ជាតិ
នយោបាយជាតិ
លោក កឹម សុខា បរាជ័យជាលើកទី៣ ក្នុងការសុំនៅក្រៅឃុំ លោក កឹម សុខា នៅពេលដែលត្រូវបានចាប់ខ្លួននៅផ្ទះកាលពីយប់ថ្ងៃទី៣ ខែកញ្ញា ឆ្នាំ២០១៧។ រូបថត AFP
× តុលាការកំពូល សម្រេចឲ្យលោក កឹម សុខា អតីតប្រធានគណបក្សសង្គ្រោះជាតិ ជាប់ឃុំក្នុងពន្ធនាគារដដែល។ ការសម្រេចរបស់តុលាការកំពូល ធ្វើឡើងបន្ទាប់ពីបញ្ចប់សវនាការ នៅព្រឹកថ្ងៃទី៩ ខែមីនា ឆ្នាំ២0១៨នេះ។
លោក កឹម សុខា មិនត្រូវបានដឹកពីពន្ធនាគារខេត្តត្បូងឃ្មុំ ឲ្យមកចូលរួមក្នុងសវនាការនៃតុលាការកំពូលក្នុងរាជធានីភ្នំពេញ នោះទេ។ ប៉ុន្តែក្រុមមេធាវីរបស់លោក បានចូលរួមក្នុងសវនាការនេះ។
សំណើសុំឲ្យលោក កឹម សុខា នៅក្រៅឃុំ បានដាក់ទៅកាន់តុលាការគ្រប់ជាន់ថ្នាក់អស់ហើយ ដែលរួមមាន សាលាដំបូងរាជធានីភ្នំពេញ សាលាឧទ្ធរណ៍ និងតុលាការកំពូល។ ប៉ុន្តែ ចាប់តាំងពីតុលាការជាន់ទាប់ រហូតដល់តុលាការកំពូល សុទ្ធតែបដិសេធសំណើសុំនៅក្រៅឃុំរបស់លោក កឹម សុខា។
ក្រុមមេធាវី លើកឡើងថា ការស្នើឲ្យដោះលែងលោក កឹម សុខា ពីពន្ធនាគារជាបណ្តោះអាសន្ន គឺដើម្បីបានទៅព្យាបាលជំងឺនៅឯបរទេស។ បើតាមក្រុមមេធាវី លោក កឹម សុខា មានជំងឺដល់បីប្រភេទឯណោះ គឺលើសឈាម ទឹកនោមផ្អែម និងកៀបសរសៃដៃខាងឆ្វេង។
មកដល់ពេលនេះ លោក បានរស់នៅក្នុងពន្ធនាគារជាង៦ខែហើយ ក្រោមការសង្ស័យរបស់តុលាការ ថាបានឃុបឃិតជាមួយបរទេស ដើម្បីរៀបចំគម្រោងផ្តួលរំលំរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com