គ្រឿងអលង្ការ,លុយ,កាបូបរឹបអូសពីផ្ទះលោក ណាជីប មានតម្លៃប្រហែល២៧០លានដុល្លារ

អន្តរជាតិ

គ្រឿងអលង្ការ,លុយ,កាបូបរឹបអូសពីផ្ទះលោក ណាជីប មានតម្លៃប្រហែល២៧០លានដុល្លារ

28, Jun 2018 , 8:59 am

រូបភាព

ដោយ: ថ្មីៗ

ក្រោយរឹបអូសបានលុយសុទ្ធ គ្រឿងអលង្ការ និងវត្តុមានតម្លៃជាច្រើនផ្សេងទៀត ពីផ្ទះ និងខុនដូអតីតនាយករដ្ឋមន្ត្រីណាជីប រ៉ាហ្សាក់ អស់ប្រហែលមួយខែនោះ ខាងប៉ូលិសម៉ាឡេស៊ី បានប្រកាសពីតម្លៃសរុបនៃវត្ថុទាំងនោះ នៅថ្ងៃពុធទី ២៧ ខែមិថុនា។ ទាំងលុយសុទ្ធ និងតម្លៃគ្រឿងអលង្ការ បូកបញ្ចូលគ្នា អាចមានតម្លៃសរុបជាង ២០០ លានដុល្លារអាមេរិកឯណោះ។

ប៉ូលិសម៉ាឡេស៊ីបានអះអាងថា វត្ថុដែលរឹបអូសបានទាំងនោះ មានកាបូបយួរដៃ ៥៦៧, គ្រឿងអលង្ការ ១២០០០ចំណែកផ្សេងៗគ្នា, កាបូបមួយចំនួនផ្ទុកលុយសរុប ៣០លានដុល្លារ (រូបិយវត្ថុ ២៦ ប្រភេទផ្សេងគ្នា) នាឡិកាមានទាំងអស់ ៤២៣ គ្រឿង ដែលមានតម្លៃប្រហែល ១៩,៣លានដុល្លារ និងវត្ថុមានតម្លៃម៉ាកល្បីផ្សេងទៀត។

បើតាមទីភ្នាក់ងារព័ត៌មាន AFP ប្រធាននាយកដ្ឋានស៊ើបអង្កេតបទឧក្រិដ្ឋពាណិជ្ជកម្ម លោក Amar Singh Ishar Singh បានអះអាងថា វាជាការរឹបអូសបានវត្ថុតាងធំបំផុតមិនធ្លាប់មានក្នុងប្រវត្តិសាស្ត្រម៉ាឡេស៊ី ព្រោះគេត្រូវចំណាយពេលមួយខែ ដើម្បីគិតគូរតម្លៃសរុប នៃវត្ថុតាងនេះ។ លោកបន្ថែមថា វត្ថុតាងទាំងនោះ មានតម្លៃចន្លោះពី ២២៥ ដល់ ២៧៣ លានដុល្លារឯណោះ។

មន្ត្រីទទួលបន្ទុកការស៊ើបអង្កេតខាងលើ បានបង្ហើបដែរថា ក្រៅពីនាឡិកាដៃ វត្ថុមានតម្លៃនោះ មានខ្សែកចំនួន ១៤០០ ខ្សែ វ៉ែនតាការពារកម្តៅថ្ងៃ ២៣៤ និងចិញ្ចៀន ២២០០វង់។ ក្នុងចំណោមខ្សែកទាំងនោះ មានមួយខ្សែ មានតម្លៃប្រហែល ១,៥លានដុល្លារថែមទៀត។

ចំណែកកាបូបដៃ ៥៦៧ នោះមាន ២៧២ ជាកាបូបម៉ាល្បី Hermes ដែលវាមានតម្លៃប្រហែល ១២,៧ លានដុល្លារឯណោះ។ ពេលនេះប៉ូលិសកំពុងគណនាមើល តម្លៃកាបូបផ្សេងទៀត ដែលនៅសេសសល់។

តាមពិតទៅ ការរឹបអូសបានគ្រឿងអលង្ការយ៉ាងសន្ធឹកសន្ធាប់ ពីផ្ទះរបស់អតីតនាយករដ្ឋមន្ត្រីនេះ ធ្វើឡើងក្រោមការស៊ើបអង្កេតសំណុំរឿងពុករលួយ កិបកេងលុយរដ្ឋ 1MDB។ សំណុំរឿងនេះ ត្រូវបានបើកឲ្យមានការស៊ើបអង្កេតឡើងវិញ ក្រោយសម្ព័ន្ធបក្ស Pakatan Harapan ដែលដឹកនាំដោយលោក មហាធៀ មហាម៉ាត់ ឈ្នះឆ្នោត។ ការរឹបអូសបានវត្ថុតាងដែលមានតម្លៃរាប់រយលានដុល្លារនេះ ធ្វើឲ្យគេរឹតតែសង្ស័យខ្លាំង និងធ្វើឲ្យប្រជាជនម៉ាឡេស៊ី ខឹងសម្បារថែមទៀត ព្រោះប្រាក់ខែរបស់លោក ណាជីប កាលធ្វើជានាយករដ្ឋមន្ត្រី គឺត្រឹម ៥៦០០ ដុល្លារ ក្នុងមួយខែប៉ុណ្ណោះ។

បង្កើតក្នុងឆ្នាំ២០០៩ មូលនិធិ 1MDB មានគោលដៅប្រែក្លាយទីក្រុងគួឡាឡាំពួរ ទៅជាមជ្ឈមណ្ឌលហិរញ្ញវត្ថុដ៏ធំមួយ និងជំរុញសេដ្ឋកិច្ចជាតិ តាមរយៈការវិនិយោគយុទ្ធសាស្ត្រ។ ប៉ុន្តែមន្ត្រីក្រសួងយុត្តិធម៌អាមេរិក ដែលបានស្រាវជ្រាវក្នុងករណីនេះ បានអះអាងថា មន្ត្រីក្នុងមូលនិធិនេះ បានកិបកេងលុយប្រហែល ៤,៥ ពាន់លានដុល្លារអាមេរិក ហើយមួយផ្នែកនៃលុយនោះ មាននៅក្នុងគណីធនាគាររបស់លោក ណាជីប រ៉ាហ្សាក់។ ក្នុងឆ្នាំ ២០១៣ លុយមានទំហំ ៦៨១ លានដុល្លារ នៃមូលនិធិនេះ ត្រូវបានផ្ទេរទៅកាន់គណនីធនាគាររបស់លោក។ ប៉ុន្តែលោកបន្តបដិសេធ និងអះអាងថា វាជាលុយអំណោយដែលអារ៉ាប៊ីសាអូឌីត ផ្តល់ឲ្យប៉ុណ្ណោះ។ ចំណែកលុយនៅក្នុងកាបូបច្រើនលានដុល្លារ ដែលប៉ូលិបានរឹបអូសនោះ លោក ណាជីប អះអាងថាវា ជាហិរញ្ញវត្ថុរបស់បក្ស UMNO ដែលលោកធ្លាប់ធ្វើជាប្រធានប៉ុណ្ណោះ។ លោកត្រូវប្រគល់លុយនោះ ឲ្យទៅបក្សវិញ ក្រោយលោកលាលែងពីតំណែងជាប្រធានបក្សដោយសារចាញ់ឆ្នោតកន្លងមកដែរ៕