អន្តរជាតិ
នយោបាយអន្តរជាតិ
លោក ត្រាំ ថា សង្គ្រាមពាណិជ្ជកម្មជារឿងល្អ ហើយអាមេរិកនឹងឈ្នះដោយស្រួល
ប្រធានាធិបតី ដូណាល់ ត្រាំ (រូបភាព៖ AFP)
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ ហាក់មិនខ្វល់់ខ្វាយអ្វីឡើយនឹងការផ្ទុះសង្គ្រាមពាណិជ្ជកម្ម ក្រោយការដំឡើងនាំចូលពន្ធលើដែក និងអាលុយមីយញ៉ូម។ លោក ត្រាំ គ្រោងប្រកាសដំឡើងពន្ធនាំចូលផលិតផលទាំងពីរនៅសប្ដាហ៍ក្រោយ ដែលរឿងនេះធ្វើឲ្យដៃគូពាណិជ្ជកម្មធំៗរបស់អាមេរិកមានអឺរ៉ុប ចិន ជប៉ុន តវ៉ាយ៉ាងខ្លាំង។ ប្រធានាធិបតីអាមេរិកហាក់ត្រៀមរួចស្រេចដើម្បីប្រយុទ្ធក្នុងសង្គ្រាមដែលបម្រុងនឹងផ្ទុះនោះ។ 
ផែនការដំឡើងពន្ធនាំចូល២៥ភាគរយលើដែក និង១០ភាគរយលើផលិតផលអាលុយមីញ៉ូមពីសំណាក់រដ្ឋបាលប្រធានាធិបតី ដូណាល់ ត្រាំ កំពុងធ្វើឲ្យពិភពលោករង្គើយខ្លាំង និងស្ថិតនៅលើដំណើរទៅកាន់សង្គ្រាមពាណិជ្ជកម្ម។ សហភាពអឺរ៉ុប កាណាដា បារាំង ចិន និងជប៉ុន សុទ្ធតែបានព្រមានពីគ្រោះថ្នាក់ បើលោក ត្រាំ ពិតជាប្រកាសបង្កើនពន្ធនាំចូលលើផលិតផលឧស្សាហកម្មដ៏សំខាន់ទាំងពីរ។
សហភាពអឺរ៉ុបបានលើកឡើងពីលទ្ធភាពក្នុងការចាត់វិធានការតបវិញ ខណៈបារាំងចាត់ទុកការដំឡើងពន្ធខ្ពស់បែបនេះជារឿងមិនអាចទទទួលបានយកឡើយ។ ចិន ដែលនាំចូលដែកទៅទីផ្សារអាមេរិកដែរនោះ បានទទូចឲ្យរដ្ឋបាលក្រុងវ៉ាស៊ីនតោនរក្សាការអត់ធ្មត់។ ចំណែកឯកាណាដាវិញ ក៏បានព្រមានទុកមុនដែរថា បើផលិតផលខ្លួនរងផលប៉ះពាល់ដោយសារចំណាត់ការរបស់លោក ត្រាំ កាណាដាក៏មិននៅស្ងៀមដែរ។
ការគំរាមឆ្លើយតបរបស់ប្រទេសផលិតដែក និងអាលុយមីញ៉ូមធំៗនេះ ធ្វើឲ្យគេបារម្ភថា សង្គ្រាមពាណិជ្ជកម្មអាចផ្ទុះឡើងមិនខាន។ យ៉ាងណាមិញ លោកប្រធានាធិបតី ត្រាំ ដូចជាមិនបារម្ភឡើយ ហើយបានផ្ញើសារស្វាគមន៍ជម្លោះក្នុងវិស័យពាណិជ្ជកម្មនេះទៅទៀត។ នៅថ្ងៃទី២ ខែមីនា លោក ត្រាំ បានប្រើប្រាស់បណ្ដាញសង្គម Twitter របស់ខ្លួន ដើម្បីការពារការដំឡើងពន្ធ និងការពារឧស្សាហកម្មដែកក្នុងស្រុក។
«នៅពេលប្រទេសមួយ (អាមេរិក) បាត់បង់លុយរាប់ពាន់លានដុល្លារលើវិស័យពាណិជ្ជកម្មជាមួយប្រទេសដែលខ្លួនរកស៊ីជាមួយ សង្គ្រាមពាណិជ្ជកម្មជារឿងល្អ និងងាយស្រួលឈ្នះ»។ នេះជាអត្ថន័យក្នុងសារមួយរបស់លោក ត្រាំ ក្នុងចំណោមសារជាច្រើន។ លោក ត្រាំ បន្តថា គោលដៅសំខាន់របស់លោក គឺការពារការងារប្រជាជនអាមេរិកពីផលិតផលប្រទេសដែលមានតម្លៃថោក ដែលនេះជាគោលនយោបាយគិតប្រយោជន៍អាមេរិកមុនគេ។
America First របស់លោក ត្រាំ ពិតជាបង្កើនការងារឲ្យប្រជាជនអាមេរិកមែន តែចំណាត់ការរបៀបគាំពារនិយមធ្វើឲ្យដៃគូពាណិជ្ជកម្មរបស់អាមេរិកមិនសប្បាយចិត្តឡើយ។ នៅមុននេះ ក្រុងវ៉ាស៊ីនតោនទើបបានដំឡើងពន្ធផលិតផលម៉ាស៊ីនបោកគក់ និងផ្ទាំងសូឡា ដែលធ្វើឲ្យកូរ៉េខាងត្បូង និងចិនតវ៉ាដាច់ណាត់។ សម្រាប់លោក ត្រាំ គោលដៅចម្បងពេលនេះ គឺលើកស្ទួយផលិតផលក្នុងស្រុកសិន ទោះជាត្រូវដើរផ្ទុយចរន្តសេរីភាវូបនីយកម្មពិភពលោកក្ដី៕
Tag:
អាមេរិក
ដូណាល់ ត្រាំ
ពន្ធ
ដែក
អាលុយមីញ៉ូម
© រក្សាសិទ្ធិដោយ thmeythmey.com
