ជាតិ
ចៅក្រមស៊ើបសួរ សម្រេចឃុំលោក កឹម សុខា ៦ខែទៀត លោក កឹម សុខា នៅពេលដែលត្រូវបានចាប់ខ្លួននៅផ្ទះកាលពីយប់ថ្ងៃទី៣ ខែកញ្ញា ឆ្នាំ២០១៧។ រូបថត AFP
× ចៅក្រមស៊ើបសួរនៃសាលាដំបូងរាជធានីភ្នំពេញ បានពន្យារពេលនៃការឃុំខ្លួនលោក កឹម សុខា អតីតប្រធានគណបក្សសង្គ្រោះជាតិ រយៈពេល៦ខែទៅមុខទៀត មុននឹងសម្រេចយកសំណុំរឿងទៅជំនុំជម្រះ។ ការសម្រេចពន្យារពេលនៃការឃុំខ្លួននេះ ដោយសារតែការស៊ើបសួរលើលោក កឹម សុខា ដែលត្រូវបានសង្ស័យថាបានប្រព្រឹត្តអំពើក្បត់ជាតិ នៅមិនទាន់ចប់សព្វគ្រប់។
លោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានប្រាប់អ្នកកាសែតតាមបណ្តាញទំនាក់ទំនងតេឡេក្រាម នៅរសៀលថ្ងៃទី៥ ខែមីនា ឆ្នាំ២0១៨នេះ យ៉ាងដូច្នេះថា៖«ក្រោយពីបញ្ចប់ការសាកសួរ និងការពិភាក្សាដេញដោលចំពោះមុខ ចៅក្រមស៊ើបសួរបានសម្រេចពន្យារពេលឃុំខ្លួនជនត្រូវចោទ [លោក កឹម សុខា] ដើម្បីបន្តកិច្ចស៊ើបសួរ។ ជនត្រូវចោទ ត្រូវបានដាក់ក្រោមការពិនិត្យពីបទល្មើសជាបទឧក្រិដ្ឋ ដែលការពន្យារពេលឃុំខ្លួនមានរយៈពេល៦ខែ»។
នៅព្រឹកថ្ងៃចន្ទនេះ លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ បានធ្វើដំណើរទៅកាន់ពន្ធនាគារត្រពាំងផ្លុង ក្នុងខេត្តត្បូងឃ្មុំ ដើម្បីជួបនិងសួរលោក កឹម សុខា បន្ថែម។ ក្រុមមេធាវីរបស់លោក កឹម សុខា ក៏បានចូលរួមស្តាប់ការសាកសួរនេះដែរ។ នេះជាលើកទី៤ហើយ ដែលចៅក្រមស៊ើបសួរ បានសួរលោក កឹម សុខា ដល់ពន្ធនាគារ។
ក្រោយបញ្ចប់ការសាកសួរខាងលើ សារព័ត៌មានថ្មីៗ នៅមិនអាចសុំការបំភ្លឺពីក្រុមមេធាវីរបស់លោក កឹម សុខា នោះទេ ដោយសារតែមិនលើកទូរសព្ទ។ ប៉ុន្តែ កាលពីព្រឹកមិញ លោក ជូង ជូងី មេធាវី១រូបរបស់លោក កឹម សុខា បានប្រាបសារព័ត៌មានថ្មីៗថា ចៅក្រមស៊ើបសួរ ទៅជួបលោក កឹម សុខា ដើម្បីសួរយកចម្លើយទាក់ទងនឹងបទល្មើស និងដើម្បីសម្រេចថា ត្រូវដោះលែងឬបន្តឃុំខ្លួន។
តាមនីតិវិធី ជនត្រូវចោទ អាចត្រូវបានឃុំខ្លួនរយៈពេល៦ខែបណ្តោះ ហើយបន្ទាប់មក តុលាការ ត្រូវបញ្ជូនសំណុំរឿងទៅជំនុំជម្រះ។ ប៉ុន្តែ តុលាការ ក៏អាចពន្យារពេលនៃការឃុំខ្លួនជនត្រូវចោទនោះដែរ ប្រសិនបើ ការស៊ើបសួរមិនទាន់ចប់ស្រួលបួល។
ចំពោះករណីលោក កឹម សុខា លោក បានជាប់ឃុំលើសពី៦ខែហើយ។ ហើយទីបំផុត តុលាការ មិនទាន់សម្រេចបញ្ចូនសំណុំរឿងរបស់មេបក្សប្រឆាំងរូបនេះ ទៅជំនុំជម្រះនៅឡើយទេ ពោលគឺត្រូវឲ្យជាប់ឃុំដដែល ដើម្បីបន្តការស៊ើបសួរ។ ក្នុងអំឡុងរយៈពេល៦ខែនេះ ចៅក្រមស៊ើបសួរ អាចសម្រេចនៅពេលណាមួយ ថាត្រូវបញ្ជូនសំណុំរឿងរបស់លោក កឹម សុខា ទៅកាន់ក្តី។ បើការស៊ើបសួរលើករណីរបស់លោក កឹម សុខា មិនទាន់ចប់សព្វគ្រប់ ចៅក្រមស៊ើបសួរ អាចពន្យារ៦ខែទៀត ជាលើកទី២៕
© រក្សាសិទ្ធិដោយ thmeythmey.com