអាចទៅរួចនោះទេ…។ គ្មានរឿងកាត់ជំនួយទេ លិខិតនោះគឺជាការសរសេររបស់ទូតអាមេរិកទេ គ្មានកាត់ជំនួយឡើយ។ ទូតអាមេរិកចេញមុខបកស្រាយមក បើភាន់ច្រឡំថាភាន់ច្រឡំ»។ នេះជាការលើកឡើងរបស់ប្រមុខរដ្ឋាភិបាល ដែលផ្ដាំឲ្យឯកអគ្គរដ្ឋទូតអាមេរិកលោក Heidt កុំធ្វើចរិតដូចឯកអគ្គរដ្ឋទូតអាមេរិកអាណត្តិមុន វិលលៀម ថូត ដែលលើកដៃច្រង៉េងច្រង៉ាង ពេលព្រះមហាក្សត្រយាងបើកសម័យប្រជុំរដ្ឋសភាកាលពីឆ្នាំ២០១៣។

ការស្តីបន្ទោសរបស់សម្ដេច ហ៊ុន សែន បែបនេះ ធ្វើឡើងបន្ទាប់ពីលោក William Heidt ព្រមានកន្លងមកថា អាមេរិកនឹងផ្ដាច់ជំនួយលើវិស័យពន្ធដារកម្ពុជា ដោយផ្សារភ្ជាប់ករណីបិទកាសែត The Cambodia Daily និងវិទ្យុអាស៊ីសេរី ដែលពាក់ព័ន្ធនឹងការបង់ពន្ធចូលរដ្ឋាភិបាលកម្ពុជា។ ប៉ុន្តែករណីនេះត្រូវប្រមុខរដ្ឋាភិបាលកម្ពុជា បានបដិសេធថា ស្ថាប័នព័ត៌មានទាំងពីរនេះ បានបិទទ្វារដោយខ្លួនឯង ដោយសារគ្មានប្រាក់បង់ពន្ធ ។«យើងមិនបានបិទអាស៊ីសេរី និងខេមបូឌាដេលីនោះទេ វាបិទដោយសារមិនបង់ពន្ធហើយ វារត់ ចោលទៀត»។ នេះជាអះអាងរបស់សម្ដេច ហ៊ុន សែន៕